ଜି.ଉଦୟଗିରି : ବାରମ୍ବାର ବ୍ଳକ ପ୍ରଶାସନର ଦ୍ବାରସ୍ଥ ହୋଇ କୌଣସି ସୁଫଳ ନ ମିଳିବାରୁ ନିଜର ଜୀବନ ବଞ୍ଚାଇବା ପାଇଁ ଜି.ଉଦୟଗିରି ପଞ୍ଚାୟତ ସମିତିର ଗ୍ରେସିଙ୍ଗିଆ ଗ୍ରାମ ପଞ୍ଚାୟତ ଅନ୍ତର୍ଗତ ପ୍ରାୟ ୩୦୦ ଜନସଂଖ୍ୟା ବିଶିଷ୍ଟ ଗଡାବିଶା ଗ୍ରାମବାସୀ ଦୈନନ୍ଦିନ ବ୍ୟବହାର କରୁଥିବା ଚୁଆକୁ ନିଜ ଉଦ୍ୟମରେ ମରାମତି ସହ ସଫା କରିଥିବା ଦେଖିବାକୁ ମିଳିଛି। ଗତ ଏକ ବର୍ଷ ତଳେ ତତ୍କାଳୀନ ଗୋଷ୍ଟୀ ଉନ୍ନୟନ ଅଧିକାରୀଙ୍କୁ ଗଡାବିଶା ଗ୍ରାମବାସୀ ଭେଟି ବ୍ୟବହୃତ ଚୁଆକୁ ମରାମତି ସହ ସଫା କରିବାକୁ ଗୁହାରି କରିଥିବା ବେଳେ ପଲ୍ଲୀ ସଭାରେ ମଧ୍ୟ ଏ ବିଷୟରେ ଆଲୋଚନା ହୋଇଥିଲା। କିନ୍ତୁ କୌଣସି ସୁଫଳ ନ ମିଳିବାରୁ ଆଜି ଗ୍ରାମର ଶତାଧିକ ପୁରୁଷ ଓ ମହିଳା ନିଜ ଉଦ୍ୟମରେ ସେମାନଙ୍କ ବ୍ୟବହୃତ ଚୁଆକୁ ମରାମତି କରିବା ସହ ସଫା କରିଥିଲେ। ଆଜିର ମରାମତି ଓ ସଫା କାର୍ଯ୍ୟରେ ଆମନ ପ୍ରଧାନ, ଆଇବନ ପ୍ରଧାନ, ସୁଶେଦ ନାୟକ, ଗଙ୍ଗା ପ୍ରଧାନ, ପୁଲୁ ପ୍ରଧାନ, ଟିଙ୍କୁ ପ୍ରଧାନ,ଅହଲ୍ୟା ପ୍ରଧାନ,କାଶିଆଫୁଲ ପ୍ରଧାନଙ୍କ ତତ୍ତ୍ବାବଧାନରେ ଗ୍ରାମବାସୀ ସହଯୋଗ କରିଥିଲେ।
ପ୍ରକାଶ ଥାଉକି,ଏ ସମ୍ପର୍କରେ ଆମ ପ୍ରତିନିଧି ପଞ୍ଚାୟତ ସମ୍ପ୍ରସାରଣ ଅଧିକାରୀ(ପିଇଓ) ବିଶିକେସନ ବେହେରାଙ୍କ ସହ ଯୋଗାଯୋଗ କରିବାରେ କହିଥିଲେ ଯେ ସରକାରଙ୍କ ପକ୍ଷରୁ ଚୁଆ ପାଣି ବ୍ୟବହାର ପାଇଁ ନିଷେଧ ଥିବାବେଳେ ସେମାନଙ୍କ ଅଭିଯୋଗ ପ୍ରକାରେ ବ୍ଳକ ପ୍ରଶାସନ ମରାମତି କରିବା ସମ୍ଭବ ହୋଇନଥିବା ଏବଂ ଏହାର ବିକଳ୍ପ ବ୍ୟବସ୍ଥା ପାଇଁ ସୋଲାର ପାଣି ପମ୍ପ ବ୍ୟବହାର ସକାଶେ ଗଡାବିଶା ବଡ ସାହିରେ ନିର୍ମୀତ ହୋଇଅଛି।
