ପ୍ରଦୀପଙ୍କ ଗୁମର ଖୋଲିବେ ସାନଖେମୁଣ୍ଡି ବିଧାୟକ; ଆସନ୍ତା ୬ ତାରିଖରେ ସାମ୍ବାଦିକ ସମ୍ମିଳନୀ କରି ଦେବେ ସୂଚନା

ଭୁବନେଶ୍ବର:  ଆସନ୍ତା ୬ ତାରିଖରେ ସାମ୍ବାଦିକ ସମ୍ମିଳନୀ କରି ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ସବୁ ଗୁମର ଖୋଲିବେ ସାନଖେମୁଣ୍ଡି ବିଧାୟକ ରମେଶ ଜେନା । ଶୁକ୍ରବାର ବିଭିନ୍ନ ଗଣମାଧ୍ୟମକୁ ସେ ଏ ସମ୍ପର୍କରେ ସୂଚନା ଦେଇଛନ୍ତି । ରମେଶ କହିଛନ୍ତି ଯେ ଦିନ ଥିଲା ମୋ ମା’କୁ ସେ କନ୍ଦାଇଥିଲେ । ମୋ ନାଁରେ ୫୪ ମିଛ କେଶ୍ ଦେଇଥିଲେ । ସେତେବେଳେ ସେ ବିଧାୟକ ନ ଥିଲେ, ଖାଲି ମୁଖ୍ୟମନ୍ତ୍ରୀଙ୍କ ପ୍ରତିନିଧି ଥିଲେ । ପରେ ସେ ବିଧାୟକ ହେଲେ, ମନ୍ତ୍ରୀ ହେଲେ । ଏହି ସମୟ ଭିତରେ ସେ କ’ଣ କରିଛନ୍ତି ମୁଁ ସବୁ ଜାଣିଛି । ଆସନ୍ତା ୬ ତାରିଖରେ ଏହା ଉପରେ ଗଞ୍ଜାମରେ ପ୍ରେସ ମିଟ୍ ଡ଼ାକିବି । ତାଙ୍କର ଲମ୍ବା ଇତିହାସର ଚିଠା ସେଇଠି କହିବି । ତାଙ୍କୁ ବହୁ ଆଗରୁ ଗିରଫ କରିବାର ଥିଲା, ମାତ୍ର ବହୁ ବିଳମ୍ବରେ ସରକାର ତାଙ୍କୁ ଗିରଫ କଲେ ବୋଲି ରମେଶ କହିଛନ୍ତି ।

ସେ ପୁଣି କହିଛନ୍ତି ଯେ ପାଣିଗ୍ରାହୀ ବାବୁ ଆଉ ସରକାରଙ୍କ ଚାପରେ ମୋ ନାଁରେ ୫୪ ମିଛ କେଶ୍ ଦିଆଗଲା । ୩ ବର୍ଷ କାଳ ମୁଁ ଜେଲରେ ରହିଲି । ହେଲେ ଲୋକ ମୋତେ ଭଲ ପାଉଥିଲେ, ଦଳ ମୋ ସାଥୀରେ ଥିଲା । ସେଥିପାଇଁ ଜେଲରୁ ଫେରିବା ପରେ ବି ଲୋକମାନେ ମୋତେ ଜିତାଇଲେ । ଆଉ ଏବେ ପାଣିଗ୍ରାହୀ ବାବୁଙ୍କ ସାଥୀରେ ନାଁ ତାଙ୍କ ଦଳ ଅଛି ନାଁ ତାଙ୍କ ସାଥୀରେ ଲୋକ ଅଛନ୍ତି । ସେ ଯାହା କରିଛନ୍ତି ସବୁ ମୁଁ କହିବି ବୋଲି କହିଛନ୍ତି ବିଧାୟକ  ରମେଶ ଜେନା ।

ଅନ୍ୟପକ୍ଷରେ କଂଗ୍ରେସ ବିଧାୟକ ସୁର ରାଉତରାୟ ଗିରଫ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ମଧ୍ୟ କଟାକ୍ଷ କରିଛନ୍ତି । ସେ କହିଛନ୍ତି ଯେ ମଦ ମାଫିଆ, ବାଲି, ପଥର ମାଫିଆଙ୍କଠାରୁ ପ୍ରଦୀପ ଟଙ୍କା ଠୁଳ କରିଛନ୍ତି । ଅଫିସରଙ୍କ ବଦଳିରେ ଟଙ୍କା ଠୁଳ କରିଛନ୍ତି । ତାଙ୍କ ସମୁଦି ଓ ଜ୍ବାଇଁ ଧରା ପଡ଼ି ନ ଥିଲେ ସିଏ କ’ଣ ଧରା ପଡ଼ିଥାଆନ୍ତେ ? ଭୟଙ୍କର ପଇସା ଟ୍ରାଜେକ୍ସନ କରିଛନ୍ତି ପାଣିଗ୍ରାହୀ । ଏବେ ଅପଡ଼ ହୋଇଗଲା ପରେ ସରକାର ତାଙ୍କୁ ଧରି ପକାଇଲେ । ସମୁଦି ଓ ଜ୍ବାଇଁଙ୍କ ସାଙ୍ଗରେ ସିଏ ବି ଜେଲ ଗଲେ ବୋଲି ସୁର କହିଛନ୍ତି ।