ସୋରଡା: ଅଗ୍ନିକାଣ୍ଡରେ ୧୬ଟି ପରିବାରର ୪୦ ବଖରା ଘର ପୋଡି ପାଉଁଶ ହୋଇ ଯାଇଛି। ଏପରି ଦୁଃଖଦ ଘଟଣା ଗଞ୍ଜାମ ଜିଲା ସୋରଡ଼ା ସହରର ଖଦାଳ ସାହିରେ ଘଟିଛି। ଶୁକ୍ରବାର ଭୋର ସମୟରେ ଆକସ୍ମିକ ଅଗ୍ନିକାଣ୍ଡ ଘଟିଥିଲା। ଅଗ୍ନିର ପ୍ରକୋପ ଏତେ ଉଗ୍ର ଥିଲା ଯେ ତାହା ସଙ୍ଗେ ସଙ୍ଗେ ପାଖ ଘର ଗୁଡିକୁ ବ୍ୟାପି ଯାଇଥିଲା। ଘର ଗୁଡିକ ପରସ୍ପରକୁ ଲାଗି ରହିଥିବାରୁ ନିଆଁକୁ ଆୟତ୍ତ କରିବା ସମ୍ଭବ ହୋଇ ନଥିଲା। ସୋରଡାରୁ ଦମକଳ ବାହିନୀ ଯାଇ ନିଆଁ ଲିଭାଇଲା ବେଳକୁ ୧୬ଟି ପରିବାରର ୪୦ ବଖରା ଘରଗୁଡିକ ପୋଡ଼ି ପାଉଁଶ ହୋଇ ଯାଇଥିଲା। ଦମକଳ ବାହିନୀ ନିଆଁକୁ ଆୟତ୍ତ କରିଥିଲେ।
ସୂଚନା ଅନୁଯାୟୀ, ଆଜି ଭୋର ପ୍ରାୟ ୪ଟା ବେଳେ ହଠାତ ଖଦାଳ ସାହିରେ ଜଣେ ବ୍ୟକ୍ତିଙ୍କ ରୋଷେଇ ଘରର ଚାଳରୁ ନିଆଁ ଉଠି ଏହା ସମଗ୍ର ଗାଁକୁ ବ୍ୟାପି ଯାଇଥିଲା। ଲୋକମାନେ ନିଦରେ ଶୋଇଥିବା ଯୋଗୁଁ କିଛି ବୁଝିବା ପୂର୍ବରୁ ନିଆଁ ଗାଁର ୧୬ଟି ପରିବାର ୪୦ ବଖରା ଘରକୁ ବ୍ୟାପି ଯାଇଥିଲା। ଲୋକମାନେ ନିଜସ୍ୱ ଉଦ୍ୟମରେ କୂଅ, ପୋଖରୀରୁ ପାଣି ଆଣି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। ପରେ ଦମକଳ ବାହିନୀ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ତେବେ ଅଗ୍ନିକାଣ୍ଡର କାରଣ ଜଣା ପଡି ନାହିଁ। ତହସିଲଦାର, ପୁଲିସ ଅଧିକାରୀ, ସ୍ଥାନୀୟ ବିଧାୟକ ଘଟଣାସ୍ଥଳରେ ପହଞ୍ଚି ଅଗ୍ନି ବିପନ୍ନମାନଙ୍କୁ ସାହାର୍ଯ୍ୟ କରିଛନ୍ତି।