ଭୁବନେଶ୍ବର: ଓଡ଼ିଶା ଯୁଗ୍ମ ପ୍ରବେଶିକା ପରୀକ୍ଷା (ଓଜେଇଇ)ର ଭାରପ୍ରାପ୍ତ ଅଧ୍ୟକ୍ଷ ଭାବେ ପ୍ରଫେସର ଦେବ ପ୍ରକାଶ ଶତପଥୀ ନିଯୁକ୍ତି ପାଇଛନ୍ତି। ଏହା ପୂର୍ବରୁ ସେ ଓଜେଇଇର ସଦସ୍ୟ ଥିଲେ। ଦୀର୍ଘ ବର୍ଷ ହେଲା ସଦସ୍ୟ ଥିବାରୁ ପରୀକ୍ଷା ପରିଚାଳନାରେ ତାଙ୍କର ଅଭିଜ୍ଞତା ରହିଛି, ତେଣୁ ଆଗାମୀ ଦିନରେ ଓଜେଇଇ ପରୀକ୍ଷା ସୂଚାରୁ ରୂପେ ନିର୍ବାହ କରିବେ ବୋଲି ଶ୍ରୀ ଶତପଥୀ ମତ ପ୍ରକାଶ କରିଛନ୍ତି। ଏହା ପୂର୍ବରୁ ପ୍ରଫେସର ପ୍ରବୀଣ କର ଓଜେଇଇ ଅଧ୍ୟକ୍ଷ ଭାବେ ଦାୟିତ୍ବ ନିର୍ବାହ କରୁଥିଲେ। ଶ୍ରୀ କର ବୀର ସୁରେନ୍ଦ୍ର ସାଏ ବୈଷୟିକ ବିଶ୍ବବିଦ୍ୟାଳୟର ପ୍ରଫେସର ଥିବାବେଳେ ତାଙ୍କୁ ଓଜେଇଇ ଅଧ୍ୟକ୍ଷ ନିଯୁକ୍ତି ଦିଆଯାଇଥିଲା।
ସୂଚନାଯୋଗ୍ୟ, ପ୍ରଫେସର କର ଫେବୃଆରୀରୁ ତାଙ୍କ ନିଜ ପଦବୀକୁ ଫେରିଥିବା ବେଳେ ଅଧ୍ୟକ୍ଷ ପଦ ଖାଲି ପଡ଼ିଥିଲା। ସାଧାରଣ ନିର୍ବାଚନ ନେଇ ଆଦର୍ଶ ଆଚରଣ ବିଧି ଲାଗୁ ହେବାଦ୍ବାରା ସରକାରଙ୍କ ପକ୍ଷରୁ ଅଧ୍ୟକ୍ଷ ପଦ ପୂରଣ କରାଯାଇ ପାରି ନଥିଲା। ଆଗକୁ ପରୀକ୍ଷା ଥିବାରୁ ଓଜେଇଇ ପକ୍ଷରୁ ବରିଷ୍ଠ ସଦସ୍ୟ ଶ୍ରୀ ଶତପଥୀଙ୍କୁ ଭାରପ୍ରାପ୍ତ ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଛି। ନିର୍ବାଚନ ସରିବା ପରେ ନୂଆ ଅଧ୍ୟକ୍ଷ ନିଯୁକ୍ତି ପାଇବା ସମ୍ଭାବନା ରହିଛି।
