ସମାଜ ଡିଜିଟାଲ ଡେସ୍କ: ଭାରତ ଉପରେ ପରମାଣୁ ଆକ୍ରମଣ। ଟ୍ରମ୍ପଙ୍କୁ ହତ୍ୟା। ତା’ ସହିତ ଇସ୍ରାଏଲର ପତନ ନିଶ୍ଚୟ ଘଟିବ। ଏଭଳି କିଛି ବାର୍ତ୍ତା ଲେଖାଯାଇଛି ଆମେରିକାର ମିନିପଲିସ ଚର୍ଚ୍ଚରେ ଆକ୍ରମଣ କରିଥିବା ଆତତାୟୀର ବନ୍ଧୁକରେ। ପୁଲିସ ତା’କୁ ଗିରଫ କରିବା ପରେ ତା’ଠାରୁ ଜବତ ହୋଇଥିବା ବନ୍ଧୁକ ଏବଂ ଅନ୍ୟ ଅସ୍ତ୍ରଶସ୍ତ୍ରରେ ଏଭଳି ଲେଖାଯାଇଥିବା ଦେଖିବାକୁ ମିଳିଛି।
ଆମେରିକୀୟ ରାଜନୀତିଜ୍ଞ ଲୌରା ଲୁମର ଏହାର ଫଟୋ ସାମାଜିକ ଗଣମାଧ୍ୟମରେ ଜାରି କରିଛନ୍ତି। ଅଭିଯୁକ୍ତ ଜଣକ ହେଉଛି ୨୩ ବର୍ଷୀୟ ରବିନ ଓ୍ବେଷ୍ଟମ୍ୟାନ। ସେ ଗତ ବୁଧବାର ଦିନ ମିନିପଲିସସ୍ଥିତ ଏକ ଚର୍ଚ୍ଚରେ ଆକ୍ରମଣ କରିଥିଲା। ଏହି ଚର୍ଚ୍ଚରେ ସ୍କୁଲ ମଧ୍ୟ ଚାଲିଥିଲା। ଅଭିଯୁକ୍ତ ଝରକା ବାଟେ ବନ୍ଧୁକରୁ ଆଖିବୁଜା ଗୁଳିମାଡ଼ କରିଥିଲା। ଏଥିରେ ୨ ଜଣ ଶିଶୁଙ୍କ ମୃତ୍ୟୁ ଘଟିଥିବାବେଳେ ୧୭ ଜଣ ଆହତ ହୋଇଥିଲେ। ପୁଲିସ ଅଭିଯୁକ୍ତକୁ କାବୁ କରିଥିଲା।
ଲୌରା ଲୁମର ଲେଖିଛନ୍ତି ଯେ, ଆତତାୟୀ ଜଣକ ଭାରତ ବିରୋଧୀ ଏବଂ ଖ୍ରୀଷ୍ଟିଆନ ବିରୋଧୀ ଇସଲାମିକ ଚିନ୍ତାଧାରା ଦ୍ଵାରା ପ୍ରଭାବିତ ହୋଇଥିବା ସ୍ପଷ୍ଟ ଭାବରେ ଜଣାପଡ଼ୁଛି। ଇଲହାନ ଓମାର ଜିଲାରେ ଏଭଳି ବ୍ୟକ୍ତିଙ୍କୁ ଦେଖିବା କୌଣସି ଆଶ୍ଚର୍ଯ୍ୟଜନକ କଥା ନୁହେଁ।
