ଦୋହା: ସୋମବାର ଏଠାରେ ଖେଳା ଯାଇଥିବା ଫିଫା ବିଶ୍ବକପ୍-୨୦୨୨ ଓ ଏସିଆନ କପ୍ ଯୋଗ୍ୟତା ପର୍ଯ୍ୟାୟ ଫୁଟ୍ବଲ ମ୍ୟାଚ୍ରେ ଭାରତ ବିଜୟୀ ହୋଇଛି। ଗ୍ରୁପ୍-ଇର ଏହି ମ୍ୟାଚ୍ରେ ଅଧିନାୟକ ସୁନୀଲ ଛେତ୍ରୀଙ୍କ ୨ଟି ଗୋଲ୍ ବଳରେ ବାଂଲାଦେଶକୁ ୨-୦ ଗୋଲ୍ରେ ଭାରତ ପରାସ୍ତ କରିଛି। ଫଳରେ ଗ୍ରୁପ୍-ଇରେ ଭାରତ ପ୍ରଥମ ବିଜୟ ହାସଲ କରିଛି। ୭ଟି ମ୍ୟାଚ୍ରୁ ଭାରତ ଗୋଟିଏ ବିଜୟ ସହ ୬ ପଏଣ୍ଟ ପାଇଛି। ଭାରତର ବିଶ୍ବକପ୍ ଯୋଗ୍ୟତା ପର୍ଯ୍ୟାୟର ପରବର୍ତ୍ତୀ ରାଉଣ୍ଡକୁ ଯିବା ସମ୍ଭାବନା ପ୍ରାୟ ନଥିବା ବେଳେ ଏସିଆନ କପ୍ ଯୋଗ୍ୟତା ହାସଲ ପାଇଁ ସୁଯୋଗ ସୃଷ୍ଟି କରିପାରିଛି।
ବାଂଲାଦେଶ ବିପକ୍ଷ ମ୍ୟାଚ୍ରେ ଭାରତ ଆକ୍ରମଣାତ୍ମକ ଫୁଟ୍ବଲ ଖେଳିଥିଲା। ମଧ୍ୟାନ୍ତର ସୁଦ୍ଧା ଉଭୟ ଦଳ ୦-୦ ସ୍ଥିତିରେ ଥିଲେ। ୮ମ ମିନିଟରେ ଭାରତକୁ କର୍ଣ୍ଣର ମିଳିଥିଲେ ହେଁ ଏହା ବେକାର ହୋଇଥିଲା। ୧୫ ମିନିଟରେ ଭାରତର ମାନବୀର ଗୋଲ୍ ଦେବାର ସୁଯୋଗ ହାତଛଡ଼ା କରିଥିଲେ। ୩୫ ମିନିଟରେ ସୁନୀଲ ଛେତ୍ରୀଙ୍କ ହେଡର ବାହାରକୁ ଯାଇଥିଲା। ୬୩ ମିନିଟରେ ପୁଣି ଛେତ୍ରୀ ଗୋଲ୍ଦେବା ସୁଯୋଗ ହାତଛଡ଼ା କରିଥିଲେ। ୭୩ ମିନିଟରେ ଏକ କ୍ରସ୍ରୁ ବଲ୍ ପାଇଁ ସୁନୀଲ ଛେତ୍ରୀ ଗୋଲ୍ଦେଇ ଭାରତକୁ ଆଗୁଆ କରିଥିଲେ। ଇଞ୍ଜ୍ୟୁରି ସମୟରେ ଛେତ୍ରୀ ବ୍ୟକ୍ତିଗତ ତଥା ଭାରତ ପାଇଁ ୨ୟ ଗୋଲ୍ ଦେଇଥିଲେ। ସୁରେଶଙ୍କ ପାସ୍ରୁ ଛେତ୍ରୀ ଏହି ଦର୍ଶନୀୟ ଗୋଲ୍ ସ୍କୋର୍ କରିଥିଲେ। ଏହି ପରାଜୟ ପରେ ବାଂଲାଦେଶ ଗ୍ରୁପ୍ର ଅନ୍ତିମ ସ୍ଥାନରେ ରହିଛନ୍ତି। ଜୁନ୍ ୧୫ରେ ଆଫ୍ଗାନିସ୍ତାନ ବିପକ୍ଷରେ ଭାରତ ପରବର୍ତ୍ତୀ ମ୍ୟାଚ୍ ଖେଳିବ।
