ବେଗୁନିଆ: ବେଗୁନିଆ ବ୍ଲକ ଗୋବିନ୍ଦପୁର ପଞ୍ଚାୟତ ଅନ୍ତର୍ଗତ ଲୋକିପୁର ଗ୍ରାମରେ ଆଜି ଜଣେ ଯୁବକ ନିଜେ ଚାଷ କରିଥିବା ବାଇଗଣ କିଆରୀରୁ ବାଇଗଣ ତୋଳୁଥିବାବେଳେ ସର୍ପଦଂଶନରେ ମୃତ୍ୟୁ ହୋଇଛି । ସମ୍ପୃକ୍ତ ଗ୍ରାମର ପର୍ଶୁରାମ ଶ୍ରୀଚନ୍ଦନଙ୍କ ପୁଅ ନିଶିଭୂଷଣ ଶ୍ରୀଚନ୍ଦନ(୩୫)ଆଜି ସକାଳୁ ମହାବୀର ମନ୍ଦିର ନିକଟରେ ସେ କରିଥିବା ବାଇଗଣ କିଆରୀରୁ ବାଇଗଣ ତୋଳିବାକୁ ଯାଇଥିଲେ । ସେ ବାଇଗଣ ତୋଳୁଥିବା ସମୟରେ ସର୍ପ ଦଂଶନରେ ଆହତ ହୋଇଥିଲେ । ସଙ୍ଗେ ସଙ୍ଗେ ତାଙ୍କୁ ଆମ୍ବୁଲାନ୍ସ ଯୋଗେ ଖୋର୍ଦ୍ଧା ମୁଖ୍ୟ ଡାକ୍ତରଖାନାକୁ ନିଆଯାଇଥିଲା । କିନ୍ତୁ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ । ସେ ବିବାହିତ ହୋଇଥିବାବେଳେ ତାଙ୍କର ବିଧବା ପତ୍ନୀଙ୍କ ସହିତ ୩ ବର୍ଷର ଗୋଟିଏ ପୁଅଟିଏ ଅଛି ।
ଉଲ୍ଲେଖଯୋଗ୍ୟ ଯେ ବିଭିନ୍ନ ସ୍ଥାନରେ ବହୁ ଲୋକ ସର୍ପଦଂଶନରେ ମରୁଥିବା ଯୋଗୁଁ ସରକାର ପ୍ରତି ପିଏଚସି ଏବଂ ସିଏଚସିକୁ ୧୦ ବାଉଏଲ ଲେଖାଏଁ ସାପକାମୁଡ଼ା ଇଂଜେକସନ ଯୋଗାଇଦେଉଥିଲେ । କିନ୍ତୁ ଚଳିତ ବର୍ଷ ଠାରୁ ଆଉ ଉପଲବ୍ଧ ନହେବା ଯୋଗୁଁ ଲୋକମାନେ ସର୍ପଦଂଶନରେ ଆହତ ହୋଇ ଖୋର୍ଦ୍ଧା ଯିବାକୁ ପଡୁଛି । ଫଳରେ ଆହତ ମାନଙ୍କୁ ସଙ୍ଗେ ସଙ୍ଗେ ଚିକିସ୍ଥା କରା ନଯାଇ ଖୋର୍ଦ୍ଧା ନେବା ଭିତରେ ଜୀବନ ଚାଲି ଯାଉଛି । ତେଣୁ ଏଥିପ୍ରତି କର୍ତ୍ତୃପକ୍ଷ ଦୃଷ୍ଟି ଦେବା ପାଇଁ ଜନସାଧାରଣ ଦାବି କରିଛନ୍ତି ।
