ପର୍ଥ : ପରାଜୟ ଆଶଙ୍କାରେ ଥିବା ଭାରତ ଶେଷରେ ଦ୍ୱିତୀୟ ଟେଷ୍ଟରେ ଅଷ୍ଟ୍ରେଲିଆଠାରୁ ପରାସ୍ତ ହୋଇଛି । ଭାରତକୁ ୧୪୬ ରନରେ ପରାସ୍ତ କରି ଅଷ୍ଟ୍ରେଲିଆ ଟେଷ୍ଟ ଶୃଙ୍ଖଳାକୁ ୧-୧ରେ ବରାବର ରଖିବାରେ ସଫଳ ହୋଇଛି।
ବିଜୟ ପାଇଁ ୨୮୭ ରନର ପିଛା କରି ଭାରତ, ମଙ୍ଗଳବାର ୨ୟ ଟେଷ୍ଟର ପଞ୍ଚମ ଦିନରେ ୧୪୦ ରନ କରି ଅଲ ଆଉଟ ହୋଇଯାଇଥିଲା । ଫଳରେ ୪ ଟେଷ୍ଟ ମ୍ୟାଚ ବିଶିଷ୍ଟ ଶୃଙ୍ଖଳାର ୨ୟ ଟେଷ୍ଟରେ ଅଷ୍ଟ୍ରେଲିଆ ବିଜୟୀ ହେବା ପରେ ଶୃଙ୍ଖଳା ଏବେ ୧-୧ ସ୍ଥିତିରେ ରହିଛି।
ମଙ୍ଗଳବାର ପର୍ଥ ଟେଷ୍ଟର ପଞ୍ଚମ ଦିନରେ ଭାରତ ଦ୍ୱିତୀୟ ଇନିଂସର ଅପରାଜିତ ପାଳି ୧୧୨/୫ରୁ ଖେଳ ଆରମ୍ଭ କରିଥିଲା । ତେବେ ଆଉ ମାତ୍ର ୨୮ ରନରେ ୫ ୱିକେଟ ହରାଇ ଭାରତ ପରାସ୍ତ ହୋଇଥିଲା । ହନୁମା ବିହାରୀ (୨୮ ରନ) ସଂଗ୍ରହ କରି ଷ୍ଟାର୍କଙ୍କ ବଲରେ ଆଉଟ ହୋଇଥିଲେ। ଋଷଭ ପନ୍ତ ୩୦ ରନ ସଂଗ୍ରହ କରି ଆଉଟ ହୋଇଥିଲେ । ସେ ନାଥନ ଲାୟନଙ୍କ ବଲରେ ପିଟର ହ୍ୟଣ୍ଡସକମଙ୍କ ଦ୍ୱାରା କ୍ୟାଚ ଆଉଟ ହୋଇଥିଲେ । ସେହିପରି ଉମେଶ ଯାଦବ ୨ ରନ କରି ଆଉଟ ହୋଇଥିଲେ । ପରେ ଈଶାନ୍ତ ଶର୍ମା, ମହମ୍ମଦ ସାମି ଏବଂ ଯଶପ୍ରୀତ ବୁମରା କୌଣସି ରନ ନ କରି ଆଉଟ ହୋଇଥିଲେ। ଭାରତର ଶେଷ ୫ଟି ୱିକେଟ ମାତ୍ର ୨୮ ରନରେ ପଡିଥିଲା । ଅଷ୍ଟ୍ରେଲିଆ ପକ୍ଷରୁ ମିଚେଲ ଷ୍ଟାର୍କ ଓ ନାଥନ ଲାୟନ ୩ଟି ଲେଖାଁଏ ୱିକେଟ ନେଇଥିବା ବେଳେ ହେଜେଲଉଡ ଏବଂ କମ୍ବିନ୍ସଙ୍କୁ ୨ଟି ଲେଖାଁଏ ୱିକେଟ ନେଇଥିଲେ । ନାଥନ ଲାୟନ ପ୍ଲେୟାର ଅଫ ଦ ମ୍ୟାଚ ବିବେଚିତ ହୋଇଛନ୍ତି।
ଚୁଡାନ୍ତ ସ୍କୋର ; ଅଷ୍ଟ୍ରେଲିଆ ପ୍ରଥମ ଇନିଂସ-୩୨୬ , ୨ୟ ଇନିଂସ ୨୪୩
ଭାରତ ପ୍ରଥମ ଇନିଂସ-୨୮୩ , ୨ୟ ଇନିଂସ ୧୪୦
