ୱାଶିଂଟନ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଟ୍ବିଟର, ଫେସବୁକ ଏବଂ ଅନ୍ୟ ସୋସିଆଲ ମିଡିଆ ସାଇଟ୍ ପକ୍ଷରୁ ବ୍ୟାନ୍ କରାଯାଇଥିଲା। ଫଳରେ ଟ୍ରମ୍ପଙ୍କୁ ଆଉ ସୋସିଆଲ ମିଡିଆରେ ସେତେ ସକ୍ରିୟ ଥିବା ଦେଖିବାକୁ ମିଳୁ ନାହିଁ। ତେଣୁ ଟ୍ରମ୍ପ ଏତେ ପୁଣି ଥରେ ସୋସିଆଲ ମିଡିଆକୁ ପ୍ରତ୍ୟାବର୍ତ୍ତନ କରିବାକୁ ପ୍ରସ୍ତୁତି ଆରମ୍ଭ କରିଛନ୍ତି। ସେ ନିଜର ସୋସିଆଲ ମିଡିଆ ସାଇଟ୍ ତିଆରି କରୁଥିବା ସୂଚନା ମିଳିଛି।
ଗତ ଜାନୁୟାରୀ ୬ରେ ଟ୍ରମ୍ପଙ୍କ ସମର୍ଥକମାନେ କ୍ୟାପିଟଲ ବିଲ୍ଡିଂରେ ଆକ୍ରମଣ କରିବା ପରେ ତାଙ୍କୁ ସୋସିଆଲ ମିଡିଆରୁ ସସ୍ପେଣ୍ଡ କରିଦିଆଯାଇଥିଲା। ଫେସବୁକ୍, ଟ୍ବିଟର ସମେତ ୟୁଟ୍ୟୁବ ଏବଂ ସ୍ନାପଚାଟ୍ ପକ୍ଷରୁ ମଧ୍ୟ ତାଙ୍କୁ ବ୍ୟାନ୍ କରାଯାଇଥିଲା। ଟ୍ରମ୍ପଙ୍କ ଆକାଉଣ୍ଟରୁ ଲଗାତାର ଭୁଲ ସୂଚନା ଏବଂ ଉତ୍ତେଜନା ଉଦ୍ରେକକାରୀ ଭାଷଣ ପୋଷ୍ଟ କରାଯାଉଥିବାରୁ ଏଭଳି ପଦକ୍ଷେପ ନିଆଯାଇଥିଲା।
ସୋସିଆଲ ମିଡିଆ କମ୍ପାନୀଗୁଡ଼ିକର ଏହି ପଦକ୍ଷେପ ପରେ ଟ୍ରମ୍ପ ଆଉ କୌଣସି ପ୍ଲାଟଫର୍ମରେ ନିଜର ଭିଡିଓ ଅପ୍ଲୋଡ୍ କରିପାରୁ ନ ଥିଲେ କି କିଛି ପୋଷ୍ଟ କରିପାରୁ ନ ଥିଲେ। ତେଣୁ ଟ୍ରମ୍ପ ନିଜର ସୋସିଆଲ ମିଡିଆ ପ୍ଲାଟଫର୍ମ ପ୍ରସ୍ତୁତ କରିବାକୁ ଯୋଜନା ଚଳାଇଥିବା ଜଣାପଡ଼ିଛି।
