ଆସନ୍ତା ୫ ତାରିଖରେ ଅଯୋଧ୍ୟାରେ ଶ୍ରୀରାମ ମନ୍ଦିର ନିର୍ମାଣ ଭୂମିପୂଜନ ନିମନ୍ତେ ଆରମ୍ଭ ହୋଇଛି ପ୍ରସ୍ତୁତି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୪୦ରୁ ଅଧିକ ଶୀର୍ଷ ସନ୍ଥଙ୍କ ସହ ଭୂମିପୂଜନ ନେଇ ବିସ୍ତୃତ ବୈଠକ କରିଛନ୍ତି । ରାବଣ ବଧ ପରେ ଶ୍ରୀରାମଙ୍କ ରାଜ୍ୟାଭିଷେକରେ ଅଯୋଧ୍ୟା ନଗରୀ ସଜ୍ଜିତ ହେବା ପରି ଭୂମିପୂଜନ ଦିନ ସମଗ୍ର ଅଯୋଧ୍ୟାକୁ ସଜ୍ଜିତ କରାଯିବ ଏବଂ ଦୁଇଦିନ ଅଖଣ୍ଡ ରାମାୟଣ ପାଠ କରାଯିବାକୁ ବୈଠକରେ ନିଷ୍ପତ୍ତି ହୋଇଛି । ଏହା ସହ ସମଗ୍ର ଅଯୋଧ୍ୟାକୁ ଦୀପମାଳାରେ ସଜ୍ଜିତ କରାଯିବ ବୋଲି ସୂଚନା ମିଳିଛି ।
ସନ୍ଥମାନଙ୍କ ସୂତ୍ରରୁ ମିଳିଥିବାସୂଚନା ଅନୁସାରେ ପୁରା ଅଯୋଧ୍ୟାକୁ ଧର୍ମମୟ ଓ ରାମମୟ କରିବାକୁ ଯୋଗୀ ଆଦିତ୍ୟନାଥ ନିର୍ଦେଶ ଦେଇଛନ୍ତି । ଅଯୋଧ୍ୟାର ମଠ, ମନ୍ଦିର, ଗଳି, ମହଲ୍ଲା, ସଡ଼କ ଓ ଘାଟକୁ ମନୋରମ କରାଯିବ ଯେପରି ତ୍ରେତାଯୁଗ ପୃଥିବୀକୁ ଓହ୍ଲାଇ ଆସିବା ପରି ଲାଗିବ । ଏହି ଅବସରରେ ଆଦିତ୍ୟନାଥ ଦଳ କର୍ମକର୍ତା, ନଗରନିଗମ ଓ ପ୍ରଶାସନିକ ଅଧିକାରୀଙ୍କୁ ଅଯୋଧ୍ୟାକୁ ପୁରା ସଜ୍ଜିତ କରିବା ନିମନ୍ତେ ନିର୍ଦେଶ ଦେଇଛନ୍ତି ।
ଭୂମି ପୂଜନର ସିଧା ପ୍ରସାରଣ ବ୍ୟବସ୍ଥା
କରୋନା ମହାମାରୀକୁ ଦୃଷ୍ଟିରେ ରଖି ଭୂମି ପୂଜନ ନିମନ୍ତେ ସମସ୍ତ ସନ୍ଥ ଓ ଧାର୍ମିକ ବ୍ୟକ୍ତିଙ୍କୁ ଆମନ୍ତ୍ରିତ କରିବା ଟ୍ରଷ୍ଟ ନିମନ୍ତେ ସମ୍ଭବ ନୁହେଁ । ତେଣୁ ଭୂମି ପୂଜନର ଲାଇଭ୍ ପ୍ରସାରଣ କରାଯିବ ଏବଂ ସମସ୍ତ ଦେଶବାସୀ ଏହାକୁ ଦେଖିପାରିବେ ।
ଅଯୋଧ୍ୟାର ଉତ୍ସାହ ସାରା ଦୁନିଆ ଦେଖିବ: ନୃତ୍ୟଗୋପାଳ (ଅଧ୍ୟକ୍ଷ ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟ)
ମହନ୍ତ ନୃତ୍ୟଗୋପାଳ ଦାସ କହିଛନ୍ତି ଭୂମି ପୂଜନ ସମସ୍ତ ସନ୍ଥ, ଧର୍ମାଚାର୍ଯ୍ୟ ଓ ସନାତନ ଧର୍ମାବଲମ୍ବୀଙ୍କ ନମନ୍ତେ ମନବାଞ୍ଛିତ ଫଳ ପ୍ରଦାନ କରିବ । ସମସ୍ତ ଲୋକ ଅଖଣ୍ଡ ରାମୟଣ ପାଠ, ସୁନ୍ଦରାକାଣ୍ଡ ପାଠ, ହନୁମାନ ଚାଳିଶା ପାଠ କରିବା ଆବଶ୍ୟକ । ରାମନାମ ସଙ୍କୀର୍ତନ କରିବା ସହ ଘରକୁ ଦୀପରେ ସଜେଇବାକୁ ସେ ପରାମର୍ଶ ଦେଇଛନ୍ତି ।
ସମସ୍ତେ ଭୂମି ପୂଜନରେ ସାମିଲ ହୁଅନ୍ତୁ : ଚମ୍ପତ ରାୟ ( ଜନ୍ମଭୂମି ଟ୍ରଷ୍ଟ ତୀର୍ଥକ୍ଷେତ୍ର ମହାସଚିବ)
କରୋନା ଯୋଗୁଁ ସମସ୍ତ ସନ୍ଥ ଓ ସାଧାରଣ ଲୋକଙ୍କ ଏକତ୍ରିତ ହେବା ସମ୍ଭବ ନୁହେଁ । ତଥାପି ସମସ୍ତେ ନିଜନିଜ ସ୍ଥାନରେ ରହି ଭୂମି ପୂଜନ କାର୍ଯ୍ୟକ୍ରମର ଦର୍ଶନ କରନ୍ତୁ । ଏଥିରେ ଶିଖ, ଜୈନ, ବୌଦ୍ଧ ଓ ଅନ୍ୟ ଧର୍ମାବଲମ୍ବୀମାନେ ନିଜନିଜ ସ୍ତରରେ ସାମିଲ ହୋଇ ପାରିବେ ବୋଲି ଶ୍ରୀ ରାୟ କହଛନ୍ତି ।
