ଅହମ୍ମଦାବାଦ୍: ଦୀର୍ଘ ୨୦ବର୍ଷ ପରେ ଆଜି ପୁଣିଥରେ ଦିନିକିଆ ବିଶ୍ବକପ ଫାଇନାଲରେ ଭାରତ ଏବଂ ଅଷ୍ଟ୍ରେଲିଆ ମୁହାଁମୁହିଁ ହେବାକୁ ଯାଉଛନ୍ତି। ୨୦୦୩ରେ ଦକ୍ଷିଣଆଫ୍ରିକାର ଜୋହାନ୍ସବର୍ଗରେ ଆୟୋଜିତ ବିଶ୍ବକପ ଫାଇନାଲରେ ସୌରଭ ଗାଙ୍ଗୁଲିଙ୍କ ନେତୃତ୍ବାଧୀନ ଭାରତୀୟ ଦଳକୁ ୧୨୫ରନରେ ହରାଇ ରିକି ପଣ୍ଟିଂଙ୍କ କଙ୍ଗାରୁ ଦଳ ବିଶ୍ବକପ ଟ୍ରଫି ହାତେଇ ନେଇଥିଲା। ୨୦୦୩ ଫାଇନାଲର ପ୍ରତିଶୋଧ ନେବାକୁ ଆଜି ଭାରତ ନିକଟରେ ସୁବର୍ଣ୍ଣ ସୁଯୋଗ ରହିଛି। ଭାରତୀୟ ଦଳର ଉଭୟ ବ୍ୟାଟସମ୍ୟାନ ଓ ବୋଲର ଜବରଦସ୍ତ ଫର୍ମରେ ରହିଛନ୍ତି। ଭାରତକୁ କୌଣସି ଦଳ ପରାସ୍ତ କରିବାରେ ସଫଳ ହୋଇନାହିଁ। ଆସନ୍ତାକାଲି ଫାଇନାଲ ଜିତି ଭାରତ ଅପରାଜେୟ ଭାବେ ଟ୍ରଫି ଜିତିବା ଲକ୍ଷ୍ୟରେ ରହିଛି। ହାଇଭୋଲଟେଜ ଫାଇନାଲ ମ୍ୟାଚରେ କିଏ ଟ୍ରଫି ହାତେଇବ ତାହାକୁ ନେଇ ସାରା ବିଶ୍ବର ନଜର ରହିଛି।
Welcome to the live coverage of the CWC 2023 Final match between India and Australia. https://t.co/E9SVCxonov… #INDvAUS #CWC23 #Final
— Samaja Live (@samajalive) November 19, 2023
ଗୁଜରାଟର ମୋଟେରାସ୍ଥିତ ନରେନ୍ଦ୍ର ମୋଦୀ ଷ୍ଟାଡିୟମରେ ଉଭୟ ଦଳ ମଧ୍ୟରେ ଏହି ମହାମୁକାବିଲା ହେବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଷ୍ଟାଡିଅମରେ ପହଂଚିଛନ୍ତି। ଚଳିତ ବିଶ୍ବକପରେ ଅପରାଜେୟ ଭାରତ ଏବଂ ସର୍ବାଧିକ ୫ଥର ବିଶ୍ବକପ ଜିତିଥିବା ଅଷ୍ଟ୍ରେଲିଆ ମଧ୍ୟରେ ବିଶ୍ବକପ ଟ୍ରଫି ପାଇଁ ଲଢେଇ ହେବ। ଭାରତ ତୃତୀୟ ଥର ଓ ଅଷ୍ଟ୍ରେଲିଆ ଦଳ ୬ଷ୍ଠ ଥର ବିଶ୍ବକପ ଟ୍ରଫି ଜିତିବା ଲକ୍ଷ୍ୟ ରଖିଛନ୍ତି। କ୍ୟାରିୟରର ଶେଷ ସୋପାନରେ ପହଞ୍ଚିଥିବା ଅଧିନାୟକ ରୋହିତ ଶର୍ମା ବିଶ୍ବକପ ଜିତି ସ୍ବପ୍ନ ସାକାର କରିବା ଆଶାରେ ରହିଛନ୍ତି। ସେମିଫାଇନାଲରେ ଭାରତ ୭୦ରନରେ ନ୍ୟୁଜିଲାଣ୍ଡକୁ ଓ ଅଷ୍ଟ୍ରେଲିଆ ୩ ୱିକେଟରେ ଦକ୍ଷିଣ ଆଫ୍ରିକାକୁ ପରାସ୍ତ କରି ଫାଇନାଲରେ ପହଞ୍ଚିଛନ୍ତି।
