ପ୍ରତିରକ୍ଷା ବିକାଶ ଓ ଗବେଷଣା ପ୍ରତିଷ୍ଠାନ ଡି.ଆର୍.ଡି.ଓ. ଅଧ୍ୟକ୍ଷ ଡକ୍ଟର ସି. ସତୀଶ ରେଡ୍ଡୀ କହିଛନ୍ତି, କରୋନା ସଂକ୍ରମଣ ଦୃଷ୍ଟିରୁ ଦେଶରେ ଅମ୍ଳଜାନ ଅଭାବ ପୂରଣ କରିବା ନିମନ୍ତେ ପି.ଏମ୍. କେୟାରସ୍ ପାଣ୍ଠି ଅନୁଦାନରେ ବିଭିନ୍ନ ସ୍ଥାନରେ ଏପର୍ଯ୍ୟନ୍ତ ୮୫୦ଟି ଅମ୍ଳଜାନ ପ୍ଲାଣ୍ଟ ସ୍ଥାପନ କରାଯାଇଛି। ଆଜାଦି କା ଅମୃତ ମହୋତ୍ସବ ସମ୍ଭାଷଣ ଅବସରରେ ଡକ୍ଟର ରେଡ୍ଡୀ ଏହା କହିଛନ୍ତି। ସେ କହିଛନ୍ତି, ଡି.ଆର୍.ଡି.ଓ. ଆବଶ୍ୟକ ସମୟରେ ଜନସାଧାରଣଙ୍କୁ ସହାୟତା ଯୋଗାଇ ଦେବା ନିମନ୍ତେ ସବୁ ସମୟରେ ପ୍ରସ୍ତୁତ ରହିଛି। ସେ କହିଛନ୍ତି, ଡି.ଆର୍.ଡି.ଓ. ପକ୍ଷରୁ ଫ୍ଲାଇଙ୍ଗ୍ ହସ୍ପିଟାଲ୍ ପ୍ରସ୍ତୁତ କରାଯାଇଛି, ଯାହାଫଳରେ ହସ୍ପିଟାଲ ମଧ୍ୟରୁ ଭାଇରସ୍ ବାହାରକୁ ଯିବ ନାହିଁ ଏବଂ ତୃତୀୟ ଲହର ଯଦି ଆସେ ତାହାର ମଧ୍ୟ ମୁକାବିଲା କରାଯାଇ ପାରିବ।
ଡି.ଆର୍.ଡି.ଓ. ଲୋକମାନଙ୍କ ସାହାଯ୍ୟ ସହଯୋଗ ନିମନ୍ତେ ସବୁ ସମୟରେ ଆନ୍ତର୍ଜାତିକ ମାନର ଉଚ୍ଚସ୍ତରୀୟ ଜ୍ଞାନକୌଶଳ ବ୍ୟବହାର କରି ବିକାଶ କାର୍ଯ୍ୟକ୍ରମକୁ ଆଗକୁ ନେଉଥିବା ଡକ୍ଟର ରେଡ୍ଡୀ କହିଛନ୍ତି।
