ଏମ୍ସରେ ଲାଗିଲା ୧୬୩ ଧାରା, ସୁରକ୍ଷା ଦୃଷ୍ଟିରୁ ୩ ପ୍ଲାଟୁନ ଫୋର୍ସ ମୁତୟନ
ଖଣ୍ଡଗିରି: ବଳଙ୍ଗା ଥାନା ଅଞ୍ଚଳରେ ଦୁର୍ବୃତ୍ତମାନେ ଜଣେ ନାବାଳିକା ଛାତ୍ରୀଙ୍କୁ ନିଆଁ ଲଗାଇ ପୋଡି ମାରିବାକୁ ଉଦ୍ୟମ କରିବା ପରେ ପୀଡିତାଙ୍କୁ ଚିକିତ୍ସା ପାଇଁ ଭୁବନେଶ୍ବର ଏମ୍ସ ସ୍ଥାନାନ୍ତର କରାଯାଇଥିଲା। ପିଡିତାଙ୍କୁ ଏମ୍ସ ବର୍ଣ୍ଣ ୟୁନିଟରେ ଚିକିତ୍ସା କରାଯାଉଛି।
ତେବେ ପୀଡିତ ଓ ତାଙ୍କ ପରିବାରକୁ ଭେଟିବା ପାଇଁ ଏମସରେ ବିଭିନ୍ନ ରାଜନୈତିକ ଦଳର ବିଧାୟକ, ସାଂସଦ ସହ ବହୁ ରାଜନେତାଙ୍କ ଭିଡ ଜମିଥିଲା। ଡାକ୍ତରଖାନାରେ ରୋଗୀ ମାନଙ୍କ ଚିକିତ୍ସା ହେଉଥିବାରୁ ଓ ସଂକ୍ରମଣ ହେବାର ସମ୍ଭାବନା ଥିବାରୁ ଶନିବାର ସକାଳେ ଏମ୍ସ କର୍ତୃପକ୍ଷ ଭିଡ ନ କରିବାକୁ ନୋଟିସ ଜାରି କରିଥିଲେ। କିନ୍ତୁ ଭିଡ କମିବା ପରିବର୍ତ୍ତେ ବେଳକୁ ବେଳ ଭିଡ ବଢିଥିଲା। ସନ୍ଧ୍ୟା ପରଠାରୁ ଏମ୍ସ ପରିସରରେ ବିଜେପି ଓ ବିଜେଡି ସହ ସବୁ ରାଜନୈତିକ ଦଳର ନେତା ମାନେ ଭିଡ ବଢାଇଥିଲେ। ବିଜେଡ଼ି ନେତା ପ୍ରଦିପ ମାଝି, ଡଃ ଲେଖାଶ୍ରୀ ସାମନ୍ତସିଂହାର, ଇପ୍ସିତା ସାହୁଙ୍କ ସହ ଅନେକ ନେତା ଓ କର୍ମୀ ଧାରଣାରେ ବସିଥିଲେ। ସରକାର ବିରୋଧି ନାରବାଜି ମଧ୍ୟ କରିଥିଲେ। ଅନୁରୁପ ଭାବେ ବିଜେପି ନେତା ଓ କର୍ମୀମାନେ ଗତ ୨୪ ବର୍ଷର ବିଜେଡି ସରକାର ସମୟରେ ହୋଇଥିବା ବିଭିନ୍ନ ଘଟଣାକୁ ନେଇ ଗତ ସରକାର ବିରୋଧରେ ମଧ୍ୟ ନାରାବାଜି କରିଥିଲେ । ବିଭିନ୍ନ ରାଜନୈତିକ ଦଳ ମଧ୍ୟରେ ମୁହାଁ ମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏମ୍ସ ପରିସରରେ ଏକ ପ୍ରକାର ଉତ୍ତେଜନାମୂଳକ ପରିସ୍ଥିତି ଦେଖାଦେଇଥିଲା।
ଏଭଳି ପରିସ୍ଥିତି ଏଡ଼ାଇବା ପାଇଁ କମିସନରେଟ ପୁଲିସ ଏମ୍ସ ପରିସରରେ ୧୬୩ ଧାରା ଜାରି କରିଛନ୍ତି। ୧୦ରୁ ଅଧିକ ବିଜେଡି କର୍ମକର୍ତ୍ତାଙ୍କୁ ପୁଲିସ ହେପାଜତକୁ ନେଇଛି। ଏମ୍ସ ପରିସର ତଥା ବର୍ଣ୍ଣ ୱାର୍ଡକୁ ନିଷିଦ୍ଧାଞ୍ଚଳ ଘୋଷଣା କରାଯାଇଛି। ଏମ୍ସ ପରିସରକୁ ଖାଲି କରିବା ପାଇଁ ପୁଲିସ ନିର୍ଦ୍ଦେଶ ଦେଇଛି। ସୁରକ୍ଷାକୁ ଆଖି ଆଗରେ ରଖି ୩ ପ୍ଲାଟୁନ ଫୋର୍ସ ମଧ୍ୟ ମୁତୟନ କରାଯାଇଛି। ଅନ୍ୟ ପକ୍ଷରେ ରୋଗୀମାନଙ୍କ ସୁରକ୍ଷା ପାଇଁ ଏମ୍ସ ପରିସରରେ ବିକ୍ଷୋଭ, ନାରବାଜିକୁ ପୁଲିସ ବାରଣ କରିଛି। ପରିସ୍ଥିତି ନିୟନ୍ତ୍ରଣାଧୀନ ଥିବା ଜଣାପଡିଛି।
