ଭୁବନେଶ୍ୱର: ଦକ୍ଷିଣ-ପଶ୍ଚିମ ମୌସୁମୀ ବାୟୁ ସାରା ରାଜ୍ୟକୁ ଅଗ୍ରସର ହୋଇନଥିବା ବେଳେ ତଥାପି ଏବେଠାରୁ ପନିପରିବା ଦର ବଢିବା ଲୋକଙ୍କୁ ବାଧୁଛି। ପିଆଜ ଦର ୫ଦିନ ମଧ୍ୟରେ କିଲୋଗ୍ରାମ୍ ପିଛା ପାଖାପାଖି ୧୦ଟଙ୍କା ବଢିଲାଣି। ଜୁନରେ ପିଆଜ କନ୍ଦାଉଥିବା ବେଳେ ପନିପରିବା ଦର ବଢିବା ହେତୁ ହାଣ୍ଡିଶାଳକୁ ମହଙ୍ଗା ମାଡ ହେବା ସହ ଖାଉଟିଙ୍କ ପକେଟକୁ ବାଧୁଛି। ସବୁ ପନିପରିବା ଦର ୫୦ଟଙ୍କାରେ ଉପରେ ରହିଛି ଏବଂ ଅଗଷ୍ଟ ୧୫ ପର୍ୟ୍ୟନ୍ତ ଦର କମିବା ସମ୍ଭାବନା କମ୍ ବୋଲି ପରିବା ବ୍ୟବସାୟୀ କହୁଛନ୍ତି। ସପ୍ତାହେ ତଳେ କଟକର ଛତ୍ରବଜାରରେ ପିଆଜ କିଲୋ ପ୍ରତି ୨୫ରୁ ୩୦ ଟଙ୍କା ରହିଥିଲା ଏବେ ଦର ୪୦ ଟଙ୍କାରେ ବିକ୍ରି ହେଉଛି। ବ୍ରହ୍ମପୁରରେ ପିଆଜ କିଲୋ ପ୍ରତି ୪୫ ଟଙ୍କା ଟପିଲାଣି। ସେହିପରି ଭୁବନେଶ୍ୱରରେ ପିଆଜ କିଲୋ ୩୫ରୁ ୪୦ ଟଙ୍କା ରହିଛି। ୟୁନିଟ ୧ର ବ୍ୟବସାୟୀମାନେ କହୁଛନ୍ତି ଯେ ରାଜ୍ୟକୁ ମହାରାଷ୍ଟ୍ର ନାସିକରୁ ପିଆଜ ଆସୁଛି। ସେଠାରୁ ଓଡ଼ିଶା ଆସିବାକୁ ୪ଦିନ ସମୟ ଲାଗୁଥିବାରୁ ଗରମ ଗୁଳୁଗୁଳି ପାଇଁ ପିଆଜ ସବୁ ନଷ୍ଠ ହୋଇଯାଉଛି। ନାସିକରେ ଦର ଉଚ୍ଚା ଥିବାରୁ ଓଡ଼ିଶା ଆସିବା ପାଇଁ କିଲୋଗ୍ରାମ୍ ପିଛା ସାଢେ ୪ଟଙ୍କା ଲାଗୁଛି। ଥିପାଇଁ ରାଜ୍ୟରେ ପିଆଜ ଦର ଅଧିକ ରହିଛି। ତେବେ ପରିବହନ ବ୍ୟବସ୍ଥା ଯୋଗୁ ବିଭିନ୍ନ ଜିଲାରେ ଦର ଭିନ୍ନ ଭିନ୍ନ ରହୁଛି।
