ଭୁବନେଶ୍ବର : ସ୍କ୍ରାପିଂରେ ବଡ଼ ଷଡ଼ଯନ୍ତ୍ର ଚାଲିଛି। ଏହା ଉପରେ କାହାରି କଟକଣା ନାହିଁ। ଓଡ଼ିଶା ସ୍କ୍ରାପିଂ ବେପାରରେ ବିହାରୀ ଓ ଉତ୍ତରପ୍ରଦେଶ (ୟୁପି) ଦଲାଲଙ୍କ ରାଜ୍ ଚାଲିଛି। ଏହାର ଚେର କଲକାତା, ଦିଲ୍ଲୀ ଓ ମୁମ୍ବଇକୁ ଲମ୍ବିଛି। ରାଜ୍ୟରେ ମାଳମାଳ ଦୋକାନ ଖୋଲି ବେଆଇନ ବେପାର ଚଳାଇଛନ୍ତି। ଭଙ୍ଗା ଲୁହା ନାଁରେ ଭଲ ଜିନିଷ କିଣି ନେଉଛନ୍ତି ଦଲାଲ। ଏଥିରେ କୋଟିକୋଟି ଟଙ୍କା ହେରାଫେରି ହେଉଥିବାବେଳେ ସରକାର ଲକ୍ଷଲକ୍ଷ ଟଙ୍କାର ରାଜସ୍ବ କ୍ଷତି ସହୁଛନ୍ତି। ପୁଲିସ ଓ ଅନ୍ୟ ବିଭାଗର କର୍ମଚାରୀ ବି ମାଲାମାଲ ହେଉଛନ୍ତି। ଭଙ୍ଗା ଲୁହାଠାରୁ ଆରମ୍ଭ କରି ପୁରୁଣା କାଗଜ, ପୁରୁଣା ଗାଡ଼ି ଓ କାର୍ଟୁନ ମଧ୍ୟ ସ୍କ୍ରାପିଂ ବ୍ୟବସାୟରେ ଅନ୍ତର୍ଭୁକ୍ତ। ଭଙ୍ଗା ଲୁହା ନାଁରେ ବ୍ୟବସାୟୀ ଭଲ ଲୁହା ଓ ଗାଡ଼ି ମୋଟର କିଣୁଛନ୍ତି। ଚୋରା ଗାଡ଼ି ଓ ଲୁହା କାରବାର ବୃଦ୍ଧି ପାଉଛି। ଚୋରି ଗାଡ଼ି ନ ମିଳିବା ପଛରେ କବାଡ଼ି ବ୍ୟବସାୟୀଙ୍କ ଏବଂ କିଛି ନ୍ୟସ୍ତସ୍ବାର୍ଥ କର୍ମଚାରୀଙ୍କ ସମ୍ପୃକ୍ତି ଥିବା ଅଭିଯୋଗ ହେଉଛି। ପାରାଦ୍ବୀପ ବନ୍ଦର ହେଉ କିମ୍ବା ରେଲୱେ ବିଭାଗରେ ପୁରୁଣା ଲୁହା ବିକ୍ରି ନାଁରେ ନୂଆ ଜିନିଷ କର୍ମଚାରୀ କବାଡ଼ି ଦୋକାନୀଙ୍କୁ ବିକ୍ରି କରି ନିଜ ପକେଟ ଗରମ କରୁଛନ୍ତି। ଏଥିରେ ସରକାରଙ୍କର ଲକ୍ଷ ଲକ୍ଷ ଟଙ୍କା କ୍ଷତି ହେଉଛି। ଏହି ବେପାର କରିବା ପାଇଁ ବିହାରୀ ଓ ୟୁପିର ଦଲାଲ ଏଠାରେ ଡେରା ପକାଇଛନ୍ତି। ୨୦୨୪ ସେପ୍ଟେମ୍ବରରେ ଏଭଳି ଏକ କବାଡ଼ି ଦଳଙ୍କୁ କମିସନରେଟ ପୁଲିସ ଧରିଥିଲେ ବି କାରବାରର ଚେର ଧରିପାରି ନଥିଲା। ଏହି କବାଡ଼ିଆ ଦଳ ୨୪ ଘଣ୍ଟିଆ ପାଣି ଯୋଗାଇ ଦେବାକୁ ୱାଟ୍କୋ ପକାଇଥିବା ଲୁହା ପାଇପ୍ ଚୋରି କରି ସରକାର ଯେଉଁ କମ୍ପାନୀଠାରୁ ପାଇପ୍ କିଣୁଥିଲେ, ସେହି କମ୍ପାନୀକୁ ବିକ୍ରି କରୁଥିଲେ। ଏକ ଚୋରି ଅଭିଯୋଗରେ ଗିରଫ ୩ ଜଣ ଅଭିଯୁକ୍ତଙ୍କୁ ଜେରା ପରେ କବାଡ଼ି ବେପାରର ଷଡ଼ଯନ୍ତ୍ର ପଦାକୁ ଆସିଥିଲା। ସେମାନେ କାର୍ରେ ଆସୁଥିଲେ, ଠିକାଦାର ରଖିଥିବା ଲୁହା ପାଇପ୍କୁ ଟ୍ରକ୍ରେ ନେଇ ପଳାଉଥିଲେ। ଅଭିଯୁକ୍ତ ନିକଟରୁ ପୁଲିସ ୧୨୬ଟି ଲୁହା ପାଇପ୍ ସମେତ ବ୍ୟବହୃତ କାର୍ ଓ ଟ୍ରକ୍କୁ ଜବତ କରିଥିଲା। ସେମାନଙ୍କ ବୟାନ ପୁଲିସକୁ ଆଶ୍ଚର୍ଯ୍ୟ କରିଥିଲା। ଏହି ରାକେଟ୍ ପଛରେ ବଡ଼ବଡ଼ କମ୍ପାନୀ ରହିଥିବା ଜଣାପଡ଼ିଥିଲା।
ବେଆଇନ ଭାବେ କବାଡ଼ି ବେପାର ଚାଲିଥିଲେ ହେଁ ଏହାକୁ ରୋକିବା ଦିଗରେ କ୍ରାଇମବ୍ରାଞ୍ଚର ସ୍ବତନ୍ତ୍ର କାର୍ଯ୍ୟ ବଳ (ଏସ୍ଟିଏଫ୍) ଏବଂ କମିସନରେଟ ପୁଲିସର ସ୍ପେଶାଲ କ୍ରାଇମ୍ (ଏସ୍ୟୁସି) ସଫଳ ହୋଇପାରୁନି। ବିଭିନ୍ନ ସମୟରେ କବାଡ଼ି ଦୋକାନରୁ ପୁଲିସ ଚୋରି ଗାଡ଼ି ଜବତ କରୁଥିଲେ ବି ସେମାନଙ୍କ ଦୋକାନର ଯାଞ୍ଚ କରାଯାଉ ନାହିଁ। ଏହି କାରବାର ଏବେ ରହସ୍ୟାବୃତ୍ତ। ଅଧିକାଂଶ କବାଡ଼ି କାରବାରର ମୁଖ୍ୟ କାର୍ପଟଦାର ଭୁବନେଶ୍ବରରେ ରହି ରାଜ୍ୟର ବିଭିନ୍ନ ଅଞ୍ଚଳରେ ଶାଖା ଦୋକାନ ଖୋଲିଛନ୍ତି। ରାଜ୍ୟରେ ଏବେ ଅଣଓଡ଼ିଆ ଗୋଷ୍ଠୀ କବାଡ଼ି କାରବାର ଚଳାଇଥିବା ଅନୁସନ୍ଧାନରୁ ଜଣାପଡ଼ିଛି।
ଚୋରା ଗାଡ଼ି ନ ମିଳିବା ପଛରେ ଅଦୃଶ୍ୟ ହାତ
Popular Categories
Previous article
Next article