ବେଙ୍ଗାଲୁରୁ: ବେଙ୍ଗାଲୁରୁର ୟେଲେହାଙ୍କା ବିମାନଘାଟିରେ ଚାଲିଥିବା ଏରୋ ଇଣ୍ଡିଆ ଶୋ’ ଅବସରରେ ଶନିବାର ଏକ ବଡ଼ ଧରଣର ଦୁର୍ଘଟଣା ଘଟିଛି। ପାର୍କିଂସ୍ଥଳରେ ଅଗ୍ନିକାଣ୍ଡ ଘଟି ପାଖାପାଖି ୧୦୦ କାର ଜଳିଯାଇଛି। ସୌଭାଗ୍ୟ ବଶତଃ ନିଆଁ ବିମାନ ପ୍ରଦର୍ଶନ ଅଞ୍ଚଳକୁ ବ୍ୟାପି ନ ଥିବାରୁ ଏକ ବଡ଼ ଅଘଟଣରୁ ରକ୍ଷା ମିଳିଛି।
ସୂଚନା ମୁତାବକ, ଶନିବାର ଏରୋ ଇଣ୍ଡିଆ ଶୋ’ ପାଇଁ ବହୁ ସଂଖ୍ୟକ ଦର୍ଶକଙ୍କ ଭିଡ଼ ଜମିଥିଲା। ଏଥିରେ ବହୁ ଭିଆଇପି ଏବଂ ବିଶିଷ୍ଟ ବ୍ୟକ୍ତି ମଧ୍ୟ ଯୋଗଦେଇଥିଲେ। ସେମାନଙ୍କ କାର ପାର୍କିଂ ଲାଗି ପ୍ରଦର୍ଶନ ଅଞ୍ଚଳଠାରୁ କିଛି ଦୂରରେ ପାର୍କିଂସ୍ଥଳ କରାଯାଇଛି। ସେଠାରେ ଶତାଧିକ କାର ପାର୍କିଂ କରାଯାଇଥିଲା। ହେଲେ କୌଣସି କାରଣରୁ ଏକ କାରରେ ନିଆଁ ଲାଗିଯାଇଥିଲା। ପରେ ସେଥିରୁ ନିଆଁ ଅନ୍ୟ କାରଗୁଡ଼ିକୁ ବ୍ୟାପିଯାଇଥିଲା। କିଛି ସମୟ ମଧ୍ୟରେ ପ୍ରାୟ ୧୦୦ଟି କାରରେ ନିଆଁ ସଂଯୋଗ ହୋଇଯିବା ଫଳରେ ସେଗୁଡ଼ିକ ଜଳିଯାଇଥିଲା। ଖବରପାଇ ଏକାଧିକ ଦମକଳ ଗାଡ଼ି ସହ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା କାର୍ଯ୍ୟ ଜାରି ରଖିଛନ୍ତି। ନିଆଁ ଯୋଗୁ ସ୍ଥାନୀୟ ଆକାଶ ଧୂଆଁମୟ ହୋଇପଡ଼ିଥିଲା। ଏଭଳି ଦୃଶ୍ୟ ଦେଖି ଦର୍ଶକ ଏବଂ ଅଧିକାରୀମାନେ ସ୍ତମ୍ଭୀଭୂତ ହୋଇପଡ଼ିଛନ୍ତି। ତେବେ ଅଗ୍ନିକାଣ୍ଡରେ କୌଣସି ମୃତାହତ ସମ୍ପର୍କରେ ସୂଚନା ମିଳିନାହିଁ କି ଅଗ୍ନିକାଣ୍ଡର କାରଣ ଜଣାପଡ଼ି ନାହିଁ।
