ଜୟପୁର,୨ା୧୨: ରାସ୍ତାରେ ବିଛା ଯାଉଥିବା ପାଇପ୍ ଏକ ଯାତ୍ରୀବାହୀ ବସ୍ର ଝରକା ବାଟେ ପଶିଯିବାରେ ଦୁଇ ଯାତ୍ରୀଙ୍କର ପ୍ରାଣହାନି ଘଟିଛି। ପାଇପ ବାଜି ଜଣଙ୍କର ଶରୀର ଦୁଇ ଖଣ୍ଡ ହୋଇଯାଇଛି। ରାଜସ୍ଥାନର ପାଲି ଜିଲା ଅନ୍ତର୍ଗତ ସାଣ୍ଡେରାବ ନିକଟ ଜାତୀୟ ରାଜପଥ-୧୬୨ରେ ଏହି ଦୁର୍ଘଟଣା ଘଟିଛି। ଏଥିରେ ୧୨ରୁ ଅଧିକ ଯାତ୍ରୀ ଆହତ ହୋଇଛନ୍ତି। ଦୁଇ ମୃତକଙ୍କ ନାମ ମେନା ଦେବୀ ଦେବାସୀ ଓ ଭମ୍ବର ଲାଲ ପ୍ରଜାପତ ଏବଂ ସେମାନେ ଇଟାଲୀ ନାଗରିକ ବୋଲି ପୁଲିସ କହିଛି। ରାସ୍ତା ପାର୍ଶ୍ବରେ ଗ୍ୟାସ ପାଇପଲାଇନ ବିଛା କାମ ଚାଲିଥିବାବେଳେ ମଙ୍ଗଳବାର ହାଇଡ୍ରା ମେସିନ ଦ୍ବାରା ପାଇପ ଉଠାଯାଇ ଖୋଳା ଯାଇଥିବା ସ୍ଥାନରେ ପକା ଯାଉଥିଲା। ଏହି ସମୟରେ ମେସିନ ଭାରସାମ୍ୟ ହରାଇବା ଫଳରେ ଏକ ପାଇପ ରାସ୍ତାରେ ଯାଉଥିବା ଘରୋଇ ବସ୍ କାଚ ଦେଇ ଭିତରେ ପଶି ଯାଇଥିଲା। ପାଇପଟି ବସର ଗୋଟିଏ ପାର୍ଶ୍ବରେ ପଶି ଆରପାର୍ଶ୍ବରେ ବାହାରି ଯାଇଥିଲା। କେହି କିଛି ବୁଝିବା ପୂର୍ବରୁ ବସ୍ ଭିତର ରକ୍ତ ଜୁଡ଼ୁବୁଡ଼ୁ ହୋଇଯାଇଥିଲା।
Popular Categories
Previous article
Next article