ଆଫଗାନିସ୍ତାନରେ ବଳପୂର୍ବକ ଶାସନ ବ୍ୟବସ୍ତା ନିଜ ହାତକୁ ନେଇଥିବା ତାଲିବାନ ଆତଙ୍କବାଦୀଙ୍କ ଆତଙ୍କ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏଭଳି ଅବସ୍ଥାରେ ଦେଶ ଛାଡି ପଳାଇ ଆସିବାକୁ ଚାହୁଁଥିବା ଦେଶ ଏବଂ ବିଦେଶର ନାଗରିକମାନଙ୍କୁ ମଧ୍ୟ ଅକଥନୀୟ ଯନ୍ତ୍ରଣା ସହିବାକୁ ପଡୁଛି। ତେବେ ରବିବାର ପୂର୍ବାହ୍ନ ୧୦.୧୦ ମିନିଟ ସମୟରେ କାବୁଲରୁ ୧୬୮ ଯାତ୍ରୀଙ୍କୁ ନେଇ ବାୟୁସେନାର ସି-୧୧୭ ବିମାନ ଭାରତରେ ପହଂଚିଛି।
ଗାଜିଆବାଦ ସ୍ତିତ ହିଣ୍ଡନ ବାୟୁସେନା ଘାଟିରେ ଏହି ବିମାନ ଅବତରଣ କରିଛି। ଆଫଗାନିସ୍ତାନରୁ ଫେରିଥିବା ୧୬୮ ଜଣ ଯାତ୍ରୀଙ୍କ ମଧ୍ୟରେ ୧୦୭ ଜଣ ଭାରତୀୟ ଥିବା ବେଳେ ୨୪ ଜଣ ଆଫଗାନ ଶିଖ ଓ ୨ ଜଣ ଆଫଗାନ ସାଂସଦ ଥିବା ସୂଚନା ମିଳିଛି। ଫେରିଥିବା ଯାତ୍ରୀମାନେ ସେମାନଙ୍କ ଦୁର୍ଦ୍ଦଶା ବର୍ଣ୍ଣନା କରି କହିଛନ୍ତି ଯେ ସେମାନଙ୍କୁ ତାଲିବାନୀ ଆତଙ୍କବାଦୀମାନେ ବିମାନବନ୍ଦରକୁ ଆସିବାକୁ ଦେଉ ନଥିଲେ। ସେଠାରୁ ଆସିଥିବା ସାଂସଦ ନରେନ୍ଦର ସିଂ ଖାଲସା ନିଜ କୋହ ରୋକି ପାରିନଥିଲେ ଓ କହିଥିଲେ ଯେ ଯାହା ଗତ ୨୦ ବର୍ଷରେ ହୋଇଥିଲା ତାହା ସବୁ ନଷ୍ଟ ହୋଇଗଲା।
