ବାଉଁଶୁଣି: ବୌଦ୍ଧ ବ୍ଲକ ବାଉଁଶୁଣିଠାରେ ଦୀର୍ଘ ୩୦ ବର୍ଷରୁ ଉର୍ଦ୍ଧ୍ବ ସମୟ ହେବ ଏକ ସହକାରୀ କୃଷି ଅଧିକାରୀଙ୍କ କାର୍ଯ୍ୟାଳୟ କାର୍ଯ୍ୟ କରି ଆସୁଛି। ଏହି କାର୍ଯ୍ୟାଳୟ ଅଧୀନରେ ୧୫ଟି ପଞ୍ଚାୟତର ଚାଷୀମାନେ କୃଷି ସମ୍ବନ୍ଧୀୟ ବିଭିନ୍ନ ପରାମର୍ଶ ପାଇ ପାରୁଥିଲେ। ହେଲେ ୫ବର୍ଷ ପୂର୍ବରୁ ଏଠାରେ ଅବସ୍ଥାପିତ ଅଧିକାରୀ ରବିନାରାୟଣ ପଣ୍ଡାଙ୍କ ଅବସର ଗ୍ରହଣ ପରେ ଆଉ ନୂଆ ଅଧିକାରୀଙ୍କୁ ବାଉଁଶୁଣିରେ ନିଯୁକ୍ତ କରାଗଲା ନାହିଁ। ଫଳରେ କାର୍ଯ୍ୟାଳୟଟି ବ୍ୟବହାର ନହୋଇ ପଡି ରହିବା ଯୋଗୁଁ ଜରାଜୀର୍ଣ୍ଣ ହୋଇ ବର୍ତ୍ତମାନ ଭୂତକୋଠି ଭଳି ପଡିରହିଛି। ଅଧିକାରୀ ନିଯୁକ୍ତ ଓ କାର୍ଯ୍ୟାଳୟର ମରାମତି ନେଇ ଗତ ଏକ ବର୍ଷ ହେଲା ଲଗାତାର ଭାବେ ଖବର ପ୍ରକାଶିତ ହୋଇ ଆସୁଥିଲା। ଏଭଳି ଖବର ପ୍ରକାଶନ ହେବା କାରଣରୁ ଗତ ଜୁଲାଇ ମାସ ୧୯ ତାରିଖରେ ବୈଜୟନ୍ତୀ ପ୍ରଧାନଙ୍କୁ ସହକାରୀ କୃଷି ଅଧିକାରୀ ଭାବେ ଏଠାରେ ଅବସ୍ଥାପିତ କରାଯାଇଛି। ହେଲେ ଦୀର୍ଘ ଦୁଇ ମାସରୁ ଅଧିକ ଦିନ ବିତି ଯାଇଥିଲେ ମଧ୍ୟ କାର୍ଯ୍ୟାଳୟଟି କାର୍ଯ୍ୟକ୍ଷମ ହେଉନଥିବାରୁ ଅଧିକରୁ ଅଧିକ ଜରାଜୀର୍ଣ୍ଣ ହୋଇ ଦୟନୀୟ ଅବସ୍ଥାରେ ପହଞ୍ଚିଲାଣି। କୃଷି ପ୍ରଧାନ ଜିଲ୍ଲାରେ କୃଷି ବିଭାଗ ପ୍ରତି ବିଭାଗୀୟ କର୍ତ୍ତୃପକ୍ଷଙ୍କ ଏଭଳି ଅବହେଳା ଯୋଗୁଁ ଅଞ୍ଚଳର ଚାଷୀ ମହଲରେ ଅସନ୍ତୋଷ ପ୍ରକାଶ ପାଇବା ସହ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରାଯିବାକୁ ସେମାନଙ୍କ ମଧ୍ୟରେ ମତ ପ୍ରକାଶ ପାଇଛି। ଏନେଇ ଜିଲ୍ଲା ମୁଖ୍ୟ କୃଷି ଅଧିକାରୀ ବସନ୍ତ ପାଣିଗ୍ରାହୀଙ୍କୁ ଅବଗତ କରାଯିବାରୁ ସେଠାକୁ ଯାଇ କାର୍ଯ୍ୟାଳୟର ସ୍ଥିତି ଅନୁଧ୍ୟାନ କରିବା ପରେ ଏ ଦିଗରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି।
