ଟିଟିଲାଗଡ଼ : ଟିଟିଲାଗଡ଼ ବ୍ଲକ ଅନ୍ତର୍ଗତ ଭାଲେଗାଁ ପଞ୍ଚାୟତ ବାଗଡେର ଗ୍ରାମର ଏକ ପରିବାର ଦାରିଦ୍ର୍ୟତାର ତାଡନା ସହିନପାରି ନିଜ ୭ ଦିନର କନ୍ୟାକୁ ବିକ୍ରି କରିଦେଇଥିବା ଅଭିଯୋଗ ହୋଇଛି । ପ୍ରାୟ ମାସଟିଏ ତଳେ ଟିଟିଲାଗଡ଼ ସରକାରୀ ମାତୃ ଓ ଶିଶୁ ଡାକ୍ତରଖାନାରେ ଶିଶୁ କନ୍ୟା ଜନ୍ମ ପରେ ଘରକୁ ଆଣି ୨୦ ହଜାର ଟଙ୍କାରେ ପାଇକମାଲ ଅଞ୍ଚଳର ଏକ ବ୍ୟକ୍ତିକୁ ବିକ୍ରି କରିଦିଆଯାଇଛି । ସୂଚନାରୁ ପ୍ରକାଶ ଯେ ଗ୍ରାମର ନିଲ ରଣା ଜଣେ ଦାଦନ ଶ୍ରମିକ । ତାଙ୍କର ପ୍ରଥମ ପତ୍ନୀ ତିନୋଟି କନ୍ୟା ଜନ୍ମ ଦେଇଥିଲେ । ପ୍ରାୟ ତିନି ବର୍ଷ ତଳେ ପ୍ରଥମ ପତ୍ନୀ ଘରୁ ଚାଲିଯିବା ପରେ ସେ ଦ୍ଵିତୀୟ ପତ୍ନୀ ଗ୍ରହଣ କରିଥିଲେ । ଦ୍ଵିତୀୟ ପତ୍ନୀଙ୍କଠାରୁ ବର୍ଷକ ତଳେ ପ୍ରଥମେ ଏକ କନ୍ୟା ସନ୍ତାନ ଜନ୍ମ ପରେ ଗତ ମାସ ଆଉ ଗୋଟିଏ କନ୍ୟା ସନ୍ତାନ ଜନ୍ମ ହୋଇଥିଲା । ଉକ୍ତ ଶିଶୁ କନ୍ୟା ଜନ୍ମ ପରେ ତାକୁ ୨୦ ହଜାର ଟଙ୍କାରେ ବିକ୍ରି କରିଦେଇଥିବା ନିଲ ସ୍ୱୀକାର କରିଛନ୍ତି । ଏକ ଭଙ୍ଗାଦଦରା ଘର ସହ ସରକାରଙ୍କ ମାଗଣା ଚାଉଳ ମଧ୍ୟ ମିଳୁନାହିଁ । ଗୋଟିଏ ଛୁଆର ଠିକ୍ ରୂପେ ଯତ୍ନ ନେଇପାରୁନାହାନ୍ତି, ଆଉ ଗୋଟିଏ ଛୁଆକୁ ପରିବାର କିଭଳି ପୋଷଣ କରିବେ ବୋଲି ଗ୍ରାମର ତାଙ୍କ ସମ୍ପର୍କୀୟ କହିଛନ୍ତି । ଘଟଣାଟି ବର୍ତ୍ତମାନ ଅଞ୍ଚଳରେ ଆଲୋଡନ ସୃଷ୍ଟି କରିଛି ।
Popular Categories
Previous article
Next article