ପିପିଲି :ବାଲ୍ୟ ବିବାହ ରୋକିବା ପାଇଁ ସରକାରଙ୍କ ପକ୍ଷରୁ ବ୍ୟାପକ ସଚେତନ କରାଯିବା ସହ ବାଲ୍ୟ ବିବାହ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ତଥାବି କେତେକ ମନ୍ଦିର ଓ ଧର୍ମାନୁଷ୍ଠାନ ମାନଙ୍କରେ ବାଲ୍ୟ ବିବାହକୁ ପ୍ରୋତ୍ସାହନ ଦିଆଯାଉଥିବା ନେଇ ସାଧାରଣରେ ଅଭିଯୋଗ ହେଉଛି।
ଗତ ୧୬ ତାରିଖ ରାତିରେ ପିପିଲି ଥାନା ଅନ୍ତର୍ଗତ ତେଇସିପୁର ପଞ୍ଚାୟତ ଅଞ୍ଚଳରେ ଜଣେ ନାବାଳିକାର ବିବାହ ହୋଇଥିବା ବେଳେ ପୁଲିସ ସହଯୋଗରେ ପିପିଲି ସିଡିପିଓଙ୍କ କାର୍ଯ୍ୟାଳୟର କର୍ମଚାରୀ, ଚାଇଲ୍ଡ ହେଲ୍ପ ଲାଇନ ସଦସ୍ୟା ମାନେ ଉକ୍ତ ନାବାଳିକାକୁ ଉଦ୍ଧାର କରିଛନ୍ତି। ୧୬ବର୍ଷ ୧୦ମାସ ବୟସର ଉକ୍ତ ନାବାଳିକାକୁ ଜିଲା ଶିଶୁ ମଙ୍ଗଳ କମିଟିଙ୍କ ନିକଟରେ ଉପସ୍ଥାପନ କରାଯିବା ପରେ ତାକୁ ଶିଶୁ ଯତ୍ନ ଅନୁଷ୍ଠାନରେ ରଖାଯାଇଥିବା ସଂପର୍କରେ ପୁରୀ ଜିଲା ଶିଶୁ ସୁରକ୍ଷା ଅଧିକାରୀ ମନୋଜ କୁମାର ତ୍ରିପାଠୀ ସୂଚନା ଦେଇଛନ୍ତି।
ତେଇସିପୁର ପଞ୍ଚାୟତର ଏକ ପ୍ରମୁଖ ଧାର୍ମିକ ଅନୁଷ୍ଠାନରେ ଉକ୍ତ ନାବାଳିକାର ବିବାହ ଗତ ୧୬ତାରିଖ ରାତିରେ ଜନୈକ ୧୯ ବର୍ଷର ପୁଅ ସହିତ ବୈଦିକ ରିତୀନିତି ଅନୁଯାଇ କରାଯାଇଥିଲା। ଉକ୍ତ ଧାର୍ମିର୍କ ଅନୁଷ୍ଠାନ ପକ୍ଷରୁ ଏନେଇ ଏକ ରସିଦ ମଧ୍ୟ କଟାଯାଇଥିବା ସୂଚନା ମିଳିଛି। ଏନେଇ ସିଡବ୍ଲୁସି ଙ୍କ ନିକଟରେ ଅଭିଯୋଗ ହେବାପରେ ଚାଇଲ୍ଡ ହେଲ୍ପ ଲାଇନ ସଦସ୍ୟା, ପିପିଲି ସିଡିପିଓଙ୍କ କାର୍ଯ୍ୟାଳୟର ସୁପରଭାଇଜର, ଅଙ୍ଗନୱାଡି କର୍ମୀ, ଆଶା କର୍ମୀ, ସ୍ଥାନୀୟ ଜନପ୍ରତିନିଧି ମାନେ ସାତଶଙ୍ଖ ଫାଣ୍ଡି ପୁଲିସ ସହାୟତାରେ ତେଇସିପୁର ପଞ୍ଚାୟତ ଅଞ୍ଚଳରୁ ଉକ୍ତ ନାବାଳିକାକୁ ତା’ର ସ୍ୱାମୀ ଘରୁ ଉଦ୍ଧାର କରିଥିଲେ।
ଏନେଇ ପିପିଲି ସିଡିପିଓ ରୂପାଲି ମିତ୍ରଙ୍କ ଲିଖିତ ଅଭିଯୋଗ ଉପରେ ପିପିଲି ଥାନାରେ ଏକ ମାମଲା ରୁଜୁ ହୋଇଥିବା ବେଳେ ଏସ୍ଆଇ ଭାସ୍କର ମାଣିଆ ଘଟଣାର ତଦନ୍ତ ଜାରି ରଖିଥିବା ସୂଚନା ମିଳିଛି। ତେବେ ଏହି ମାମଲାରେ ଅଦ୍ୟାବଧି କାହାରିକୁ ଗିରଫ କରାଯାଇନଥିବା ଜଣାଯାଇଛି। ଏହି ଘଟଣାଟି ପିପିଲି ଅଞ୍ଚଳରେ ଚର୍ଚ୍ଚାର ପ୍ରସଙ୍ଗ ପାଲଟିଛି।
