ପୁରୀ : ଶ୍ରୀମନ୍ଦିର ଭିତରକୁ ମଙ୍ଗଳବାର ଜଣେ ଯୁବକ କ୍ୟାମେରାଯୁକ୍ତ ଚଷମା ଲଗାଇ ପ୍ରବେଶ କରୁଥିବାବେଳେ ବେହେରଣ ଦ୍ବାର ନିକଟରେ ସୁରକ୍ଷାକର୍ମୀଙ୍କ ହାତରେ ଧରାପଡ଼ିଥିଲା। ତାଙ୍କୁ କେବଳ ଅଣ୍ଡରଟେକିଂ ରଖି ପୁଲିସ ଛାଡ଼ି ଦେଇଥିଲା। ପୁଲିସ କଠୋର କାର୍ଯ୍ୟାନୁଷ୍ଠାନ ନେବା ଆବଶ୍ୟକ ଥିଲା ବୋଲି ବିଭିନ୍ନ ମହଲରେ ମତ ପ୍ରକାଶ ପାଇଥିଲା। ଏହି ପ୍ରସଙ୍ଗରେ ବୁଧବାର ପୁରୀ ପୁଲିସ ପକ୍ଷରୁ ସ୍ପଷ୍ଟୀକରଣ ରଖାଯାଇଛି। ଜିଲା ଆରକ୍ଷୀ ଅଧୀକ୍ଷକ ପିନାକ ମିଶ୍ର କହିଛନ୍ତି, ଧରାପଡ଼ିଥିବା ଯୁବକ ଅଭିଜିତ କରଙ୍କ ଚଷମା ଗୁପ୍ତ କ୍ୟାମେରାରୁ ଶ୍ରୀମନ୍ଦିର ଭିତର ବେଢ଼ାର କୌଣସି ଫଟୋ କି ଭିଡିଓ ମିଳିନାହିଁ। ସେଥିପାଇଁ ତାଙ୍କଠାରୁ ଅଣ୍ଡରଟେକିଂ ରଖି ଛଡ଼ାଯାଇଛି। ଶ୍ରୀ ମିଶ୍ର କହିଛନ୍ତି, ଶ୍ରୀମନ୍ଦିରକୁ ରାଜ୍ୟ ତଥା ରାଜ୍ୟ ବାହାରୁ ପ୍ରତ୍ୟେକ ଦିନ ହଜାର ହଜାର ଶ୍ରଦ୍ଧାଳୁ ଆସୁଛନ୍ତି। ମୋବାଇଲ ଓ କ୍ୟାମେରା ନେବା ପାଇଁ ସେମାନେ ନୂଆ ନୂଆ କୌଶଳ ଆପଣାଉଛନ୍ତି। ଆଗାମୀ ଦିନରେ ଶ୍ରୀମନ୍ଦିର ଭିତରକୁ ମୋବାଇଲ ଫୋନ୍ କିମ୍ବା କ୍ୟାମେରା ନଯିବା ପାଇଁ ସିଂହଦ୍ବାର ପୁଲିସ, ଜେଟିପି, ଶ୍ରୀମନ୍ଦିର ସ୍ବତନ୍ତ୍ର ସୁରକ୍ଷା ବାହିନୀ ପକ୍ଷରୁ ଚାରି ଦ୍ବାରରେ କଡ଼ାକଡ଼ି ଭାବେ ଯାଞ୍ଚ କରାଯିବ। ଶ୍ରୀମନ୍ଦିର ଉପରେ ଆଣ୍ଟି ଡ୍ରୋନ୍ ବ୍ୟବସ୍ଥା ସହ ଚାରିପାର୍ଶ୍ବରେ ୱାଚ୍ ଟାୱାର ନିର୍ମାଣ କରାଯିବ।
ଅନ୍ୟପକ୍ଷରେ ଚଳିତ ବର୍ଷ ଆରମ୍ଭରୁ ବାରମ୍ବାର ଶ୍ରୀମନ୍ଦିର ଭିତର ଫଟୋ ଓ ଭିଡ଼ିଓ ପ୍ରଘଟ ହେବା ଭଳି ଘଟଣା ଜାରି ରହିଛି। କେବଳ ଜଣଙ୍କୁ ଛାଡ଼ି ଦେଲେ ଅନ୍ୟ କୌଣସି ବ୍ୟକ୍ତିଙ୍କୁ ପୁଲିସ ବର୍ତ୍ତମାନ ସୁଦ୍ଧା ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରିପାରି ନାହିଁ। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କଠୋର ପଦକ୍ଷେପ ନିଆଯିବା ଆବଶ୍ୟକ ରହିଛି ବୋଲି ଜଗନ୍ନାଥପ୍ରେମୀ ସୂଚନା ଦେଇଛନ୍ତି। ଶତାଧିକ ପୁଲିସ ଶ୍ରୀମନ୍ଦିର ବାହାରେ ଏବଂ ଭିତରେ ମୁତୟନ ଥାଇ ବି ବାରମ୍ବାର ଏଭଳି ଘଟଣାକୁ ନେଇ ପୁଲିସର କାର୍ଯ୍ୟଦକ୍ଷତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଶ୍ରୀମନ୍ଦିର ସୁରକ୍ଷା କଡ଼ାକଡ଼ି: ଚାରିଦ୍ବାରରେ ଯାଞ୍ଚ ସହ ଆଣ୍ଟି ଡ୍ରୋନ, ୱାଚ୍ ଟାୱାର ବ୍ୟବସ୍ଥା
Popular Categories
Previous article
Next article