ନୂଆଦିଲ୍ଲୀ: ରାଜଧାନୀ ନୂଆଦିଲ୍ଲୀକୁ ପ୍ରଦୂଷଣମୁକ୍ତ କରିବା ଲାଗି କେଜ୍ରିୱାଲି ସରକାର ଶୁକ୍ରବାର ଏକ ବଡ଼ ପଦକ୍ଷେପ ନେଇଛନ୍ତି। ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ରାଜଧାନୀରେ ଇ-ବାହନ ନୀତିର ଶୁଭାରମ୍ଭ କରିଛନ୍ତି। ସରକାର ଏହି ନୀତିକୁ ପ୍ରୋତ୍ସାହିତକରିବା ଲାଗି ପ୍ରୋତ୍ସାହନ ରାଶି ମଧ୍ୟ ପ୍ରଦାନ କରିବେ। ଏହି ନୀତି ଅଧୀନରେ ୨ ଚକିଆ ଇଲେକ୍ଟ୍ରିକ୍ ଯାନ ପାଇଁ ସରକାର ୩୦ ହଜାର ଟଙ୍କା, କାର୍ ପାଇଁ ଦେଢ଼ ଲକ୍ଷ ଏବଂ ଅଟୋ ପାଇଁ ୩୦ ହଜାର ଟଙ୍କା ଲେଖାଏ ପ୍ରୋତ୍ସାହନ ରାଶି ପ୍ରଦାନ କରିବେ।
ଏହି ନୀତିକୁ ଶୁଭାରମ୍ଭ କରି କେଜ୍ରିୱାଲ କହିଛନ୍ତି, ବିଦ୍ୟୁତ ଚାଳିତ ଯାନ ନୀତି ପ୍ରସ୍ତୁତ ରହିଛି। ଦିଲ୍ଲୀ ସରକାର ଏ ନେଇ ବିଜ୍ଞପ୍ତି ଜାରି କରିଛନ୍ତି। ଆଜିଠାରୁ ୫ ବର୍ଷ ପରେ ଯେତେବେଳେ ସବୁଠି ଇଲେକ୍ଟ୍ରିକ୍ ଯାନର ଚର୍ଚ୍ଚା ହେଉଥିବ, ସେତେବେଳେ ଦିଲ୍ଲୀର ନାଁ ଶୀର୍ଷରେ ରହିବ। ସରକାର ଇ-ଯାନ ନୀତି ଅଧୀନରେ ଯେଉଁମାନେ ଇଲେକ୍ଟ୍ରିକ୍ ଯାନ କ୍ରୟ କରିବେ ସେମାନଙ୍କୁ ଆର୍ଥିକ ସହାୟତା ପ୍ରଦାନ କରାଯିବ। ୨ ଚକିଆ ଯାନ ପାଇଁ ୩୦ ହଜାର, କାର୍ ପାଇଁ ଦେଢ଼ ଲକ୍ଷ, ଅଟୋ ରିକ୍ସା ଏବଂ ଇ-ରିକ୍ସା ପାଇଁ ୩୦ ହଜାର ଟଙ୍କାର ସହାୟତା ଦିଆଯିବ ବୋଲି କେଜ୍ରିୱାଲ କହିଛନ୍ତି।
