ସମାଜ ଡିଜିଟାଲ ଡେସ୍କ: ଲଗାତର ୯ମ ଥର ଲାଗି ରେପୋରେଟ୍ ଅର୍ଥାତ ସୁଧ ହାରକୁ ଅପରିବର୍ତ୍ତିତ ରଖିଛି ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ)। ୩ ଦିନ ଧରି ଚାଲିଥିବା ମୁଦ୍ରା ନୀତି କମିଟି(ଏମପିସି) ବୈଠକରେ ରେପୋରେଟ୍କୁ ପୂର୍ବପରି ୬.୫% ରଖିବାକୁ ଆରବିଆଇ ପକ୍ଷରୁ ନିଷ୍ପତ୍ତି ନିଆଯାଇଛି। ଗୁରୁବାର ଆରବିଆଇ ଗଭର୍ନର ଶକ୍ତିକାନ୍ତ ଦାସ ଏ ସମ୍ପର୍କରେ ସୂଚନା ଦେଇଛନ୍ତି। ସେ କହିଛନ୍ତି ଯେ, ଏମପିସିରେ ଅଗଷ୍ଟ ୬, ୭ ଏବଂ ୮ ତାରିଖରେ ହୋଇଥିବା ବୈଠକରେ ୪ ଅନୁପାତ ୨ ବହୁମତ ଆଧାରରେ ନୀତିଗତ ସୁଧ ହାର ଅର୍ଥାତ ରେପୋରେଟକୁ ୬.୫%ରେ ଅପରିବର୍ତ୍ତିତ ରଖାଯିବାକୁ ନିଷ୍ପତ୍ତି ହୋଇଛି। ୨୦୨୩ ଫେବୃୟାରୀରୁ ରେପୋରେଟ୍ରେ କୌଣସି ପରିବର୍ତ୍ତନ କରାଯାଇ ନାହିଁ। ଫଳରେ ବର୍ତ୍ତମାନ ବିଭିନ୍ନ ବ୍ୟାଙ୍କରୁ ଋଣ ନେଇଥିବା ସାଧାରଣ ଜନତାଙ୍କ ଇଏମଆଇ ଉପରେ କୌଣସି ପ୍ରକାର ଅଶ୍ଵସ୍ତି ମିଳିବ ନାହିଁ।
ଶକ୍ତିକାନ୍ତ ଦାସ କହିଛନ୍ତି ଯେ, ବିଶ୍ଵସ୍ତରରେ ଅସ୍ଥିରତା ଦେଖିବାକୁ ମିଳିଛି। ମାତ୍ର ମୁଦ୍ରାସ୍ଫୀତିରେ ହ୍ରାସ ଘଟୁଛି। କେନ୍ଦ୍ରୀୟ ବ୍ୟାଙ୍କର ଅର୍ଥ ବ୍ୟବସ୍ଥା ସ୍ଥିତି ଆଧାରରେ ସୁଧ ହାର ଉପରେ ନିଷ୍ପତ୍ତି ନିଆଯାଉଛି। ଘରୋଇ ଅର୍ଥବ୍ୟବସ୍ଥାରେ ଦୃଢ଼ତା ବଜାୟ ରହିଛି। ସେବା ଏବଂ ନିର୍ମାଣ କ୍ଷେତ୍ରଗୁଡ଼ିକର ପ୍ରଦର୍ଶନ ବହୁତ ଭଲ ରହିଛି। ୨୦୨୪-୨୫ ଆର୍ଥିକ ବର୍ଷରେ ମୋଟ ଘରୋଇ ଉତ୍ପାଦ(ଜିଡିପି) ୭.୨% ରହିବ ବୋଲି ଆକଳନ କରାଯାଉଛି।
ସୂଚନାଯୋଗ୍ୟ, ଗତ ଜୁନରେ ମୁଦ୍ରା ନୀତି ବୈଠକ ଅନୁଷ୍ଠିତ ହୋଇଥିଲା। ସେଥିରେ ବି କମିଟିର ୬ ସଦସ୍ୟଙ୍କ ମଧ୍ୟରୁ ୪ ଜଣ ରେପୋରେଟ ଅପରିବର୍ତ୍ତିତ(୬.୫%) ରଖିବାକୁ ମତ ଦେଇଥିଲେ।
