ସମାଜ ଡିଜିଟାଲ ଡେସ୍କ: ନିକଟରେ ବିଶ୍ୱବ୍ୟାପି ୧୬୦୦କୋଟି ଅନଲାଇନ୍ ପାସୱାର୍ଡ ଲିକ୍ ହୋଇଥିବା ନେଇ ଅଭିଯୋଗ ହୋଇଛି । ସାଇବରନ୍ୟୁଜ୍ ଓ ଫୋର୍ବସର ରିପୋର୍ଟ ଅନୁଯାୟୀ ସୋସିଆଲ ମିଡ଼ିଆ ପ୍ଲାଟଫର୍ମ ଇ-ମେଲ୍, ଗୁଗଲ, ଫେସବୁକ୍ ଓ ଟେଲିଗ୍ରାମର ୟୁଜରନେମ୍, ଲଗ୍ ଇନ୍ ପାସୱାର୍ଡ ଭଳି ତଥ୍ୟ ଚୋରି ହୋଇଛି । ହ୍ୟାକର୍ସଙ୍କ ଦ୍ୱାରା ସୋସିଆଲ ମିଡ଼ିଆ ବ୍ୟବହାରକାରୀଙ୍କ ପାସୱାର୍ଡ ହ୍ୟାକ୍ କରାଯାଉଛି । କ୍ୟାକର୍ସମାନେ ଫୋନରୁ ଡାଟା ଏବଂ ପାସୱାର୍ଡ ଚୋରି କରି ଏହାକୁ ବ୍ୟବହାର କରୁଛନ୍ତି ଏବଂ ପରେ ଏହାକୁ ଡାର୍କ ୱେବସାଇଟରେ ବିକ୍ରି କରୁଛନ୍ତି । ଗୁଗଲ୍ ପକ୍ଷରୁ ଏସମ୍ପର୍କରେ ଏକ ପରାମର୍ଶ ଜାରି କରାଯାଇଥିଲା । ଯେଉଁଥିରେ ଇ-ମେଲ୍, ଫେସବୁକ୍ ଏବଂ ଅନ୍ୟାନ୍ୟ ସାମାଜିକ ପ୍ଲାଟଫର୍ମକୁ ହ୍ୟାକ୍ ହେବାରୁ ରୋକିବା ପାଇଁ କିଛି କଥା ଉପରେ ଗୁରୁତ୍ୱ ଦେବାକୁ ପଡିବ ।
ଏହାସହିତ ପାସୱାର୍ଡ ବଦଳରେ ପାସକୀ ବ୍ୟବହାର କରିବାକୁ କୁହାଯାଇଛି । ଆକାଉଣ୍ଟକୁ ସୁରକ୍ଷିତ ରଖିବା ପାଇଁ ଫେସବୁକ୍ ପାସକୀ ବ୍ୟବହାର କରିବାକୁ କହିଛି । ଆସନ୍ତୁ ଜାଣିବା କିପରି ଆପଣଙ୍କ ଫେସବୁକ୍ ଆକାଉଣ୍ଟକୁ ସୁରକ୍ଷିତ ରଖିବେ । ଆଣ୍ଡ୍ରଏଡ୍ ଏବଂ ଆଇଓଏସ୍ ବ୍ୟବହାରାରୀଙ୍କୁ ଫେସ୍ ବୁକ୍ ପାସକୀ ସହାୟତାରେ ଲକ୍ କରିବାକୁ ପରାମର୍ଶ ଦେଇଛି । ଏହି କ୍ଷେତ୍ରରେ ଆପଣଙ୍କୁ ଫେସବୁକରେ ଲଗଇନ୍ କରିବା ପାଇଁ ପାସୱାର୍ଡ ମନେ ରଖିବାକୁ ପଡିବ ନାହିଁ । ବ୍ୟବହାରକାରୀମାନେ ପାସକୀ ମାଧ୍ୟମରେ ସହଜରେ ଲଗଇନ୍ କରିପାରିବେ । ଏହା କେବଳ ହ୍ୟାକର୍ସଙ୍କଠାରୁ ଆକାଉଣ୍ଟକୁ ସୁରକ୍ଷା ଦେବ ନାହିଁ ବରଂ ମେଟା ପେ କୁ ମଧ୍ୟ ସୁରକ୍ଷିତ ରଖିବ ।
ପାସକୀ ଏକ ଆଧୁନିକ ଡିଜିଟାଲ ସୁରକ୍ଷା ପ୍ରଣାଳୀ । ଏହାକୁ ଓଟିପି ଲଗଇନ୍ ଅପେକ୍ଷା ଅଧିକ ସୁରକ୍ଷିତ ବୋଲି କୁହାଯାଉଛି । ପ୍ରତ୍ୟେକ ଆକାଉଣ୍ଟରେ ଲଗଇନ୍ ପାଇଁ ଏକ ଅନନ୍ୟ ଡିଜିଟାଲ କୀ ତିଆରି କରାଯାଏ । ଯାହାକୁ ହ୍ୟାକର୍ସମାନେ ଖୋଜିବା କଷ୍ଟକର । ଫଳରେ ଜଣେ ନିଜର ଆକାଉଣ୍ଟକୁ ହ୍ୟାକର୍ସଙ୍କଠାରୁ ସୁରକ୍ଷିତ ରଖିପାରିବ ।
ଆକାଉଣ୍ଟକୁ କିପରି ସୁରକ୍ଷିତ ରଖିବେ
ଅଜଣା ଆକାଉଣ୍ଟରୁ କୌଣସି ଲିଙ୍କ୍ ଉପରେ କ୍ଲିକ୍ କରନ୍ତୁ ନାହିଁ ।
ଦୁଇ-କାରକ ପ୍ରମାଣୀକରଣ ବ୍ୟବହାର କରିବାକୁ ନିଶ୍ଚିତ କରନ୍ତୁ ।
ଏକ ଦୃଢ ଓ ଅନନ୍ୟ ପାସୱାର୍ଡ ଦେବାକୁ ପ୍ରୟାସ କରନ୍ତୁ ।
ଆକାଉଣ୍ଟ ଲଗଇନ୍ ପାଇଁ ଟିପଚିହ୍ନ, ଫେସ୍ ସ୍କାନ୍ କିମ୍ବା ପିନ୍ ବ୍ୟବହାର କରନ୍ତୁ ।
