ଭାରତକୁ ରୁଷର ନୂଆ ଉପହାର ଟି-୧୪ ଆର୍ମଟା ଟ୍ୟାଙ୍କ

ନୂଆଦିଲ୍ଲୀ: ନୂଆଦିଲ୍ଲୀକୁ ରୁଷ ସର୍ବାଧୁନିକ ଟି-୧୪ ଆର୍ମଟା ଟ୍ୟାଙ୍କ ଯୋଗାଇଦେବ । ଭାରତୀୟ ସେନା ପାଇଁ ନିର୍ଦ୍ଦିଷ୍ଟ ଆବଶ୍ୟକତା ଅନୁଯାୟୀ ପ୍ରସ୍ତୁତ କରାଯାଇଥିବା ଏହି ଟ୍ୟାଙ୍କ ଟି-୧୪ ଆର୍ମଟା ଟ୍ୟାଙ୍କ ପ୍ଲାଟଫର୍ମରେ ତିଆରି କରାଯାଉଛି । ଏହା ଭାରତୀୟ ସେନା ପାଇଁ ଅତ୍ୟନ୍ତ ଉପଯୋଗୀ ସାବ୍ୟସ୍ତ ହେବ ବୋଲି ଜଣାଯାଇଛି । ଭାରତ ଓ ରୁଷ ମଧ୍ୟରେ ରଣକୌଶଳାତ୍ମକ ସହଭାଗିତା ସଂପ୍ରତି ଶିଖର ଛୁଇଁଥିବାବେଳେ ମସ୍କୋ ଭାରତକୁ ଏସ-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥା ଯୋଗାଇ ଦେଇଛି । ଏବେ ଏହା ଟି-୧୪ ଆର୍ମଟା ଟ୍ୟାଙ୍କ ପ୍ଲାଟଫର୍ମରେ ମିଳିତ ଭାବରେ ନୂଆ ସାଞ୍ଜୁଆ ଗାଡିର ବିକାଶ ନିମନ୍ତେ ସାମରିକ-ବୈଷୟିକ ସହଯୋଗ (ଏମଟିସି) ଚୁକ୍ତି ଅନୁଯାୟୀ ପ୍ରସ୍ତାବ ଦେଇଛି ।
ଦୁଇ ଦେଶ ମଧ୍ୟରେ ଗତ ଡିସେମ୍ବର ୬ ତାରିଖରେ ଏମଟିସି ରାଜିନାମା ସ୍ୱାକ୍ଷରିତ ହୋଇଥିଲା ଏବଂ ଏହା ୨୦୩୦ ପର୍ଯ୍ୟନ୍ତ ବଳବତ୍ତର ରହିବ । ରୁଷ ରାଷ୍ଟ୍ରପତି ଭ୍ଲାଦିମିର ପୁତିନ ଡିସେମ୍ବର ୬ରେ ଦିନିକିଆ ଭାରତ ଗସ୍ତରେ ଆସିଥିବା ଅବସରରେ ଏହି ରାଜିନାମା ସ୍ୱାକ୍ଷରିତ ହୋଇଥିଲା । ଟି-୧୪ ଆର୍ମଟା ଟ୍ୟାଙ୍କ ସମ୍ପର୍କରେ ଜଣାଯାଇଛି ଯେ ଏହା ସର୍ବାଧୁନିକ ମୁଖ୍ୟ ଲଢୁଆ ଟ୍ୟାଙ୍କ ଏବଂ ରୁଷ ଅଗ୍ରଣୀ ଯନ୍ତ୍ରପାତି ନିର୍ମାଣକାରୀ କମ୍ପାନୀ ଉରାଲଭାଗୋନଜାଭୋଦ ପକ୍ଷରୁ ଡିଜାଇନ କରାଯାଇଥିବା ଆର୍ମଟା ୟୁନିଭର୍ସାଲ କମ୍ବାଟ ପ୍ଲାଟଫର୍ମରେ ନିର୍ମିତ । ଗତ ବର୍ଷଗୁଡିକରେ ଏହା ବିଭିନ୍ନ ଆନ୍ତର୍ଜାତିକ ମଞ୍ଚରେ ପ୍ରଦର୍ଶିତ ହୋଇସାରିଛି । ୨୦୧୫ରେ ପ୍ରଥମକରି ଏହାକୁ ମସ୍କୋରେ ପ୍ରଦର୍ଶିତ କରାଯାଇଥିଲା । ଏଥିରେ ଚାଳକ ଏକ ସ୍ୱତନ୍ତ୍ର ଭାବରେ ନିର୍ମିତ ସାଞ୍ଜ୍ରୁଆ କ୍ୟାପସୁଲ ମଧ୍ୟରେ ରହିଥାନ୍ତି ଏବଂ ଏହା ଗୋଳାବାରୁଦ ଠାରୁ ସମ୍ପୂର୍ଣ୍ଣ ଭାବରେ ଅଲଗା ରହିଥାଏ । ଏଥିରେ ରିମୋଟ ପରିଚାଳିତ ଲଢୁଆ ବ୍ୟବସ୍ଥା ରହିଛି । ଏଥିରେ ଶକ୍ତିଶାଳୀ କମାଣ ଏବଂ ସ୍ୱୟଂଚାଳିତ ଗୋଳା ବୋଝେଇ ବ୍ୟବସ୍ଥା ମଧ୍ୟ ରହିଛି । ଏହାର ଚାଳକଙ୍କ ନିକଟରେ ଭିଡିଓ ଉପକରଣ ଏବଂ ସେଥିରେ ସ୍ପର୍ଶ ସମ୍ବେଦୀ ନିୟନ୍ତ୍ରଣ ବ୍ୟବସ୍ଥା ରହିଛି । ଏହା ସଂପ୍ରତି ବିଶ୍ୱରେ ରହିଥିବା ଟ୍ୟାଙ୍କ ବିଧ୍ୱଂସୀ ଯେକୌଣସି ଅସ୍ତ୍ରଶସ୍ତ୍ର ସହ୍ୟ କରିବାକୁ ସମର୍ଥ ।