ଦ୍ୱାରଶୁଣି: ମୟୁରଭଞ୍ଜ ଜିଲ୍ଲାର ବାଙ୍ଗିରିପୋଷି ଦ୍ୱାରଶୁଣି ଘାଟିରେ ପୃଥକ ପୃଥକ ଦୁର୍ଘଟଣାରେ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ବାଙ୍ଗିରିପୋଷି ଥାନା ଅନ୍ତର୍ଗତ ଜାତୀୟ ରାଜପଥ ୪୯ ଉପରେ ଥିବା ଦ୍ୱାରଶୁଣି ଘାଟିରୁ ଉଠୁଥିବା ଏକ ଲୁହା କଣ୍ଟା ବୋଝେଇ ମିନିଟ୍ରକକୁ ବିପରୀତ ଦିଗରୁ ଆସୁଥିବା ଏକ ଲୁହାପାଇପ ବୋଝେଇ ଟ୍ରକ ଭାରସାମ୍ୟ ହରାଇ ଧକ୍କା ଦେବା ଫଳରେ ମିନିଟ୍ରକଟି ଘାଟି ରାସ୍ତା ତଳକୁ ଖସି ପଡିଥିଲା। ଫଳରେ ମିନିଟ୍ରକ ଚାଳକର ଘଟଣାସ୍ଥଳରେ ମୃତ୍ୟୁ ହୋଇଛି। ମିନିଟ୍ରକରେ ଚାପି ହୋଇଯାଇଥିବା ଖଲାସୀକୁ ବାଙ୍ଗିରିପୋଷି ଦମକଳ ବାହିନୀ ଉଦ୍ଧାର କରି ବାଙ୍ଗିରିପୋଷି ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛି। ତେବେ ତାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ବାରିପଦା ବଡ଼ ମେଡିକାଲକୁ ନିଆଯାଇଛି।
ବାଙ୍ଗିରିପୋଷି ଘାଟିରେ ଅନ୍ୟ ଏକ ସ୍ଥାନରେ ଏକ ୩୨ ଚକିଆ ବଡ଼ ମାଲବୁହା ଯାଉଥିବା ବେଳେ ସେହି ଗାଡିର କର୍ମଚାରୀ ଚକ ତଳେ ପଶି ଯିବାରୁ ତାର ମଧ୍ୟ ମୃତ୍ୟୁ ହୋଇଛି। ବାଙ୍ଗିରିପୋଷି ପୋଲିସ ପହଁଚି ଉଭୟ ମୃତ ଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
