ଭୁବନେଶ୍ୱର : ଯାଜପୁର ଜିଲା କଳିଙ୍ଗନଗରରେ ୨୪ ଶିଳ୍ପ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ ମୋହାନ ଚରଣ ମାଝୀ । ମୋଟ୍ ୧ ଲକ୍ଷ ୧୫ ହଜାର କୋଟି ଟଙ୍କା ପୁଞ୍ଜିନିବେଶ ସହ ଏହି ୨୪ ପ୍ରକଳ୍ପରେ ୩୬ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ । ମୁଖ୍ୟମନ୍ତ୍ରୀ ୨୦ଟି ପ୍ରକଳ୍ପର ଶିଳାନ୍ୟାସ ଓ ୪ଟି ନୂତନ ପ୍ରକଳ୍ପର ଉଦ୍ଘାଟନ କରିଛନ୍ତି । ଯାଜପୁରରେ ପ୍ରାୟ ୪୯ ହଜାର କୋଟି ଟଙ୍କାର ପ୍ରକଳ୍ପର ଉଦ୍ଘାଟନ ଓ ପ୍ରାୟ ୬୬ ହଜାର କୋଟି ଟଙ୍କାର ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ହୋଇଛି ।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ଏହି କାର୍ଯ୍ୟକ୍ରମ ଶିଳାନ୍ୟାସ କି ଉଦ୍ଘାଟନ ନୁହେଁ, ଏହା ସମୃଦ୍ଧ ଓଡିଶାର ଭବିଷ୍ୟତ ନିର୍ମାଣ । ଏସବୁ ପ୍ରକଳ୍ପ ଯୋଗୂଁ ୩୬ ହଜାର ନିଯୁକ୍ତି ସୁଯୋଗ ସୃଷ୍ଟି ହୋଇଛି । ଏକ କେବଳ ସଂଖ୍ୟା ନୁହେଁ ପ୍ରତ୍ୟେକ ନିଯୁକ୍ତିର ଅର୍ଥ ଗାଁର ଯୁବକଙ୍କୁ ଆଉ ବାହାରକୁ ଯିବାକୁ ପଡିବ ନାହିଁ । ରାଜ୍ୟରେ ନିଯୁକ୍ତିର ଏକ ନୂଆ ଲହର ସୃଷ୍ଟି ହେବ । ସରକାରଙ୍କ ଦୃଢ ଇଚ୍ଛା ଶକ୍ତି ଯୋଗୁଁ କଳିଙ୍ଗନଗରରେ ୨୦ଟି ଶିଳ୍ପର ଶିଳାନ୍ୟାସ କରାଗଲା । ୧୧୩ ଦିନ ମଧ୍ୟରେ ଦେଇଥିବା ପ୍ରତିଶ୍ରୁତିକୁ ସରକାର ପୂରଣ କରିଛନ୍ତି । ଯେଉଁ ସମସ୍ତ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ ହେଲା, ତାହା ମେକ୍-ଇନ୍-ଓଡିଶା କନ୍କ୍ଲେଭରେ ସ୍ୱାକ୍ଷରିତ ହୋଇଥିଲା । ଏହି ପ୍ରକଳ୍ପ ଦ୍ୱାରା ଲକ୍ଷାଧିକ ଓଡିଆ ଯୁବକ ଯୁବତୀ ନିଜ ରାଜ୍ୟର ମାଟିରେ ନିଜ ସ୍ୱପ୍ନ ପୂରଣ କରି ପାରିବେ । ଏହା କେବଳ ଚାକିରି ନୁହେଁ ଯୁବ ବର୍ଗଙ୍କ ପାଇଁ ଏହା ସ୍ୱାଭିମାନ । ଏହା ନୂଆ ଓଡିଶାର ନୂଆ ପରିଚୟ ଏବଂ ସମୃଦ୍ଧ ଓଡିଶାର ଅୟମାରୟ । ରାଜ୍ୟର ଶିଳ୍ପ ବିକାଶର ଅନ୍ତୁଡିଶାଳ ହେଉଛି ଶିଳ୍ପ ସମୃଦ୍ଧ କଳିଙ୍ଗନଗର । ଶିଳ୍ପ ବିକାଶରେ ଅଗ୍ରଣୀ ଭୂମିକା ଗ୍ରହଣ କରି ରାଜ୍ୟ ପାଇଁ ଏହି ଅଞ୍ଚଳ ଏକ ଦୃଷ୍ଟାନ୍ତ ପାଲଟିଛି ।
