ଲାଞ୍ଜିଗଡ: ବିଶ୍ୱନାଥପୁରଠାରୁ ବିଜେପୁରକୁ ସଂଯୋଗ କରୁଥିବା ହାତିଶାଳ ଘାଟିରେ ଶୁକ୍ରବାର ଏକ କପା ବୋଝେଇ କଣ୍ଟେନର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ଚାଳକ ଅଳ୍ପକେ ବର୍ତ୍ତି ଯାଇଥିବା ଜଣାପଡ଼ିଛି।
ସୂଚନା ଅନୁସାରେ, କଲ୍ୟାଣସିଂହପୁରଠାରୁ ଏକ କପା ବୋଝେଇ କଣ୍ଟେନର ବଲାଙ୍ଗିର ଯାଉଥିବା ବେଳେ ହାତିଶାଳ ଘାଟିର ବଞ୍ଜାରୀ ମନ୍ଦିର ବୁଲାଣିରେ ଯିବା କଥା, କିନ୍ତୁ ଡ୍ରାଇଭର ଜାଣି ନ ପାରି ଗାଡିକୁ ସିଧା ନେଇଯାଇଥିଲେ। ଫଳରେ ଗାଡିଟି ରାସ୍ତାରୁ ୧୦୦ ଫୁଟ ତଳକୁ ଖସି ପଡ଼ିଥିଲା। ଗାଡି ଚୁରମାର ହୋଇଯାଇଥିବା ବେଳେ ଚାଳକ ସାମାନ୍ୟ ଆହତ ହୋଇଛନ୍ତି। ଗାଡି ଏତେ ତଳକୁ ଖସି ପଡ଼ିଥିଲେ ହେଁ ଚାଳକଙ୍କର କିଛି ହୋଇ ନ ଥିବା ଆଶ୍ଚର୍ଯ୍ୟ ଲାଗୁଛି। ଏହି ଘାଟିରେ ପୂଜା ପାଉଥିବା ବଞ୍ଜାରୀ ଦେବୀଙ୍କ ଯୋଗୁଁ ଚାଳକଙ୍କର କିଛି ହୋଇନାହିଁ ବୋଲି ଲୋକେ କୁହାକୁହି ହେଉଛନ୍ତି। ହାତିଶାଳ ଘାଟିରେ ଥିବା ବଞ୍ଜାରୀ ଦେବୀ ଅତ୍ୟନ୍ତ ପ୍ରତ୍ୟକ୍ଷ। ସେଥିପାଇଁ ସମସ୍ତ ଗାଡି ରାସ୍ତାରେ ଗଲାବେଳେ ନଡ଼ିଆ ଦେଇ ଶୁଭ ମନାସୀ ଥାଆନ୍ତି। ହାତିଶାଳ ଘାଟି ରାସ୍ତା ଅତ୍ୟନ୍ତ ସଂକୀର୍ଣ୍ଣ ହୋଇଥିବା ଯୋଗୁଁ ସବୁବେଳେ ଦୁର୍ଘଟଣାମାନ ଘଟୁଥିବା ଅଞ୍ଚଳବାସୀ ପ୍ରକାଶ କରିଛନ୍ତି।
