ବୁଗୁଡ଼ା : ବୁଗୁଡ଼ା ଥାନା ଅଞ୍ଚଳରେ ଜୈନିକା ନାବାଳିକାଙ୍କୁ ବିବାହର ପ୍ରତିଶ୍ରୁତି ଦେଇ ଅନ୍ତସତ୍ତ୍ବା କରିବା ଅଭିଯୋଗରେ ବୁଗୁଡ଼ା ପୁଲିସ ଶୁକ୍ରବାର ସନ୍ଧ୍ୟାରେ ଜଣେ ଯୁବକକୁ ଗିରଫ କରିଛି । ଗିରଫ ଯୁବକ ଜଣକ ଆସିକାର ରଞ୍ଜିତ ନାୟକ । ଗିରଫ ପରେ ପୁଲିସ ଆଜି ଅଭିଯୁକ୍ତକୁ କୋର୍ଟ ଚାଲାଣ କରିଥିବା ଜଣାପଡିଛି ।
ଘଟଣାରୁ ପ୍ରକାଶ ଯେ, ବୁଗୁଡ଼ା ଥାନା ଅଞ୍ଚଳର ଜୈନିକା ୧୫ବର୍ଷୀୟା ନାବାଳିକାଙ୍କ ସହ ବୁଗୁଡ଼ା ସହରରେ ଉକ୍ତ ଯୁବକଙ୍କ ଗତ ବର୍ଷ ଡିସେମ୍ବର ମାସରେ ଦେଖା ସକ୍ଷାତ ହୋଇଥିଲା l ଏ ଅବସରରେ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା l ନାବାଳିକାଙ୍କୁ ଯୁବକ ଜଣକ ବିବାହ କରିବା ନେଇ ପ୍ରତିଶ୍ରୁତି ଦେଇ ପ୍ରଥମେ ଭୁବନେଶ୍ବର ଏବଂ ତାହା ପରେ ଚେନ୍ନଇରେ କିଛି ମାସ ରଖି ତିନି ମାସ ତଳେ ତାଙ୍କ ଘରେ ଆଣି ଛାଡି ଦେଇଥିଲା l ସେଠାରେ ନାବାଳିକା ଜଣକ ଗର୍ଭବତୀ ହୋଇଥିବା ଜଣା ପଡିବା ପରେ ଏନେଇ ସେ ରଞ୍ଜିତକୁ କହିବାରୁ ସେ ଆଉ ଧରା ଛୁଆଁ ଦେଇନଥିଲା l ନାବାଳିକା ଜଣକ ବାଧ୍ୟ ହୋଇ ଥାନାର ଆଶ୍ରୟ ନେଇଥିଲା l ଅଭିଯୋଗକୁ ଭିତ୍ତିକରି ବୁଗୁଡ଼ା ପୁଲିସ ନାବାଳିକାକୁ ବ୍ରହ୍ମପୁରସ୍ଥ ଉତ୍କଳ ବାଳାଶ୍ରମରେ ଛାଡିଥିଲେ l ସେଠାରେ ସେ ଶିଶୁ ସନ୍ତାନଟିଏ ପ୍ରସବ କରିଥିଲେ l ତିନି ମାସ ହେଲା ଫେରାର ଥିବା ଯୁବକକୁ ପୁଲିସ ଖୋଜି ଖୋଜି ଗତକାଲି ବୁଗୁଡ଼ାରେ ହିଁ ଧରିଥିଲେ l ତାପରେ ଉଭୟଙ୍କ ଡାକ୍ତରୀ ମାଇନା କରାଯାଇ ବୁଗୁଡ଼ା ପୁଲିସ ନାବାଳିକାଙ୍କୁ ତାଙ୍କ ଘରେ ଛାଡିଥିଲାବେଳେ ଗିରଫ ଯୁବକ ଜଣଙ୍କୁ ବ୍ରହ୍ମପୁର କୋର୍ଟକୁ ଚାଲାଣ କରାଯାଇଥିଲା ।
