ଗୁରୁଡିଝାଟିଆ: ଆରତୀ କାରଖାନାରେ କାର୍ଯ୍ୟରତ ଥିବା ସମୟରେ ଗତକାଲି ଠିକା ଶ୍ରମିକ ସନାତନ ପାଢି(୫୫)ଙ୍କ ମୃତ୍ୟୁ ହୋଇଥିଲା। ତାଙ୍କ ପରିବାରର ଜଣେ ସଦସ୍ୟଙ୍କୁ ଚାକିରି ପ୍ରଦାନ କରାଯିବା ସହ ୨୧ ଲକ୍ଷ ଟଙ୍କାର ଆର୍ଥିକ ସହାୟତା ଦିଆଯିବ ବୋଲି ଆରତୀ କାରଖାନା କର୍ତ୍ତୃପକ୍ଷ ଲିଖିତ ପ୍ରତିଶ୍ରୁତି ଦେଇଛନ୍ତି। ଫଳରେ କାରଖାନା ଫାଟକରେ ବସିଥିବା ଧାରଣା ପ୍ରତ୍ୟାହୃତ ହୋଇଛି।
ପ୍ରକାଶଯୋଗ୍ୟ ଗତକାଲି ବିଳମ୍ବିତ ରାତିରେ କାରଖାନାରେ ଠିକା ଶ୍ରମିକ ଭାବେ ଯୋରନ୍ଦା ପଞ୍ଚାୟତ ହରିଡାଗହୀର ଗ୍ରାମର ସନାତନ ପାଢି ଦୁର୍ଘଟଣାର ଶିକାର ହୋଇ ଗୁରୁତର ହୋଇପଡିଥିଲେ। ଚିକିତ୍ସା ପାଇଁ କଟକର ଏକ ଘରୋଇ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ତାଙ୍କର ମୃତ୍ୟୁ ଘଟିଥିଲା। ଏହି ଖବର ପ୍ରଚାରିତ ହେବା ଫଳରେ ଆରତୀ କାରଖାନା ଠିକା କର୍ମଚାରୀ ସଂଘର କର୍ମକର୍ତ୍ତା, ହିନ୍ଦ ମଜଦୂର ସଂଘର କର୍ମକର୍ତ୍ତା ଓ ଯୋରନ୍ଦା ତଥା ସ୍ଥାନୀୟ ପଞ୍ଚାୟତର ଜନପ୍ରତିନିଧି ଏବଂ ପରିବାର ସଦସ୍ୟ କାରଖାନା ଫାଟକ ନିକଟରେ ଧାରଣାରେ ବସିଥିଲେ।
ଏହି ଧାରଣାକୁ ଉଠାଇବା ସହିତ ଆଲୋଚନା କରିବା ପାଇଁ ଆଠଗଡ ଅତିରିକ୍ତ ତହସିଲଦାର ଅଶୋକ କୁମାର ସ୍ୱାଇଁ, ଚୌଦ୍ୱାର ଏସଡିପିଓ ଉମାକାନ୍ତ ନାୟକ, ଖୁଣ୍ଟୁଣୀ ଥାନା ଅଧିକାରୀ ଭବାନୀ ଶଙ୍କର ଖୁଣ୍ଟିଆ, କାରଖାନାର ସଭାପତି ସୁଦୀପ୍ତ ପଲ, ବରିଷ୍ଠ ପ୍ରବନ୍ଧକ ସରୋଜ କୁମାର ଜେନା, ଉନ୍ନୟନ ଅଧିକାରୀ ଶରତ ନିଶାଙ୍କ, ମୃତ ଶ୍ରମିକଙ୍କ ପତ୍ନୀ ଗୀତାଞ୍ଜଳି ପାଢି, ଝିଅ ଶ୍ରଦ୍ଧାଞ୍ଜଳୀ ପାଢି, ଶ୍ରମିକନେତା ସନ୍ତୋଷ ବେହେରା, ସରପଞ୍ଚଙ୍କ ପ୍ରତିନିଧି ସୁବାସ ଚନ୍ଦ୍ର ବିଶ୍ୱାଳ, ପୂର୍ବତନ ସରପଞ୍ଚ ଲକ୍ଷ୍ମୀଧର ମହାନ୍ତି, ସରୋଜ ସ୍ୱାଇଁ, ଯୋରନ୍ଦା ପଞ୍ଚାୟତର ଜନପ୍ରତିନିଧି ଓ ଆରତୀ କାରଖାନା କର୍ମଚାରୀ ସଂଘର ପଦାଧିକାରୀ ସନ୍ତୋଷ କୁମାର ପ୍ରଧାନ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ।
ମୃତଦେହ ସତ୍କାର ପାଇଁ ତୁରନ୍ତ ଆର୍ଥିକ ସହାୟତା ପ୍ରଦାନ କରାଯାଇଥିଲା। ମୃତକଙ୍କ ପରିବାରକୁ ୨୧ଲକ୍ଷ ଟଙ୍କା ଆର୍ଥିକ ସହାୟତା ପ୍ରଦାନ ସହିତ ପରିବାର ଜଣକୁ ଚାକିରି ପ୍ରଦାନ ନିମନ୍ତେ ନିଷ୍ପତ୍ତି ନିଆଯିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
