କାଶୀପୁର : ରାୟଗଡା ଜିଲା କାଶୀପୁର ବ୍ଲକରେ ବାତ୍ୟା ଗୁଲାବ ପ୍ରଭାବରେ ରବିବାର ସନ୍ଧ୍ୟା ଠାରୁ ବର୍ଷା ସହ ପବନ ଲାଗିରହିଛି । ଏହାର ପ୍ରଭାବରେ କାଶୀପୁର ବ୍ଲକର କେତେକ ସ୍ଥାନରେ ମାଟି ଘର ଗୁଡାକ ଭାଙ୍ଗିପଡିଥିବା ବେଳେ କାଶୀପୁର ଠାରୁ ସୁଙ୍ଗେର ଦେଇ ଭବାନିପାଟଣାକୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ଗଛ ଭାଙ୍ଗି ପଡି ରହିଥିଲା। ଫଳରେ କାଶୀପୁର ଠାରୁ ଭବାନୀପାଟଣା ମୁଖ୍ୟ ରାସ୍ତା ବନ୍ଦ ହୋଇ ରହିଥିଲା। ଖବର ପାଇ ଘଟଣା ସ୍ଥଳକୁ କାଶୀପୁର ଗୋଷ୍ଠୀ ଉନ୍ନୟନ ଅଧିକାରି ଗୌର ଚନ୍ଦ୍ର ପଟ୍ଟନାୟକଙ୍କ ସହ ପ୍ରଶାସନ ଉକ୍ତ ସ୍ଥାନରେ ପହଞ୍ଚି ରାସ୍ତାରୁ ଗଛ କାଟି ରାସ୍ତା ସଫା କରିଥିଲା। ଏହା ସହ କାଶୀପୁର ବ୍ଲକର ଅନେକ ସ୍ଥାନରେ ଗଛ ଗୁଡିକ ଭାଙ୍ଗିଯାଇଥିବା ବେଳେ କାଶୀପୁର ଅଗ୍ନିଶମ ବିଭାଗ କର୍ମଚାରି ପହଞ୍ଚି ଗଛ କାଟି ସଫା କରିଥିବା ସୂଚନା ମିଳିଛି। ଅପର ପକ୍ଷରେ କାଶୀପୁର ବ୍ଲକ ପ୍ରଶାସନ ପକ୍ଷରୁ ବାତ୍ୟାକୁ ଦୃଷ୍ଟିରେ ରଖି କାଶୀପୁର ବ୍ଲକର ୧୯୨ ଜଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା। ବ୍ଲକ କାର୍ଯ୍ୟାଳୟ ପରିସରରେ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ ଖୋଲାଯିବା ସହ ସମସ୍ତ ଅଧିକାରିଙ୍କୁ ନିଜ ନିଜ ସ୍ଥାନରେ ରହି ସମସ୍ତ ସୂଚନା ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଥିଲା।
ଆଜି ସମସ୍ତ ଅଞ୍ଚଳକୁ କାଶୀପୁର ବିଡିଓ ଗୌର ଚନ୍ଦ୍ର ପଟ୍ଟନାୟକ, କାଶୀପୁର ତହସିଲଦାର ଶରତ ଶବର ସମସ୍ତ ଅଞ୍ଚଳ ପରିଦର୍ଶନ କରି ସ୍ଥିତି ସମୀକ୍ଷା କରିଛନ୍ତି।ଏନେଇ କାଶୀପୁର ତହସିଲଦାର ଶରତ ଶବରଙ୍କୁ ଯୋଗାଯୋଗ କରିବାରୁ, ଆମ ନିକଟରେ ଦୁଇଟି ଘର ଭାଙ୍ଗିଥିବା ସୂଚନା ମିଳିଛି। ସେମାନଙ୍କ ନିକଟରେ ଅଧିକାରି ମାନେ ତୁରନ୍ତ ପହଞ୍ଚି ସହାୟତା ପ୍ରଦାନ କରିଥିବା ସୂଚନା ଦେଇଛନ୍ତି ।
