ସମ୍ବଲପୁର : ସମ୍ବଲପୁର ଶାସନ ଥାନା ଅନ୍ତର୍ଗତ ବିଶାଳଖିଣ୍ଡା ସ୍ଥିତ ଶାସନ କେନାଲରେ ବରଯାତ୍ରୀ ଗାଡି ଓଲଟି ଘଟିଥିବା ଦୁର୍ଘଟଣାରେ ମୃତ୍ୟୁ ସଂଖ୍ୟା ୭କୁ ବୃଦ୍ଧି ପାଇଛି।
ଏକ ବିବାହ ଉତ୍ସବରେ ବରଯାତ୍ରୀ ଭାବେ ଯୋଗଦେବାପାଇଁ ଝାରସୁଗୁଡା ଜ଼ିଲ୍ଲା କନକତୁରା ବଡ଼ଧରା ଅଞ୍ଚଳରୁ ପରମାଣପୁରକୁ ଏକ ବୋଲେରୋରେ ୧୧ ଜଣ ଲୋକ ଆସିଥିଲେ। ବିବାହ ଭୋଜି ଖାଇ କନ୍ୟା ଘରୁ ନିଜ ଘର ଝାରସୁଗୁଡା ଜ଼ିଲ୍ଲା କନକତୁରା ବଡ଼ଧରା ଗ୍ରାମକୁ ବାହାରିଥିଲେ। ବିଳମ୍ବିତ ରାତିରେ ଫେରିବା ବେଳକୁ ପ୍ରବଳ ବର୍ଷା ହେଉଥିଲା। ଏହି ସମୟରେ ଗୋଟିଏ ବୋଲେରୋରେ ପ୍ରାୟ ୧୧ ଜଣ ଥିବା ବେଳେ ଶାସନ ଥାନା ଅନ୍ତର୍ଗତ ବିଶାଳଖିଣ୍ଡା ବୁଲାଣିରେ ପହଞ୍ଚିବା ମାତ୍ରେ ଭାରସାମ୍ୟ ହରାଇ ଗାଡିଟି ସିଧା ଶାସନ କେନାଲ ଭିତରକୁ ପଶି ଯାଇ ଓଲଟି ପଡିଥିଲା।
ଗାଡିଟି ଓଲଟି ପଡିବାରୁ ଗାଡି ଭିତରେ ଥିବା ଯୁବକ ମାନେ ସମସ୍ତେ ବାହାରି ପାରିନଥିଲେ। ତେବେ କୌଶଳ କ୍ରମେ ଜଣେ ଯୁବକ ବାହାରି ତାଙ୍କ ସମ୍ପର୍କୀୟ ମାନଙ୍କୁ ଫୋନ କରିବା ପରେ ଘଟଣାସ୍ଥଳରୁ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ତେବେ ବିଳମ୍ବିତ ରାତିରେ ୬ ଜଣକ ମୃତ ଦେହକୁ ଉଦ୍ଧାର କରାଯାଇଥିବା ବେଳେ ଆଜି ସକାଳୁ ନିଖୋଜ ଥିବା ଗାଡି ଚାଳକର ମୃତଦେହ କୁ ଉଦ୍ଧାର କରାଯାଇଛି। ମୃତକ ମାନେ ହେଲେ ବଡ଼ଧରା ଗ୍ରାମର ସୁବୋଲ ଭୋଇ,ସୁମନ୍ତ ଭୋଇ, ସୋରଜ ସେଠ,ଦିବ୍ୟ ଲୁହା,ଅଜିତ ଖମାରି, ରମାକାନ୍ତ ଭୟରଙ୍କ ମୃତ୍ୟୁ ହୋଇଥିବା ଜଣାପଡିଛି । ଏନେଇ ସମ୍ବଲପୁର ହସ୍ପିଟାଲରେ ସମ୍ବଲପୁର ଉପଜିଲ୍ଲାପାଳ ପ୍ରଭାସ ଡନସନା ପହଞ୍ଚି ପରସ୍ଥିତିର ସମୀକ୍ଷା କରିଛନ୍ତି । ଅନ୍ୟପକ୍ଷରେ ପୁଲିସ ପହଞ୍ଚି ଘଟଣାର ଅଧିକ ତଦନ୍ତ ଆରମ୍ଭ କରିଛି।
