ଆସିବ ମହାପୁରୁଷ ଆଦର୍ଶ ଗାଁ ଯୋଜନା

ଭୁବନେଶ୍ବର: ମହାତ୍ମା ଗାନ୍ଧୀଙ୍କ ସହିତ ଏବଂ ଅନ୍ୟାନ୍ୟ ସଙ୍ଗଠନ ସହ ସାମିଲ ହୋଇ ଭାରତର ସ୍ବାଧୀନତା ସଂଗ୍ରାମୀରେ ଝାସ ଦେଇଥିବା ମହାପୁରୁଷଙ୍କ ଗାଁ ଏବେବି ଅବହେଳିତ। ସେହି ଛୋଟ ଗାଁଗୁଡ଼ିକର ବିକାଶ କରିବା ପାଇଁ ରାଜ୍ୟ ସରକାର ‘ମହାପୁରୁଷ ଆର୍ଦଶ ଗାଁ’ ନୂଆ ଯୋଜନା ଆଣିବାକୁ ଯାଉଛନ୍ତି ବୋଲି ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ମନ୍ତ୍ରୀ ରବି ନାରାୟଣ ନାଏକ କହିଛନ୍ତି।
ଶ୍ରୀ ନାଏକ କହିଥିଲେ, ମହାପୁରୁଷମାନଙ୍କ ଜନ୍ମ ଯେଉଁ ଗାଁରେ ହୋଇଥିଲା, ସେହି ଗାଁ ଓ ପଞ୍ଚାୟତ ଆଜି ବି ଅବହେଳିତ ହୋଇ ରହିଛି। ଗାଁର ଉନ୍ନତି ପାଇଁ ପଞ୍ଚାୟତିରାଜ ବିଭାଗ ପକ୍ଷରୁ ‘ମହାପୁରୁଷ ଆଦର୍ଶ ଗାଁ’ ଏକ ନୂଆ ଯୋଜନା ଆଣିବାକୁ ପ୍ରସ୍ତୁତି ଚାଲିଛି। ସ୍ୱାଧୀନତା ସଂଗ୍ରାମ ସହିତ ଜଡ଼ିତ ୧୦୦ରୁ ୧୫୦ ଗ୍ରାମକୁ ‘ମହାପୁରୁଷ ଆଦର୍ଶ ଗାଁ’ ଯୋଜନାରେ ସାମିଲ କରି ବିକଶିତ କରାଯିବ। ଗ୍ରାମଗୁଡ଼ିକର ଭିତ୍ତିଭୂମି ଏବଂ ଅନ୍ୟାନ୍ୟ ସୁବିଧାର ଉନ୍ନତି ଉପରେ ଧ୍ୟାନ ଦିଆଯିବ। ଏହି ଗାଁଗୁଡ଼ିକ ଐତିହାସିକ ଭାବରେ ଗୁରୁତ୍ୱପୂର୍ଣ୍ଣ; କିନ୍ତୁ ଅବହେଳିତ ଅବସ୍ଥାରେ ରହିଛି। ଗାଁର ପୁନରୁଦ୍ଧାର ପାଇଁ ପଦକ୍ଷେପ ସ୍ବରୂପ ରାସ୍ତା, ପାନୀୟ ଜଳ, ଜଳସେଚନ, ଶିକ୍ଷା ଏବଂ ସ୍ୱାସ୍ଥ୍ୟସେବା ସୁବିଧାର ଉନ୍ନତି ଉପରେ ଧ୍ୟାନ ଦିଆଯିବ। ଗ୍ରାମଗୁଡ଼ିକର ଦ୍ରୁତ ବିକାଶ ସୁନିଶ୍ଚିତ କରିବା ପାଇଁ ୯ରୁ ୧୦ଟି ବିଭାଗ ନିଜ ନିଜର ଯୋଗଦାନ ଦେବେ। ସମ୍ପୃକ୍ତ ବିଭାଗଗୁଡ଼ିକ ମିଳିତ ଭାବରେ କାର୍ଯ୍ୟ କରିବେ ବୋଲି ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ମନ୍ତ୍ରୀ ସ୍ପଷ୍ଟ କରିଛନ୍ତି।