କଳାପଥର: କଟକ ଜିଲ୍ଲା ବାଙ୍କି ଉପଖଣ୍ଡ କଳାପଥର ଡାକ୍ତରଖାନାର ଦୂରବସ୍ଥା ଦିନକୁ ଦିନ ବୃଦ୍ଧି ପାଉଥିବା ବେଳେ ଏହାକୁ ନେଇ ସ୍ଥାନୀୟ ଲୋକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଉଛି। ସ୍ଥାୟୀ ଡାକ୍ତର କେହି ନଥିବା ବେଳେ ରୋଗୀମାନେ ଫାର୍ମାସିଷ୍ଟ ନଚେତ ବାହାରୁ ଆସି କ୍ଲିନିକ୍ ଖୋଲିଥିବା ଡାକ୍ତରମାନଙ୍କ ଉପରେ ନିର୍ଭର କରନ୍ତି। ରାତ୍ରୀରେ ଗୁରୁତର ରୋଗୀ କେହି ଆସିଲେ ସେବା ଯୋଗାଇବାକୁ କେହି ଡାକ୍ତରଖାନା ପରିସରରେ ରୁହନ୍ତି ନାହିଁ । ପରିବେଶ ପରିଷ୍କାର ଓ ପରିଚ୍ଛନ୍ନତା କଥା କହିଲେ ନସରେ। ଡାକ୍ତରଖାନାର ନାମରେ ଜାଗାବାଡି ରେକର୍ଡ ଭୁକ୍ତ ନ ଥିବାରୁ ଅଞ୍ଚଳର ଶିକ୍ଷାବିତ ବୁଲାଉଥିବା ଜବରଦଖଲକାରୀ ମାନେ ଡାକ୍ତରଖାନା ଜାଗାକୁ ଚତୁଃପାର୍ଶ୍ୱରୁ ଦଖଲ କରି ଚାଲିଛନ୍ତି।
ଏ ସଂକ୍ରାନ୍ତରେ କଳାପଥର ଆଞ୍ଚଳିକ ବିକାଶ ପରିଷଦ ଆବାହକ ପ୍ରତାପ କୁମାର ମହାପାତ୍ର ତଥା ସମାଜସେବୀ ନରେଶ କୁମାର ସାହୁ ଯୋଗେଶ ଚନ୍ଦ୍ର ସ୍ୱାଇଁଙ୍କ ସମେତ କଳାପଥର ସରପଞ୍ଚ କମଳା ସ୍ୱାଇଁ, ଧଳାପଥର ସରପଞ୍ଚ ନାରାୟଣ ସାହୁ ,ନୂଆଗାଁ ସରପଞ୍ଚ ମମତା ମହାପାତ୍ର ,କେନ୍ଦୁପଲ୍ଲୀ ସରପଞ୍ଚ ପ୍ରଦ୍ୟୁମ୍ନ କୁମାର ସୁବୁଦ୍ଧି, ଜଗନ୍ନାଥପୁର ସରପଞ୍ଚ ପ୍ରଭୁପ୍ରସାଦ ବେହେରା, ବଳଭଦ୍ରପୂର୍ ସରପଞ୍ଚ ସଂଧ୍ୟାରାଣୀ ସାହୁ, କାଳୀପୋଇ ସରପଞ୍ଚ ସୁବ୍ରତ କୁମାର ବେହେରାଙ୍କ ସମେତ ଶତାଧିକ ଜନସାଧାରଣ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ କୁମାର ମହାଲିଙ୍ଗ ଓ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି। ତୁରନ୍ତ କଳାପଥର ଡାକ୍ତରଖାନାକୁ ୩୦ଶଯ୍ୟା ବିଶିଷ୍ଟ ଆଞ୍ଚଳିକ ଡାକ୍ତରଖାନା ବା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଉନ୍ନୀତ କରିବାକୁ ଦାବି କରିଛନ୍ତି।
୨୦୦୯ରେ ସ୍ବାସ୍ଥ୍ୟ ବିଭାଗ କମିଶନର ତଥା ଶାସନ ସଚିବଙ୍କ ପ୍ରକୋଷ୍ଠରେ ପରିଷଦର ଆବାହକ ପ୍ରତାପ କୁମାର ମହାପାତ୍ରଙ୍କ ସହ ଏକ ଉଚ୍ଚସ୍ତରୀୟ ବୈଠକ ବସିଥିଲା। ଉକ୍ତ ବୈଠକରେ ଖୁବଶୀଘ୍ର ଏହାକୁ ୩୦ଶଯ୍ୟା ବିଶିଷ୍ଟ ଆଞ୍ଚଳିକ ଡାକ୍ତରଖାନାକୁ ଉନ୍ନୀତ କରାଯିବ ବୋଲି ବିଭାଗୀୟ ସଚିବ ପ୍ରତିଶ୍ରୁତି ଦେଇଥିଲେ। ମାତ୍ର ପରବର୍ତ୍ତୀ ପର୍ୟ୍ୟାୟରେ ଏହା ଉପରେ ବହୁବାର ଦାବି ଉପସ୍ଥାପନ କରାଗଲେ ମଧ୍ୟ ବିଭାଗ କୌଣସି ପଦକ୍ଷେପ ନେଇନାହିଁ। ତୁରନ୍ତ,ଏହାକୁ ୩୦ ଶଯ୍ୟା ବିଶଷ୍ଟ ଆଞ୍ଚଳିକ ଡାକ୍ତରଖାନାକୁ ଉନ୍ନୀତ କରିବା ସହ ଏଠାରେ ଟ୍ରମା ସେଣ୍ଟର୍ ଖୋଲିବାକୁ ଦୃଢ଼ ଦାବୀ କରାଯାଉଛି । ନଚେତ୍ ଖୁବଶୀଘ୍ର ଆନ୍ଦୋଳନ ତୀବ୍ର କରାଯିବ ବୋଲି ଆଞ୍ଚଳିକ ବିକାଶ ପରିଷଦର ଆବାହକ ପ୍ରତାପ କୁମାର ମହାପାତ୍ର ପ୍ରକାଶ କରିଛନ୍ତି।
