ଦୋବଲ: ପୋଲକୁ ନେଇ ଘନଉଛି ବିବାଦ । ପ୍ରଶାସନର ପାତରଅନ୍ତର ଯୋଗୁ ଚିନ୍ତାରେ ରହିଛନ୍ତି ଗରିବ ଚାଷୀ । ଭଦ୍ରକ ଜିଲ୍ଲା ଆନନ୍ଦପୁରରେ ଦେଖିବାକୁ ମିଳିଛି ଏମିତି କିଛି । ଭଦ୍ରକ ଓ ଯାଜପୁର ଲୋକଙ୍କ ଗମନାଗମନକୁ ଦୃଷ୍ଟିରେ ରଖି ସରକାର ଗାଁରେ ଏକ ପୋଲ ନିର୍ମାଣ କରିଥିଲେ । ହେଲେ ପ୍ରଶାସନର ଟାଳଟୁଳ ନୀତି ଯୋଗୁ ରାସ୍ତାଟି ଅଧନ୍ତରିଆ ହୋଇ ପଡ଼ିରହିଛି ।
ସୂଚନା ମୁତାବକ ଆନ୍ଦପୁର ଠାରେ ଏକ ବିଜୁ ସେତୁ ନିର୍ମାଣ କରାଯାଇଥିଲା । ପରେ ପୋଲରେ ଆପ୍ରୋଚ ରୋଡ ସଂଯୋଗ ପାଇଁ ୪୦ ବର୍ଷର ପରିବା ହାଟକୁ ମଧ୍ୟ ଉଠାଯାଇଥିଲା । ଅଥଚ ବଡ଼ ବଡ଼ ଦୋକାନୀଙ୍କୁ ହଟାଗଲା ନାହିଁ । ଦୋକାନୀଙ୍କୁ ହଟାନଯିବା ଫଳରେ ରାସ୍ତାର ଦିଗ ପରିବର୍ତ୍ତନ କରାଗଲା । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି ।
ରାସ୍ତାର ଦିଗ ପରିବର୍ତ୍ତନ ଦ୍ୱାରା ଯାତାୟାତରେ ଅସୁବିଧା ହେଉଛି । ଦୁର୍ଘଟଣା ହେବାର ମଧ୍ୟ ସମ୍ଭାବନା ରହିଛି । ଫଳରେ ସ୍ଥାନୀୟ ଜନ ସାଧାରଣ ରାସ୍ତା ନିର୍ମାଣକୁ ବିରୋଧ କରିବା ସହ ତୁରନ୍ତ ଏହି ସମସ୍ୟାର ସମାଧାନ କରିବାକୁ ଦାବି କରିଛନ୍ତି । ତାହା ଛଡ଼ା ଏହି ଅଞ୍ଚଳ ବନ୍ୟା ପ୍ଳାବିତ ଅଞ୍ଚଳ ହୋଇଥିବାରୁ ଉତ୍ତମ ରାସ୍ତା ଖଣ୍ଡିଏ ପାଇଁ ଚିନ୍ତାରେ ଅଛନ୍ତି ଲୋକେ । ଏନେଇ ମଧ୍ୟ ସ୍ଥାନୀୟ ବାସିନ୍ଦା ଜିଲ୍ଲାପାଳଙ୍କୁ ଲିଖିତ ଅଭିଯୋଗ ଜଣାଇଛନ୍ତି । ହେଲେ ଘଟଣାକୁ ନେଇ କୌଣସି ସୁଫଳ ମିଳିପାରିନାହିଁ । ତେବେ ଆଗାମୀ ଦିନରେ ଏହି ସମସ୍ୟାର ତୁରନ୍ତ ସମାଧାନ ନକରାଗଲେ ଆନ୍ଦୋଳନକୁ ଜୋରଦାର କରାଯିବ ବୋଲି ଧାମନଗର ଅଞ୍ଚଳର ଶତାଧିକ ବୁଦ୍ଧିଜୀବୀ ଚେତାବନୀ ଦେଇଛନ୍ତି । ଦୋବଲରୁ ସଞ୍ଜୀବ ମହାନ୍ତିଙ୍କ ରିପୋର୍ଟ ସମାଜ ଲାଇଭ୍…
