କଟକ : ଫୁଟ୍ବଲ ଆସୋସିଏସନ୍ ଅଫ୍ ଓଡ଼ିଶା (ଫାଓ) ଆନୁକୂଲ୍ୟରେ ଚାଲିଥିବା ୨୪ତମ ଜାତୀୟ ସିନିୟର ଫୁଟ୍ବଲ ଚମ୍ପିଆନ୍ସିପ୍ର ଫାଇନାଲରେ ପ୍ରବେଶ କରିଛି ଆୟୋଜକ ଓଡ଼ିଶା। ଶନିବାର ଖେଳା ଯାଇଥିବା ସେମିଫାଇନାଲ ମ୍ୟାଚ୍ରେ ଗତବର୍ଷର ଚମ୍ପିଆନ୍ ତାମିଲନାଡ଼ୁକୁ କଡ଼ା ମୁକାବିଲା ପରେ ଓଡ଼ିଶା ୪-୩ ଗୋଲ୍ରେ ପରାସ୍ତ କରିଛି। ସୋମବାର ବାରବାଟୀ ଷ୍ଟାଡିୟମ୍ରେ ପୂର୍ବ ଚମ୍ପିଆନ୍ ମଣିପୁର ବିପକ୍ଷରେ ଓଡ଼ିଶା ଫାଇନାଲ ମ୍ୟାଚ୍ ଖେଳିବ। ଅନ୍ୟ ଏକ ସେମିଫାଇନାଲ ମ୍ୟାଚ୍ରେ ଭାରତୀୟ ରେଳବାଇକୁ ଟାଇବ୍ରେକରରେ ୪-୩ ଗୋଲ୍ରେ ମଣିପୁର ପରାସ୍ତ କରିଛି।
ବିଡ଼ାନାସୀ ଗ୍ରାଉଣ୍ଡରେ ଘରୋଇ ଓଡ଼ିଶା ବିପକ୍ଷରେ ଗତବର୍ଷର ଚମ୍ପିଆନ୍ ତାମିଲନାଡ଼ୁ ଆରମ୍ଭରୁ ଆକ୍ରମଣାତ୍ମକ ଫୁଟ୍ବଲ ଖେଳି ୨-୦ ଗୋଲ୍ରେ ଆଗୁଆ ହୋଇ ଯାଇଥିଲା। ୧୦ ଓ ୧୬ ମିନିଟରେ ତାମିଲନାଡ଼ୁ ଖେଳାଳି ୨ଟି ଗୋଲ୍ଦେଇ ଓଡ଼ିଶାକୁ ନିରାଶ କରିଥିଲେ। ତେବେ ପରେ ଓଡ଼ିଶା ସଂଘର୍ଷପୂର୍ଣ୍ଣ ଫୁଟ୍ବଲ ଖେଳିଥିଲା। ୨୫ ମିନିଟରେ ଆନ୍ତର୍ଜାତିକ ଖେଳାଳି ପ୍ୟାରୀ ଖାଖା ଓଡ଼ିଶା ପାଇଁ ଗୋଲ୍ ଦେଇଥିଲେ। ୩୧ ମିନିଟରେ ଓଡ଼ିଶାର ଅଞ୍ଜୁ ତମାଙ୍ଗ୍ ଗୋଲ୍ ଦେଇ ସ୍କୋର୍କୁ ୨-୨ କରିଥିଲେ। ପ୍ରଥମାର୍ଦ୍ଧର ଶେଷ ମିନିଟରେ ପ୍ୟାରୀ ଖାଖା ବ୍ୟକ୍ତିଗତ ୨ୟ ଏବଂ ଦଳ ପାଇଁ ୩ୟ ଗୋଲ୍ଦେଇ ମ୍ୟାଚ୍ରେ ଓଡ଼ିଶାକୁ ପ୍ରଥମଥର ଆଗୁଆ କରିଥିଲେ। ତେବେ ୭୭ ମିନିଟରେ ତାମିଲନାଡ଼ୁ ୩ୟ ଗୋଲ୍ଦେଇ ପୁଣି ମ୍ୟାଚ୍କୁ ସମାନସ୍ତରକୁ ଆଣିଥିଲା। ଫଳରେ ନିୟମିତ ୯୦ ମିନିଟର ଖେଳ ୩-୩ ଗୋଲ୍ରେ ଶେଷ ହୋଇଥିଲା। ଫଳରେ ଅତିରିକ୍ତ ସମୟର ଖେଳ ହୋଇଥିଲା। ଏହାର ପ୍ରଥମାର୍ଦ୍ଧରେ ଗୋଲ୍ ହୋଇନଥିବା ବେଳେ ୧୧୦ ମିନିଟରେ ପ୍ୟାରୀ ଖାଖା ଓଡ଼ିଶା ପାଇଁ ୪ର୍ଥ ଗୋଲ୍ ସ୍କୋର କରିଥିଲେ। ଏହାସହ ବ୍ୟକ୍ତିଗତ ୩ୟ ଗୋଲ୍ ଦେଇ ପ୍ୟାରୀ ହ୍ୟାଟ୍ରିକ୍ ପୂରଣ କରିଥିଲେ। ମଣିପୁର ଓ ଭାରତୀୟ ରେଳବାଇ ମଧ୍ୟରେ ଖେଳା ଯାଇଥିବା ମ୍ୟାଚ୍ ବେଶ୍ ସଂଘର୍ଷପୂର୍ଣ୍ଣ ହୋଇଥିଲା। ପରେ ମ୍ୟାଚ୍ର ଫଇସଲା ପାଇଁ ଟାଇବ୍ରେକରର ଆଶ୍ରୟ ନିଆ ଯାଇଥିଲା। ଏଥିରେ ମଣିପୁର ୪-୩ ଗୋଲ୍ରେ ବିଜୟୀ ହୋଇଥିଲା।
ତାମିଲନାଡ଼ୁକୁ ହରାଇ ଫାଇନାଲରେ ଓଡ଼ିଶା
Popular Categories
Previous article
Next article