ଆରଡି: ବାତ୍ୟା ୟସ ଆସିଲା , ତାଣ୍ଡବ ରଚି ଚାଲିଗଲା। ଯାହାର ପ୍ରଭାବରେ ଭଦ୍ରକ ଜିଲାର ତଳମାଳ ଅଞ୍ଚଳଭାବେ ପରିଚିତ ଆରଡି, ସୁନ୍ଦରପୁର, ଓଳଗ, ନାନ୍ଦପୁର ପଞ୍ଚାୟତ ଅଧିନରେ ଥିବା ୨୨ଟି ଗାଁର ବିପନ୍ନଙ୍କୁ ଦେଇଗଲା ଦୁଖଃ ଆଉ ଦୁଖ। କେଉଁଠି ବର୍ଷା ଓ ପବନ ମାଡରେ କଚା ଘର ଧରାଶ୍ରାୟୀ ହୋଇଯାଇଛି ତ ଆଉ କେଉଁଠି ଛପରଘର ଉଡିଯାଇଛି। ଏପରିକି ବଡ ବଡ ଗଛ ଉପୁଡି ପଡିବାରୁ ଅନେକ ଘର ଭାଙ୍ଗି ଯାଇଛି।
ସେହିପରି ବିଭିନ୍ନ ସ୍ଥାନରେ ବିଦ୍ୟୁତଖୁଣ୍ଟି ଉପୁଡି ପଡିଥିବାରୁ ବିଦ୍ୟୁତ ସରାବର ବିଛିନ୍ନ ହୋଇଯାଛି। ପ୍ରଶାସନିକ ପୂର୍ବ ପ୍ରସ୍ତୁତି ପାଇଁ ସିନା ଜୀବନ ରହିଗଲା ହେଲେ କ୍ଷେତରେ ଚାଷ ଗଲା ଆଉ ଗାଁରେ ବାସ ଉଜାଡି ନେଲା ୟସ। ବିଶେଷକରି ବାତ୍ୟା ସମୟରେ ପୂର୍ଣ୍ଣିମା ତିଥି ରହିଥିବାରୁ ଧାମରା ନିକଟରେ ସମୁଦ୍ର ହୋଇ ଉଠିଥିଲା ଅଶାନ୍ତ। ଫଳରେ ଉଚ୍ଚ ଲୁଣା ଜୁଆରପାଣି ବୈତରଣୀ ଓ ସାଳନ୍ଦୀ ନଦୀରେ ଆସି ବିଭିନ୍ନ ଅଞ୍ଚଳର କ୍ଷେତକୁ ବୁଡାଇବା ସହ ମାଡିଯାଇଥିଲା ଜନବସତିକୁ। ଯାହାଫଳରେ ଗତ ୨ଦିନ ହେବ ଲୁଣାପାଣି ଏବେବି ଅନେକ ଗାଁରେ ଲହଡି ଭାଙ୍ଗୁଥିବାରୁ ବିପନ୍ନଙ୍କର ଅବସ୍ଥା ଦୃବିସହୟ ହୋଇ ପଡିଛି।
ଅନ୍ୟପଟେ ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ଭଦ୍ରକ ଜିଲାପାଳ ଜ୍ଞାନ ଦାସ, ଚାନ୍ଦବାଲି ତହସିଲିଦାର ସୁଶାନ୍ତ ସୁତାର, ବିଡିଓ ଜ୍ୟୋତିବିକାଶ ଦାସ, ଆରଡି ଆରଆଇ ଦେବାଶିଷ ରାୟ, ଜିଆରଏସ ସତ୍ୟରଞ୍ଜନ ପତି, ବ୍ଲକ ଜେଇଙ୍କ ସହ ସ୍ଥାନୀୟ ପୋଲିସ ବାତ୍ୟା ଅଞ୍ଚଳକୁ ଯାଇ ବିପନ୍ନଙ୍କ ଉଜୁଡି ଯାଇଥିବା ଘର, କ୍ଷେତ ଆଦିର ଅନୁଧ୍ୟାନ କରିବା ସହ ରିପୋର୍ଟ ପ୍ରସ୍ତୁତ ଆରମ୍ଭ କରିଛନ୍ତି। ଏହାସହ ଅଗ୍ନିଶମ ବାହିନୀଙ୍କ ପକ୍ଷରୁ ବିଭିନ୍ନ ସ୍ଥାନରେ ଉପୁଡି ପଡିଥିବା ଗଛ ସଫା କରିବା ସହ ବିଦ୍ୟୁତ ଖୁଣ୍ଟର ପୁନରୁଉଦ୍ଧାର କାର୍ୟ୍ୟ ଜାରୀ ରଖିଛନ୍ତି। ସେହିପରି ବାତ୍ୟାରେ ଅଧିକ କ୍ଷତିଗ୍ରସ୍ତ ହୋଇଥିବା ବିଦ୍ୟୁତ, କିଭଳି ଶିଘ୍ର ଲୋକମାନଙ୍କ ପାଖରେ ପହଁଚିବ ସେଥିପାଇଁ ଅସୁରାଳି ବିଦ୍ୟୁତ ବିଭାଗ ପକ୍ଷରୁ କାର୍ୟ୍ୟ ଜାରୀ ରହିଥିବା, କନିଷ୍ଠଯନ୍ତ୍ରୀ କହିଛନ୍ତି।
