ଡେସ୍କ: ଏକ ସାଧାରଣତନ୍ତ୍ର ଭାବରେ ଭାରତର ୭୫ ତମ ବର୍ଷ ପୂର୍ତ୍ତି ଏବଂ ଭାରତର ସମ୍ବିଧାନ ଗ୍ରହଣକୁ ପାଳନ କରିବା ପାଇଁ ନ୍ୟାୟ ବିଭାଗ ‘ଆମ ସମ୍ବିଧାନ ସମ୍ମାନ’ ଶୀର୍ଷକ ଏକ ବର୍ଷବ୍ୟାପୀ ଦେଶବ୍ୟାପୀ ଅଭିଯାନ କାର୍ଯ୍ୟକାରୀ କରୁଛି । ୨୦୨୪ ଜାନୁଆରୀ ୨୪ ତାରିଖରେ ଉପରାଷ୍ଟ୍ରପତି ଏହି ଅଭିଯାନର ଶୁଭାରମ୍ଭ କରିଥିଲେ। ପରେ ରାଜସ୍ଥାନର ବିକାନେର, ଉତ୍ତରପ୍ରଦେଶର ପ୍ରୟାଗରାଜ ଓ ଆସାମର ଗୌହାଟୀରେ ତିନୋଟି ଆଞ୍ଚଳିକ କାର୍ଯ୍ୟକ୍ରମ ଆୟୋଜନ କରାଯାଇଛି। ଭାରତୀୟ ସମ୍ବିଧାନରେ ଥିବା ନୀତି ପ୍ରତି ଆମର ସାମୂହିକ ପ୍ରତିବଦ୍ଧତାକୁ ଦୋହରାଇବା ଏବଂ ଆମ ଦେଶକୁ ବାନ୍ଧି ରଖିଥିବା ମିଳିତ ମୂଲ୍ୟବୋଧକୁ ପାଳନ କରିବା ଏହି ଅଭିଯାନର ଉଦ୍ଦେଶ୍ୟ। ଆମ ସମ୍ବିଧାନ ହମାରା ସମ୍ମାନ ପୋର୍ଟାଲ ସମ୍ପର୍କରେ କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ଅର୍ଜୁନ ରାମ ମେଘୱାଲ ଶୁକ୍ରବାର ଲୋକସଭାରେ ଏକ ଲିଖିତ ଉତ୍ତରରେ ଏହି ସୂଚନା ଦେଇଛନ୍ତି।
ପ୍ରୟାଗରାଜଠାରେ ଦ୍ୱିତୀୟ ଆଞ୍ଚଳିକ କାର୍ଯ୍ୟକ୍ରମରେ ଶୁଭାରମ୍ଭ ହୋଇଥିବା hamarasamvidhan.gov.in/ ୱେବ୍ ପୋର୍ଟାଲ ‘ଆମ ସମ୍ବିଧାନ ହମାରା ସମ୍ମାନ ପୋର୍ଟାଲ’ ସମ୍ବିଧାନ ଏବଂ ସେମାନଙ୍କ ଆଇନଗତ ଅଧିକାର ବିଷୟରେ ଜନସଚେତନତା ବୃଦ୍ଧି ପାଇଁ ଜ୍ଞାନର ଭଣ୍ଡାର ଭାବରେ କାର୍ଯ୍ୟ କରେ। ଏହା ବ୍ୟତୀତ, ଏହି ଅଭିଯାନ ମାଇଗଭ ସହଯୋଗରେ ଆୟୋଜିତ ଅନଲାଇନ୍ ପ୍ରତିଯୋଗିତା ମାଧ୍ୟମରେ ଗୁରୁତ୍ୱପୂର୍ଣ୍ଣ ଜନସଂପୃକ୍ତି ସୃଷ୍ଟି କରିଛି, ଯାହା ନାଗରିକମାନଙ୍କୁ ସାମ୍ବିଧାନିକ ଅଧିକାର ଏବଂ କର୍ତ୍ତବ୍ୟ ବିଷୟରେ ସେମାନଙ୍କର ବୁଝାମଣାକୁ ଗଭୀର କରିବାକୁ ପ୍ରେରଣା ଦେଇଛି ବୋଲି ମନ୍ତ୍ରୀ କହିଛନ୍ତି।
ବର୍ତ୍ତମାନ ସୁଦ୍ଧା ଦେଶବ୍ୟାପୀ ‘ଆମ ସମ୍ବିଧାନ ହମାରା ସମ୍ମାନ’ ଅଭିଯାନ ଅଧୀନରେ ପଞ୍ଚ ପ୍ରାଣ କାର୍ଯ୍ୟକ୍ରମରେ ୧.୨୯ ଲକ୍ଷ ନାଗରିକ ଅଂଶଗ୍ରହଣ କରିଛନ୍ତି।
Comments are closed.