ଦୁବାଇ: ଭାରତୀୟ ଓପନର୍ ଶୁବମାନ ଗିଲ୍ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି)ର ସେପ୍ଟେମ୍ବର ମାସ ନିମନ୍ତେ ଶ୍ରେଷ୍ଠ କ୍ରିକେଟର୍ ଭାବେ ମନୋନୀତ ହୋଇଛନ୍ତି। ଭାରତୀୟ ଦଳର ଦ୍ରୁତ ବୋଲର ମହମ୍ମଦ ସିରାଜ୍ ଓ ଇଂଲଣ୍ଡ କ୍ରିକେଟ୍ ଦଳର ଓପନର୍ ଡାୱିଡ ମାଲାନଙ୍କୁ ପଛରେ ପକାଇ ଶୁବମାନ ଶ୍ରେଷ୍ଠ କ୍ରିକେଟର୍ ହେବାର ସୌଭାଗ୍ୟ ହାସଲ କରିଛନ୍ତି। ଚଳିତବର୍ଷରେ ଦ୍ବିତୀୟଥର ପାଇଁ ଶୁବମାନ ମାସ ଶ୍ରେଷ୍ଠ କ୍ରିକେଟର୍ ପୁରସ୍କାର ହାସଲ କରିବାକୁ େଯାଗ୍ୟ ବିବେଚିତ ହୋଇଛନ୍ତି।
ଅଷ୍ଟ୍ରେଲିଆ ବିପକ୍ଷ ଶୃଙ୍ଖଳା ଓ ଏସିଆ କପ୍ରେ ଚମତ୍କାର ପ୍ରଦର୍ଶନ କରିଥିବାରୁ ଶୁବମାନଙ୍କୁ ଏହି ପୁରସ୍କାର ମିଳିଛି। ଶୁବମାନ୍ ଚଳିତବର୍ଷ ବର୍ତ୍ତମାନ ସୁଦ୍ଧା ୧୨୩୦ ରନ୍ ସଂଗ୍ରହ କରିଛନ୍ତି ସେଥିମଧ୍ୟରେ ୫ଟି ଶତକ ରହିଛି। ସୂଚନାଥାଉ କି କ୍ରିକେଟ୍ ବିଶ୍ବକପ୍ ଆରମ୍ଭ ହେବା ପୂର୍ବରୁ ଗିଲ୍ ଡେଙ୍ଗୁରେ ପୀଡ଼ିତ ହୋଇଥିଲେ। ଫଳରେ ସେ ଭାରତ ତରଫରୁ ପ୍ରଥମ ଦୁଇଟି ମ୍ୟାଚ୍ ଖେଳିପାରି ନାହାନ୍ତି। ଚେନ୍ନଇରେ ଚିକିତ୍ସିତ ହେବା ପରେ ଗିଲ୍ ଅହମ୍ମଦାବାଦ୍ରେ ପହଞ୍ଚି ଗୁରୁବାର ଅଭ୍ୟାସ କରିଥିଲେ। ଭାରତ ଓ ପାକିସ୍ତାନ ମଧ୍ୟରେ ଶନିବାର ମ୍ୟାଚ୍ ଖେଳାଯିବାକୁ ଥିବା ବେଳେ ଏଥିରେ ଶୁବମାନ ଖେଳିବେ କି ନାହିଁ ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି। ଅନ୍ୟପକ୍ଷରେ ଶ୍ରୀଲଙ୍କାର ଚମାରି ଅଟ୍ଟାପଟୁ ଆଇସିସି ମାସର ଶ୍ରେଷ୍ଠ ମହିଳା କ୍ରିକେଟର୍ ଭାବେ ବିବେଚିତ ହୋଇଛନ୍ତି। ଇଂଲଣ୍ଡ ବିପକ୍ଷ ଶୃଙ୍ଖଳାରେ ଚମାରି ଉଭୟ ବ୍ୟାଟିଂ ଓ ବୋଲିଂରେ ସଫଳତା ପାଇଥିବାରୁ ତାଙ୍କୁ ଏହି ପୁରସ୍କାର ମିିଳିଛି।
