ଲାଞ୍ଜିଗଡ଼: ନିୟମଗିରି ପର୍ବତ ଉପରେ ବସବାସ କରୁଥିବା ଆଦିମ ଜନଜାତି ଡଙ୍ଗରିଆ ଓ ଝରଣିଆ କନ୍ଧମାନଙ୍କୁ ସୁରକ୍ଷା ଦେବାକୁ ଅଣ୍ଟା ଭିଡିଛି ଲାଞ୍ଜିଗଡ ବ୍ଲକ ପ୍ରଶାସନ। ରାୟଗଡା ଜିଲ୍ଲା ଅଞ୍ଚଳରେ ଥିବା ଏହି ଜନଜାତିର କିଛି ବ୍ୟକ୍ତି କରୋନା ଆକ୍ରାନ୍ତ ହେବା ଖବର ପ୍ରଚାର ହେବାକ୍ଷଣି ଲାଞ୍ଜିଗଡ ବ୍ଲକ ପ୍ରଶାସନ ସତର୍କତା ଅବଲମ୍ବନ କରିଛି। ବ୍ଲକ ପ୍ରଶାସନ ପକ୍ଷରୁ ବିଡିଓ ଜିତେନ୍ଦ୍ର କୁମାର ମିଶ୍ରଙ୍କ ପ୍ରତ୍ୟକ୍ଷ ତତ୍ୱାବଧାନରେ ନୋଡାଲ ଅଫିସର ଦାୟିତ୍ୱରେ ଥିବା ଜିଲ୍ଲା ମଙ୍ଗଳ ଅଧିକାରୀ ଅରବିନ୍ଦ ରାୟ, ପିଏ ଆଇଟିଡିଏସ ବିରଂଚି ନାରାୟଣ ଦରୱାନଙ୍କ ସମେତ କେକେଡିଏର ଲମ୍ବୋଦର ପ୍ରଧାନ, କନିଷ୍ଠ ଯନ୍ତ୍ରୀ ପିତାମ୍ବର ହେମ୍ବ୍ରମ ପ୍ରମୁଖ ନିୟମଗିରି ପର୍ବତରେ ବସବାସ କରୁଥିବା ଆଦିବାସୀମାନଙ୍କ ପାଖରେ ପହଞ୍ଚିବା ସହିତ ଘର ଘର ବୁଲି ସେମାନଙ୍କ ସ୍ୱାସ୍ଥ୍ୟ ପରୀକ୍ଷା କରି ସେମାନଙ୍କୁ ଔଷଧ ବଣ୍ଟନ କରିଛନ୍ତି।
ତ୍ରିଲୋଚନପୁର ସରପଞ୍ଚ ଚନ୍ଦ୍ର ମାଝୀ, ପଞ୍ଚାୟତ ନିର୍ବାହୀ ଅଧିକାରୀ ଅଲେଖ ସା, ଗ୍ରାମ ରୋଜଗାର ସେବକ ଅରବିନ୍ଦ ମହାନ୍ତିଙ୍କ ସହିତ ମହିଳା ସ୍ୱାସ୍ଥ୍ୟ କର୍ମୀ, ଆଶା ଓ ଅଙ୍ଗନୱାଡି କର୍ମୀ ତଥା ଶିକ୍ଷକମାନେ ଏହି ସର୍ଭେରେ ସାମିଲ ହୋଇଥିଲେ। ତ୍ରିଲୋଚନପୁର ଗ୍ରାମପଞ୍ଚାୟତର ଫୁଲଡୁମେର, ଖେମୁଣ୍ଡିପଦର, ଓଲବାହାଲି ଓ ଅମଠାପଦର ଗାଁର ଶତାଧିକ ଆଦିବାସୀ ପରିବାରକୁ ଏହି ସର୍ଭେରେ ସାମିଲ କରାଯାଇଥିଲା।
