ଶିଶୁ ମନ୍ଦିରରେ ବିଦ୍ୟାଳୟସ୍ତରୀୟ ଜ୍ଞାନ ବିଜ୍ଞାନ ମେଳା

ନାକଟିଦେଉଳ: ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ ଜଗନ୍ନାଥ ପ୍ରସାଦ ସ୍ଥିତ ସରସ୍ବତୀ ଶିଶୁ ମନ୍ଦିରରେ ସୋମବାର ଦିନ ବିଦ୍ୟାଳୟ ସ୍ତରୀୟ ଜ୍ଞାନ ବିଜ୍ଞାନ ମେଳା ଅନୁଷ୍ଠିତ ହୋଇଯାଇଛି  l ଉକ୍ତ ଜ୍ଞାନ ବିଜ୍ଞାନ ମେଳକୁ ପରିଚାଳନା କମିଟିର କୋଷାଧ୍ୟକ୍ଷ ତରୁଣ କୁମାର ମେହେର ପ୍ରାରମ୍ଭରେ ଉଦଘାଟନ କରିଥିଲେ । ଏଥିରେ ଶିଶୁମାନଙ୍କୁ ତିନୋଟି ବର୍ଗରେ ଭାଗ କରାଯାଇଥିଲା । ପ୍ରଥମ, ଦ୍ୱିତୀୟ ଓ ତୃତୀୟ ଶ୍ରେଣୀକୁ ନେଇ ପ୍ରାଥମିକ ବର୍ଗ। ସେମାନେ ବିଭିନ୍ନ ବିଷୟରେ ପ୍ରକଳ୍ପ ପ୍ରଦର୍ଶନ କରିଥିଲେ । ସେମାନଙ୍କ ମଧ୍ୟରୁ ଶ୍ରେଣୀ ଅନୁଯାୟୀ ଶ୍ରେଷ୍ଠ ତିନିଜଣ ପ୍ରତିଯୋଗୀମାନଙ୍କୁ ପ୍ରଥମ, ଦ୍ୱିତୀୟ, ତତୀୟ ସ୍ଥାନ ପାଇଁ ଚୟନିତ କରାଯାଇଛି ।ଏହି ବର୍ଗରେ ମୋଟ୍  ୯୨  ଜଣ ଶିଶୁ ଅଂଶଗ୍ରହଣ କରିଥିଲେ। ଚତୁର୍ଥ ଓ ପଞ୍ଚମ ଶ୍ରେଣୀକୁ ନେଇ ଶିଶୁ ବର୍ଗ।

ଏହି ବର୍ଗରେ ପାଞ୍ଚଟି ବିଷୟ ଦିଆଯାଇଥିଲା। ଆବର୍ଜନା ପ୍ରବନ୍ଧନ ଉପରେ ଆଧାରିତ ନମୁନା, ଯାତାୟାତ ସାଧନ ଉପରେ ଆଧାରିତ ନମୁନା, ଜଳ ସଂରକ୍ଷଣ ଉପରେ ଆଧାରିତ ନମୁନା, ସରଳଯନ୍ତ୍ର ଉପରେ ଆଧାରିତ ନମୁନା ଓ ନୂତନ ପ୍ରୟୋଗ ବା ନମୁନା। ଏହି ପାଞ୍ଚଟି ବିଷୟରେ ମୋଟ୍ ୪୯ ଜଣ  ଶିଶୁ ଅଂଶଗ୍ରହଣ କରିଥିଲେ । ପ୍ରତ୍ୟେକ ବିଷୟରୁ ପ୍ରଥମ, ଦ୍ୱିତୀୟ ଓ ତୃତୀୟ ଏହିପରି ତିନିଜଣ କୃତୀ ଛାତ୍ରଛାତ୍ରୀଙ୍କୁ ଚୟନିତ କରାଯାଇଛି । ଠିକ୍ ସେହିପରି ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଶିଶୁମାନଙ୍କୁ ନେଇ  ବାଲବର୍ଗ। ଏହି ବର୍ଗରେ ଗୋଟିଏ ବିଷୟ  ନୂତନ ପ୍ରୟୋଗ ବା ନମୁନା । ତାହା ଉପରେ ଶିଶୁମାନେ ପ୍ରକଳ୍ପ ପ୍ରଦର୍ଶନ କରି କୃତୀ ତିନି ଜଣଙ୍କୁ ଚୟନ କରାଯାଇ ପ୍ରଥମ, ଦ୍ବିତୀୟ ଓ ତୃତୀୟ ରେ ସ୍ଥାନ ପ୍ରଦାନ କରାଯାଇଛି । ଏହି ବର୍ଗରେ ମୋଟ୍ ୨୧ଜଣ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ଠିକ୍ ସେହିପରି ଗଣିତ ପ୍ରକଳ୍ପ ପ୍ରଦର୍ଶନ ଉପରେ ପ୍ରାଥମିକ ବର୍ଗରେ ୩ ଜଣ,ଶିଶୁ ବର୍ଗରେ ୮ ଜଣ ଓ ବାଲ୍ ବର୍ଗରେ ୧୧ ଜଣ ଶିଶୁ ଅଂଶଗ୍ରହଣ କରିଥିଲେ। ତତ୍ ସହିତ ବୈଦିକ ଗଣିତ ପ୍ରଶ୍ନମଞ୍ଚ ଶିଶୁ ବର୍ଗ ଓ ବାଲ୍ ବର୍ଗରେ ୬ ଜଣ ଶିଶୁ କୃତକାର୍ଯ୍ୟ ହୋଇଥିବା ବେଳେ ବିଜ୍ଞାନ ପ୍ରଶ୍ନମଞ୍ଚରେ ମଧ୍ୟ ୬ ଜଣ ଶିଶୁ କୃତକାର୍ଯ୍ୟ ହୋଇଥିଲେ । ଏହି ଜ୍ଞାନ ବିଜ୍ଞାନ ମେଳାରେ ପ୍ରଥମ ଶ୍ରେଣୀଠାରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ୍ ୨୫୪ ଜଣ ଶିଶୁ ଅଂଶଗ୍ରହଣ କରିଥିବା ବେଳେ ଶିଶୁ ବାଟିକା ବିଭାଗର ୨୬ ଜଣ ଶିଶୁ ଅଂଶଗ୍ରହଣ କରିଥିଲେ।