ନୀଳଗିରି: ସ୍ତ୍ରୀ ଓ ଦୁଇ ପୁଅକୁ ନିର୍ଦ୍ଦୁମ ପିଟିବା ପରେ ଅସହ୍ୟ ଯନ୍ତ୍ରଣା ଦେଉଥିଲେ ସ୍ୱାମୀ । ସ୍ୱାମୀର ଏଭଳି ଅକଥନୀୟ ନିର୍ଯାତନା ସହିନପାରି ଶେଷରେ ବିଷ ପିଇ ଜୀବନ ହାରିଛନ୍ତି ସ୍ତ୍ରୀ । ଏଭଳି ଅମାନବୀୟ ଘଟଣା ଘଟିଛି ବାଲେଶ୍ୱର ଜିଲା ଖନ୍ତାପଡା ଥାନା ଅଧୀନ ଅଳସୁଆ ଗାଁରେ । ଏହି ଘଟଣାକୁ ନେଇ ଗାଁରେ ଉତ୍ତେଜନା ଲାଗି ରହିଛି । ଗାଁର ସୁମନ୍ତ ବେହେରା(୪୫) କିଛିବର୍ଷ ପୂର୍ବେ ନୀଳଗିରି ଥାନା ବାଉଁଶବଣିଆ ଗାଁରେ ଘର କରି ରହି ଆସୁଥିଲା । ବାଉଁଶବଣିଆ ଛକରେ ଏକ ଷ୍ଟୁଡ଼ିଓ କରି ପରିବାର ପ୍ରତିପୋଷଣ କରିବାବେଳେ ଦୈନନ୍ଦିନ ସ୍ତ୍ରୀ ବବିତା (୩୮) ଓ ଦୁଇ ପୁଅଙ୍କୁ ନିର୍ୟାତନା ଦେଉଥିବା ଅଭିଯୋଗ ହୋଇଛି । ଗତ ଶନିବାର ରାତିରେ ସେ ଷ୍ଟୁଡ଼ିଓରୁ ଆସିବା ପରେ ଘର ବାହାରେ ସ୍ତ୍ରୀକୁ ଡାକିଥିଲେ ହେଁ କବାଟ ଖୋଲିବାରେ ସ୍ତ୍ରୀ ବିଳମ୍ବ କରିବାରୁ ନିସ୍ତୁକ ମାଡ଼ ମାରିଥିଲେ । ଏପରିକି ପୁଅ ଦୁଇଟିକୁ ମଧ୍ୟ ଘୋଷାଡ଼ି ପିଟିଥିବା ଅଭିଯୋଗ ହୋଇଛି । ବାରମ୍ବାର ଅସହ୍ୟ ଯନ୍ତ୍ରଣାରୁ ମୁକ୍ତି ପାଇଁ ମହିଳା ଜଣକ ଗତକାଲି ବିଷ ପିଇ ଦେଇଥିଲେ । ପଡ଼ୋଶୀ ତାଙ୍କୁ ପ୍ରଥମେ ନୀଳଗିରି ପରେ କଟକ ବଡ଼ଡାକ୍ତରଖାନାକୁ ସ୍ଥାନାନ୍ତର କରିଥିଲେ । ସେଠାରୁ ପୁଣି ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ହେଁ ମହିଳାଙ୍କ ମୃତ୍ୟୁ ଘଟିଛି ।
ସୋମବାର ରାତି ପ୍ରାୟ ସାଢ଼େ ୧୧ଟା ସମୟରେ ବାଉଁଶବଣିଆରେ ମହିଳାଙ୍କ ମରଶରୀର ପହଞ୍ଚିବା ପରେ ଗାଁରେ ଉତ୍ତେଜନା ଦେଖାଦେଇଛି । ନିଷ୍ଠୁର ସ୍ୱାମୀକୁ ଧରିବାକୁ ସହସ୍ରାଧିକ ଗାଁଲୋକେ ମେଳି କରିଥିବା ବେଳେ ସେ ଫେରାର ଅଛନ୍ତି । ଖବରପାଇ ମହିଳାଙ୍କ ବାପଘର ଲୋକେ ଭଦ୍ରକ ଜିଲା ବାସୁଦେବପୁର ନିକଟ ମନ୍ଦାରିରୁ ଆସି ପହଞ୍ଚିଛନ୍ତି । ସେହିପରି ଉତ୍ତେଜନା ଖବରପାଇ ନୀଳଗିରି ପୁଲିସ ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
