ଅଯୋଧ୍ୟା : ଅଯୋଧ୍ୟାରେ ରାମଜନ୍ମଭୂମୀ ସ୍ଥଳରେ ଜମି ସମତଳ କାର୍ଯ୍ୟ ଚାଲିଛି । ୧୧ ଜଣ ଏହି କାର୍ଯ୍ୟରେ ନିୟୋଜିତ ଅଛନ୍ତି । ଏହି ସମୟ ମଧ୍ୟରେ ବହୁ ସଂଖ୍ୟାରେ ପ୍ରାଚୀନ ମନ୍ଦିରର ଅବଶିଷ୍ଟାଂଶ ଦେଖିବାକୁ ମିଳିଛି । ଏଥି ମଧ୍ୟରେ କଳଶ, ୧୨ରୁ ଅଧିକ ପଥର ସ୍ତମ୍ଭ ରହିଛି ଯେଉଁଥିରେ ମୂର୍ତ୍ତି ନିର୍ମାଣ କରାଯାଇଛି । ସେଠାରୁ ମଧ୍ୟ ବହୁ ସଂଖ୍ୟାରେ ଦେବୀ ଓ ଦେବତାମାନଙ୍କର ଖଣ୍ଡ ବିଖଣ୍ଡିତ ମୂର୍ତ୍ତି, ପଥରରେ ଖୋଦିତ ଶିବଲିଙ୍ଗ, ପ୍ରାଚୀନ କୂଅ ଏବଂ ଚୌଖଟ ମିଳିଛି । ଏହି ସମତଳ କାର୍ଯ୍ୟ ମଇ ୧୧ରୁ ଆରମ୍ଭ ହୋଇଥିଲା, ଯାହା ରାମଲାଲାଙ୍କ ମୂଳ ଗର୍ଭଗୃହ ଆଖପାଖରେ ଚାଲିଛି।
ସୂଚନା ଯୋଗ୍ୟ, ସୁପ୍ରିମକୋର୍ଟ ୨୦୧୯ ନଭେମ୍ବର ୯ ତାରିଖରେ ଏକ ଐତିହାସିକ ରାୟରେ ସମଗ୍ର ଜମି ଉପରେ ରାମଲାଲାଙ୍କୁ ଅଧିକାର ପ୍ରଦାନ କରିଥିଲେ । ଏହି ରାୟ ସହିତ ଏହା ସ୍ପଷ୍ଟ ହେଇଥିଲା ଯେ ଯେଉଁ ଗର୍ଭଗୃହରେ ରାମଲାଲା ବିରାଜମାନ ଥିଲେ, ସେଠାରେ ଏକ ବିକ୍ରମାଦିତ୍ୟ ଯୁଗର ମନ୍ଦିର ଥିଲା ।
ଏବେ ସମତଳ ସମୟରେ ମନ୍ଦିରର ଅବଶିଷ୍ଟାଂଶ ମିଳିଛି । ତେବେ ଏହି ଅବଶିଷ୍ଟାଂଶ ବିକ୍ରମାଦିତ୍ୟ ଯୁଗର ମନ୍ଦିରର କିମ୍ବା ପରବର୍ତ୍ତୀ ସମୟରେ ନିର୍ମିତ ମନ୍ଦିରର ବୋଲି ବର୍ତ୍ତମାନ କୁହାଯାଇପାରିବ ନାହିଁ । ରାମ ଜନ୍ମଭୂମି ପରିସରରେ ବିକ୍ରମାଦିତ୍ୟ ଯୁଗର ମନ୍ଦିର ସହିତ ଅନ୍ୟାନ୍ୟ ଅନେକ ମନ୍ଦିରର ଅବଶିଷ୍ଟାଂଶକୁ ଯେ ସମାଧି ଦିଆଯାଇଛି ତାହାକୁ ମଧ୍ୟ ଅସ୍ବୀକାର କରାଯାଇ ପାରିବ ନାହିଁ।
ଏହି ଅବଶିଷ୍ଟାଂଶରେ , ୭ଟି ବ୍ଲାକ୍ ଟଚ୍ ପଥର ସମୀକରଣରେ ନିର୍ମିତ ଏକ ସ୍ତମ୍ଭର ସଂଯୋଗକୁ ଦେଖାଯାଉଛି । ୨୦୦୦ ବର୍ଷ ପୂର୍ବେ ବିକ୍ରମାଦିତ୍ୟ ଯେଉଁ ମନ୍ଦିର ନିର୍ମାଣ କରିଥିଲେ ସେହି ମାନଦଣ୍ଡର ସମାନ ସ୍ତମ୍ଭ ଉପରେ ଏହା ଆଧାରିତ ବୋଲି ବିଶ୍ୱାସ କରାଯାଏ ।
ସାକେତ ମହାବିଦ୍ୟାଳୟର ପ୍ରାଚୀନ ଇତିହାସ ବିଭାଗର ସହଯୋଗୀ ପ୍ରାଧ୍ୟାପିକା ଡଃ କବିତା ସିଂହଙ୍କ ଅନୁସାରେ, ଏହା ପୂର୍ବରୁ ପ୍ରତୀୟମାନ ହୋଇଛି ଯେ, ଜନ୍ମଭୂମି ପରିସରରେ ସ୍ବର୍ଣ୍ଣିମ ଅତୀତର ଏକ ସମ୍ପୂର୍ଣ୍ଣ ଗାଥା ସମାହିତ ହୋଇଛି ଏବଂ ତାହା କ୍ରମଶଃ ସାମ୍ନାକୁ ଆସିବ । ଏହା ବିଶ୍ବାସ କରାଯାଉଛି ଯେ, ଯେତେ ଶୀଘ୍ର କାମରେ ଅଗ୍ରଗତି ଘଟିବ, ଆହୁରି ଅଧିକ ପ୍ରମାଣ ମିଳିବ।
