ବେଜିଂ : ଆଫଗାନିସ୍ତାନରେ ତାଲିବାନର କ୍ଷମତା ଦଖଲକୁ ଚୀନ ସମର୍ଥନ କରିଥିବାବେଳେ ଦେଶବାସୀ ଏହାକୁ ସମାଲୋଚନା କରିଛନ୍ତି । ଇସଲାମିକ ଚରମପନ୍ଥୀ ନାମରେ ଆଫଗାନିସ୍ତାନରେ ଯୁଦ୍ଧ ଚଳାଇଥିବା ଏକ ସଂଗଠନକୁ ସମର୍ଥନ କରିବା ଠିକ୍ ନୁହେଁ ବୋଲି ଚୀନବାସୀ କହିଛନ୍ତି । ଦେଶବାସୀ ତାଲିବାନର ପୂର୍ବ ଇତିହାସ ଓ ମହିଳାଙ୍କ ଉପରେ ଅତ୍ୟାଚାର ବିଷୟ ମନେ ପକାଇଛନ୍ତି। ପୂର୍ବ ତୁର୍କମେନିସ୍ତାନ ଇସଲାମିକ ଆନ୍ଦୋଳନ ସହିତ ତାଲିବାନର ସମ୍ପର୍କ ରହିଛି । ଜିନଜିଆଙ୍ଗରେ ହୋଇଥିବା ଆତଙ୍କବାଦୀ ଆକ୍ରମଣ ପାଇଁ ଚୀନ ଏହି ସଂଗଠନକୁ ଦାୟୀ କରିଥିଲା । ଅନ୍ୟପଟେ ଆଫଗାନିସ୍ତାନରେ ଅସ୍ଥିରତାର ପ୍ରଭାବ ପାକିସ୍ତାନ ଉପରେ ପଡିବ ଯେଉଁଠାରେ ଚୀନ ବେଲ୍ଟ ଆଣ୍ଡ ରୋଡ ଯୋଜନାରେ ୫୦୦୦ କୋଟି ଡଲାର ନିବେଶ କରିଛନ୍ତି। ଦେଶବାସୀଙ୍କ ଏପରି ପ୍ରତିକ୍ରିୟାକୁ ପ୍ରଶମିତ କରିବା ଲାଗି ଚୀନ ବୈଦେଶିକ ମନ୍ତ୍ରଣାଳୟ ଉଦ୍ୟମ କରିଛି। ମନ୍ତ୍ରଣାଳୟ ମୁଖପାତ୍ର ହୁଆ ଚୁନିୟାଙ୍ଗ କହିଛନ୍ତି ଯେ ତାଲିବାନମାନେ ପୂର୍ବ ଅପେକ୍ଷା ସୁସଙ୍ଗତ। ତେଣୁ ଏବେ ଆମେ ସେମାନଙ୍କ କଥା ଶୁଣିବା ସହିତ କାର୍ଯ୍ୟକୁ ଅନୁଧ୍ୟାନ କରିବା ଦରକାର। ହୁଆ ଆହୁରି କହିଛନ୍ତି ଯେ ଆଫଗାନିସ୍ତାନରେ ଗଣତନ୍ତ୍ର ପ୍ରତିଷ୍ଠା ନିମନ୍ତେ ଆମେରିକା ୨୦ବର୍ଷ ଧରି ଉଦ୍ୟମ କରିବା ପରେ ବିଫଳ ହୋଇଛି। ତେଣୁ ଏଠାରେ ଗଣତନ୍ତ୍ର ସରକାର ସ୍ଥାପନ ସମ୍ଭବ ନୁହେଁ। ଚୀନର ଶାସକ ଦଳ କମ୍ୟୁନିଷ୍ଟ ପାର୍ଟି ଏହାର ଦଳୀୟ ୱେବ ଚାନେଲ ‘ଦ ପିପୁଲ୍ସ ଡେଲି’ରେ ସୋମବାର ତାଲିବାନ ସପକ୍ଷବାଦୀ ଏକ ଭିଡିଓ ପୋଷ୍ଟ କରିଥିଲା। ଏହି ପୋଷ୍ଟକୁ ସମାଲୋଚନା କରାଯିବା ପରେ ଏହାକୁ ହଟାଇ ଦିଆଯାଇଥିଲା। ତେବେ ଆଫଗାନିସ୍ତାନକୁ ଆତଙ୍କବାଦୀଙ୍କ ପେଣ୍ଠସ୍ଥଳ ହେବାକୁ ଦିଆଯିବ ନାହିଁ ବୋଲି ଚୀନ୍ କହିଛି।
Popular Categories
Previous article
Next article