ଟିଟିଲାଗଡ଼: ରାଜ୍ୟ ମହିଳା ଓ ଶିଶୁ ବିକାଶ, ମିଶନ ଶକ୍ତି ମନ୍ତ୍ରୀ ଟୁକୁନୀ ସାହୁ ବୁଧବାର ଟିଟିଲାଗଡ ଗସ୍ତ ଅବସରରେ ବଲାଙ୍ଗିର ଜିଲାରେ କୋଭିଡ ପରିଚାଳନା ତଥା ସ୍ଥିତି ନେଇ ସ୍ଥାନୀୟ ପୂର୍ତ୍ତ ବିଭାଗ ଡାକ ବଙ୍ଗଳା ପରିସରରେ ଜିଲାପାଳ ଚଞ୍ଚଳ ରାଣାଙ୍କ ସହ ସମୀକ୍ଷା କରିଛନ୍ତି। ଏନେଇ ଜିଲାରେ ସଂକ୍ରମଣ ହାର ଦିନକୁ ଦିନ ହ୍ରାସ ସହ ସ୍ଥିତି ଆୟତ୍ତାଧିନ ଥିବା ଜିଲାପାଳ ଆଲୋଚନା କାଳରେ ମନ୍ତ୍ରୀଙ୍କ ଅବଗତ କରିଥିଲେ।
ଏହା ସହ ଜିଲାରେ ବିଭିନ୍ନ ଉନ୍ନୟନ କାର୍ଯ୍ୟ ନେଇ ପଚାରି ବୁଝିବା ସହ ବିଭିନ୍ନ ପରାମର୍ଶ ଦେଇଥିଲେ। ଟିଟିଲାଗଡ ପୌର ପରିଷଦ ପକ୍ଷରୁ ସହରରେ ମହାରାଜ ସାଗର, ଦେବନ୍ଧ ସାଗର, ନୂତନ ବସଷ୍ଟାଣ୍ଡ, ଆଇଟିଆଇ କଲେଜ, ଜାତୀୟ ରାଜପଥ ୫୯ ବାଇପାସ ରାସ୍ତା, ଦୁର୍ଗମ କୁଟରାକେନ ଗ୍ରାମକୁ ପୋଲ, ଟିଟିଲାଗଡ ଏବଂ ସଇଁନ୍ତଲା ବ୍ଲକର ଗ୍ରାମାଞ୍ଚଳକୁ ପାନୀୟ ଜଳ ଯୋଗାଣ ନେଇ ବେଲଗାଁ ଠାରେ ନିର୍ମାଣାଧିନ ୩୯ କୋଟି ଟଙ୍କାର ମେଗା ପାନୀୟ ଜଳ ପ୍ରକଳ୍ପ, ଦେସିଲ, ବାନ୍ଧୁପଲା ଠାରେ ନୁତନ ଗ୍ରାମ୍ୟ ଜଳ ଯୋଗାଣ ପ୍ରକଲ୍ପ ତ୍ୱରାନ୍ୱିତ କରିବା ନେଇ ଜିଲାପାଳ ତଥା ଉପସ୍ଥିତ ଉପଜିଲାପାଳ ସୋମେଶ ଉପାଧ୍ୟାୟଙ୍କୁ ବିଭିନ୍ନ ପରାମର୍ଶ ଦେଇଥିଲେ। ସମୀକ୍ଷା ବୈଠକ ପୂର୍ବରୁ ଜିଲାପାଳ, ଉପଜିଲାପାଳ ସହରରେ ନିର୍ମାଣାଧିନ ବିଭିନ୍ନ ଉନ୍ନୟନ ପ୍ରକଳ୍ପ ବୁଲି ଦେଖିଥିବା ଜଣାଯାଇଛି।
