କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ଧାମୁଣିପଙ୍ଗା ପଞ୍ଚାୟତର କତାଗୁଡ଼ା ଗ୍ରାମରେ ବସବାସ କରନ୍ତି ରେବତୀ ଵାଘ୍। ନିଜ ସ୍ବାମୀ ଓ ବୃଦ୍ଧା ଶାଶୁଙ୍କ ସହ ରେବତୀ ଜନ୍ମରୁ ଭିନ୍ନକ୍ଷମ ହୋଇଥିବାରୁ ଅନେକ ସଂଘର୍ଷ ପରେ ସରକାରଙ୍କ ତରଫରୁ ୨୦୧୮/ ୧୯ ବର୍ଷରେ ବିଜୁ ପକ୍କା ଘର ଟିଏ ପାଇଥିଲେ। ଧାର କରଜ କରି ଘର କାମ ସରିଲା ପରେ ମଧ୍ୟ ଶେଷ ବିଲ୍ ପାଇବା ପାଇଁ ନାକେଦମ୍ ହେବାକୁ ପଡ଼ୁଛି। ବାରମ୍ବାର ବ୍ଲକ ଅଫିସ ଯାଇ ବାବୁ ମାନଙ୍କୁ ଗୁହାରୀ କରିବା ପରେ ମଧ୍ୟ ଆଜି ଯାଏଁ ଶେଷ ବିଲ୍ ଟଙ୍କା ପାଇ ପାରୁନାହାନ୍ତି।
କଲ୍ୟାଣସିଂହପୁର ଠାରେ ହୋଇଥିବା ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ସମୟରେ ରେବତୀ ବାଘ ଜିଲ୍ଲାପାଳଙ୍କୁ ନିଜେ ଯାଇ ଭେଟିଲା ପରେ ଆଶ୍ୱାସନା ମିଳିଲା ତଥାପି ଯେମିତିକୁ ସେମିତି। ପୁଣି ଥରେ ରାୟଗଡ଼ା ଠାରେ ହୋଇଥିବା ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଠାରେ ପହଞ୍ଚି ଗୁହାରୀ କରିଛନ୍ତି। ତେବେ ଘର କାମ ଶେଷ ହୋଇ ଚାରି ପାଞ୍ଚ ମାସ ବିତିଗଲା ପରେ ମଧ୍ୟ ଶେଷ ବିଲ୍ ଟଙ୍କା ପାଇ ନ ଥିବା ଅଭିଯୋଗ କରିଛନ୍ତି। କେବେ ବଳକା ଟଙ୍କା ମିଳିବ ତାହା ଦେଖିବାକୁ ରହିଲ।
