ନୂଆଦିଲ୍ଲୀ : ଗତ କିଛି ଦିନରେ ସ୍ୱାମୀ ସ୍ତ୍ରୀକୁ ଓ ସ୍ତ୍ରୀ ସ୍ୱାମୀକୁ ନିର୍ମମ ଭାବେ ହତ୍ୟା କରିଥିବା ଘଟଣା ସାମ୍ନାକୁ ଆଣିଛି । ସୌରଭ-ମୁସ୍କାନ ହେଉ କିମ୍ବା ସୋନମ-ରାଜା ରଘୁବଂଶୀ ଉଭୟ ମାମଲା ହଇଚଇ ସୃଷ୍ଟି କରିଛି । ମାତ୍ର ନିକଟରେ ଫରିଦାବାଦରୁ ଆସିଥିବା ଏକ ମାମଲା ସଭିଁଙ୍କୁ ଆଶ୍ଚର୍ଯ୍ୟଚକିତ ସହ ଭୟଭୀତ କରିଛି । ଏଠାରେ ଜଣେ ଯୁବତୀଙ୍କ ହତ୍ୟାର ମାମଲା ସାମ୍ନାକୁ ଆସିଛି । ଉକ୍ତ ଯୁବତୀଙ୍କର ୨ ବର୍ଷ ପୂର୍ବରୁ ବିବାହ ହୋଇଥିଲା । ଶାଶୁ ଘର ଲୋକେ ତାଙ୍କୁ ହତ୍ୟା କରିବା ସହ ମୃତଦେହକୁ ଘରର ନିକଟ ଗଳିରେ ୧୦ ଫୁଟ୍ ଗାତ କରି ପୋତି ଦେଇଥିଲେ । ସେହି ରାସ୍ତାଟି ସର୍ବ ସାଧାରଣଙ୍କ ନିୟମିତ ଯିବା ଆସିବା ରାସ୍ତା ମଧ୍ୟ ।
ଯୌତୁକ ଓ ହତ୍ୟା ସହ ଜଡିତ ଏହି ମାମଲା ଫରୀଦାବାଦର ପଲ୍ଲା ଅଞ୍ଚଳର । ଉତ୍ତରପ୍ରଦେଶର ଶିକୋହାବାଦର ବାସିନ୍ଦା ତନୁଙ୍କ ବିବାହ ୨ ବର୍ଷ ପୂର୍ବେ ଫରୀଦାବାଦର ରୋଶନନଗରରେ ରହୁଥିବା ଅରୁଣଙ୍କ ସହ ହୋଇଥିଲା । ପରିବାର ଲୋକଙ୍କ ଅଭିଯୋଗ ଅନୁଯାୟୀ ତନୁଙ୍କ ଶାଶୁଘର ତାଙ୍କୁ ହଇରାଣ କରୁଥିଲେ । ଲଗାତାର ସୁନା ଓ ନଗଦ ଟଙ୍କା ପାଇଁ ମଧ୍ୟ ଦାବି କରୁଥିଲେ ।
ପୁଲିସ ଜେସିବି ସାହାଯ୍ୟରେ ୧୦ ଫୁଟ ଗାତ ଖୋଳି ତନୁଙ୍କ ମୃତଦେହ ଜବତ କରିବା ସହ ଯାଞ୍ଚ ପାଇଁ ପଠାଇଥିଲେ । ତନୁଙ୍କ ଶାଶୁଘର ଲୋକେ ତାଙ୍କ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି । ପରିବାରର ୪ ସଦସ୍ୟଙ୍କ ବିରୁଦ୍ଧରେ ହତ୍ୟାର ମୋକଦ୍ଦମା ରୁଜୁ ସହ ଗିରଫ କରାଯାଇ ପଚରାଉଚରା କରାଯାଉଛି ।
ତନୁଙ୍କ ଭଉଣୀଙ୍କ କହିବାନୁସାରେ ୨ ମାସ ପୂର୍ବରୁ ତନୁ ଘର ଛାଡି କେଉଁଆଡେ ପଳାଇଛନ୍ତି ବୋଲି ତାଙ୍କ ଶାଶୁଘର ଲୋକ କହିଥିଲେ । ସେହି ସମୟରେ ସେମାନଙ୍କୁ ସନ୍ଦେହ ହୋଇଥିଲା । ପୁଲିସ ନିକଟରେ ଅଭିଯୋଗ କରିଥିଲେ ।
ପୁଲିସ ଘଟଣାର ତଦନ୍ତ ଆରମ୍ଭ କରିବା ସହ ଗାତ ଖୋଳି ତନୁଙ୍କ ମୃତଦେହ ଉଦ୍ଧାର କରି ଥିଲା । ପଡୋଶୀ କହିଥିଲେ, ଘରର କୌଣସି କାମ ପାଇଁ ତନୁଙ୍କ ଶାଶୁଘର ଲୋକେ ଗାତ ଖୋଳିଥିଲେ ବୋଲି କହିଥିଲେ । ଏହାର ୨ ଦିନ ପରେ ତନୁଙ୍କ କେଉଁ ଆଡେ ଚାଲି ଯାଇଛି ବୋଲି ମଧ୍ୟ କହିଥିଲେ । ଫଳରେ ପଡୋଶୀ ଏହାକୁ ନେଇ ସନ୍ଦେହ କରିଥିଲେ । ପୁଲିସ ଘଟଣାର ତଦନ୍ତ ଜାରି ରଖିଛି ।
