ମୋହନା : ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟରେ ଗଜପତି ଜିଲ୍ଲା ଅନ୍ତର୍ଗତ ମୋହନା ବ୍ଲକରେ ମୋଟାମୋଟି ଶାନ୍ତିପୂର୍ଣ୍ଣ ଭାବେ ମତଦାନ ଶେଷ ହୋଇଛି । ବ୍ଳକର ୩ଟି ଜିଲ୍ଲା ପରିଷଦ ଜୋନ୍ ସମେତ ସରପଞ୍ଚ, ସମିତି ସଭ୍ୟ ଓ ୱ।ର୍ଡ ସଭ୍ୟ-ସଭ୍ୟା ପାଇଁ ମତଦାନ ପ୍ରକ୍ରିୟା ଶେଷ ହୋଇଛି । ବ୍ଳକର ୩୯ଟି ଗ୍ରାମପଞ୍ଚାୟତର ୫୩୫ ବୁଥରେ ମତଦାନ ହୋଇଥିଲା ଓ ପ୍ରାୟ ୬୫ ଶତକଡା ମତଦାନ ହୋଇଥିବା ଜଣାପଡିଛି । ଶାନ୍ତିପୂର୍ଣ୍ଣ ଭାବେ ମତଦାନ ଓ ବ୍ଲକବାସୀଙ୍କ ସହଯୋଗ ପାଇଁ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଲିଙ୍ଗରାଜ ପଣ୍ଡା ଧନ୍ୟବାଦ ଜ୍ଞାପନ କରିଛନ୍ତି।
ଅପରପକ୍ଷେ ମୋହନା ଗ୍ରାମପଞ୍ଚାୟତ ଅଧିନ ଧନୁପଙ୍କ ଗ୍ରାମରେ କୌଣସି ଭୋଟରଙ୍କ ନାମ ତାଲିକାରେ ନଥିବାରୁ ପ୍ରତିବାଦରେ ଗ୍ରାମରେ ଥିବା ମତଦାନ କେନ୍ଦ୍ରକୁ ପଡୋଶୀ ଗ୍ରାମ ଗୁଣ୍ଡ୍ରିଗୁଡା ଓ ବାଢେଇପୁର ଭୋଟରଙ୍କୁ ଛାଡିନଥିଲେ। ଫଳରେ ୪ଘଣ୍ଟା ଧରି ମତଦାନ ବନ୍ଦ ରହିଥିଲା। ଖବର ପାଇ ମୋହନା ପୁଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ପରେ ଭୋଟର ମତଦାନ କରିଥିଲେ। ଶାନ୍ତିପୂର୍ଣ୍ଣ ଭାବେ ନିର୍ବାଚନ ସକାଶେ ଜିଲ୍ଲା ପ୍ରଶାସନ ପକ୍ଷରୁ ଆରକ୍ଷୀ ଅଧିକ୍ଷକ, ଅତିରିକ୍ତ ଆରକ୍ଷୀ ଅଧିକ୍ଷକ, ୪ଜଣ ଏସଡିପିଓ, ମୋହନା ଓ ଅଡବା ଥାନା ଅଧିକାରୀ, ୧୦ ବାଇକ ପାଟ୍ରୋଲିଙ୍ଗ, ୨୫ ଭ୍ରାମ୍ୟମାଣ ଦଳ, ୬ଶହ ଓ ଫୋର୍ସ ନିୟୋଜିତ ଥିଲେ।
