ଆଠଗଡ: ଆଠଗଡର ସର୍ବପୁରାତନ ସାଂସ୍କୃତିକ ଓ ସାମାଜିକ ଅନୁଷ୍ଠାନ ଟାଉନ କ୍ଲବ ଆନୁକୂଲ୍ୟରେ ରବିବାର ୭୬ତମ ବନ ମହୋତ୍ସବ ଓ ଚାରା ରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ ଆଠଗଡ଼ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମା ଯୋଗ ଦେଇଥିଲେ ବୃକ୍ଷ ରୋପଣ ଏକ ମହତ କାର୍ଯ୍ୟ ଏବଂ ସ୍ୱଚ୍ଛ ଓ ସୁସ୍ଥ ପପରିବେଶ ପାଇଁ ବ୍ୟାପକ ସବୁଜ ବଳୟ ସୃଷ୍ଟି କରାଯିବା ନିତ୍ୟାନ୍ତ ଆବଶ୍ୟକ ବୋଲି ମତପ୍ରକାଶ କରିଥିଲେ। ସମ୍ପ୍ରତି ଜଙ୍ଗଲ ସମ୍ପଦ ଓ ସବୁଜ ବନାନିର ଦୃତ ଅବକ୍ଷୟ ଏବଂ କଳକାରଖାନାରୁ ନିର୍ଗତ ଦୁଷିତ ବାଷ୍ପ, ଧୂଆଁ ଓ ବର୍ଜ୍ୟବସ୍ତୁ ପରିବେଶ ପ୍ରତି ବିପଦ ସୃଷ୍ଟି କରିବା ସହ ବିଶ୍ବର ତାପମାତ୍ରା ବୃଦ୍ଧିର କାରଣ ହୋଇଛି।
ଏହାକୁ ପ୍ରତିହତ କରି ଆମ ଉତ୍ତରପିଢି ପାଇଁ ଏକ ସ୍ୱଚ୍ଛ ଓ ସୁସ୍ଥ ତଥା ପ୍ରଦୂଷଣମୁକ୍ତ ପରିବେଶ ସୃଷ୍ଟି କରିବା ଆମର ସାମାଜିକ ଏବଂ ନୈତିକ ଦାୟିତ୍ବ ବୋଲି ଉପଜିଲ୍ଲାପାଳ ଶ୍ରୀ ଶର୍ମା ମତବ୍ୟକ୍ତ କରିଥିଲେ। କ୍ଲବର ସଭାପତି ରାମନାରାୟଣ ମହାନ୍ତି ଏଥିରେ ପୌରୋହିତ୍ୟ କରି ଜଙ୍ଗଲ ସମ୍ପଦର ସୁରକ୍ଷା ଓ ନୂତନ ଜଙ୍ଗଲ ସୃଷ୍ଟି କରିବା ଉପରେ ଗୁରୁତ୍ଵାରୋପ କରିଥିଲେ। ଏହି ଅବସରରେ କ୍ଲବ ପରିସରରେ ଉପଜିଲ୍ଲାପାଳ ଶ୍ରୀ ଶର୍ମା ଓ କ୍ଲବର ସଦସ୍ଯମାନେ ବହୁ ଚାରା ରୋପଣ କରିଥିଲେ। କାର୍ଯ୍ୟକ୍ରମରେ ବରିଷ୍ଠ ସଭ୍ୟ ଶ୍ରୀଧର ରଥ, ଦାଶରଥି ସାହୁ, ଡାକ୍ତର ଗୋକୁଳାନନ୍ଦ ପାତ୍ରୀ, ସୋମନାଥ ଭକ୍ତା, ମନୋରଞ୍ଜନ ସ୍ୱାଇଁ, ନୀଳକଣ୍ଠ ଦୋରା, ପସନ୍ନ ଭକ୍ତା, ରମେଶ ଚନ୍ଦ୍ର ସାହାଣୀ, ଜିତେନ୍ଦ୍ର କୁମାର ସ୍ୱାଇଁ ପ୍ରମୁଖଙ୍କ ସମେତ ଅନ୍ଯମାନେ ଉପସ୍ଥିତ ଥିଲେ।
